ନୂଆଦିଲ୍ଲୀ: ରାହୁଲ ଗାନ୍ଧିଙ୍କ ଲୋକସଭା ସଦସ୍ୟତା ରଦ୍ଦ ହେବା ପରେ ରାଜନୈତିକ ସଂଗ୍ରାମ ଜାରି ରହିଛି । ବିଜେପିକୁ ଘେରିବା ପାଇଁ କଂଗ୍ରେସ ସହିତ ଏକଜୁଟ ହୋଇଛନ୍ତି ବିପକ୍ଷ ପାର୍ଟି । ଏହାରି ଭିତରେ ସୋମବାର କଂଗ୍ରେସ ଅଧ୍ୟକ୍ଷ ମଲ୍ଲିକାଅର୍ଜୁନ୍ ଖଡଗେଙ୍କ ସହିତ ସମସ୍ତ କଂଗ୍ରେସ ସାଂସଦମାନେ କଳା ପୋଷାକ ପରିଧାନ କରି ସଂସଦରେ ପହଞ୍ଚିଥିଲେ । ସୋନିଆ ଗାନ୍ଧି ମଧ୍ୟ ବ୍ଲାକ୍ ଶାଢୀ ପିନ୍ଧି ଲୋକସଭାରେ ହଙ୍ଗାମା କରିଥିଲେ । ପରେ ଉଭୟ ଗୃହକୁ ମୁଲତବି କରାଯାଇଛି । ଲୋକସଭା ସଚିବାଳୟ ଦ୍ବାରା ରାହୁଲ ଗାନ୍ଧିଙ୍କ ସଦସ୍ୟତା ରଦ୍ଦ ହେବା ପରେ କଂଗ୍ରେସ ସାଂସଦ କଳା ପୋଷାକ ପିନ୍ଧି ବିରୋଧ ପ୍ରଦର୍ଶନ କରିଛନ୍ତି ।  

ସୋମବାର ରାଜ୍ୟସଭା ଓ ଲୋକସଭା କାର୍ଯ୍ୟ ଆରମ୍ଭ ହେବା ମାତ୍ରେ ଆଦାନୀ ଓ ରାହୁଲ ଗାନ୍ଧିଙ୍କ ମୁଦ୍ଦା ଉଠାଇ ହଙ୍ଗାମା କରିଥିଲେ କଂଗ୍ରେସ ସାଂସଦ । ଗୃହକୁ ଚାଲିବାକୁ ଦିଆଯାଇନଥିଲା । ଏହା ପରେ ରାଜ୍ୟସଭାକୁ  ୨ଟା ପର୍ଯ୍ୟନ୍ତ ଓ ଲୋକସଭାକୁ ଅପରାହ୍ଣ ୩ଟା ପର୍ଯ୍ୟନ୍ତ ମୁଲତବି ରଖିଛନ୍ତି ବାଚସ୍ପତି ।

ବିପକ୍ଷ ଦଳ ସଂସଦରେ ପହଞ୍ଚିବା ପୂର୍ବରୁ କଂଗ୍ରେସର ଅଧ୍ୟକ୍ଷତାରେ ବସିଥିବା ବୈଠକରେ ସାମିଲ ହୋଇଥିଲେ । ଏହି ମିଟିଂରେ  କଂଗ୍ରେସ, ଡିଏମକେ, ସମାଜବାଦୀ ପାର୍ଟି, ଜେଡିୟୁ, ବିଏସପି, ସିପିଏମ, ସିପିଆଇ, ଆଇୟୁଏମଏଲ, ଏମଡିଏମରେ, କେସି, ଆରଏସପି, ଆପ୍, ଜାମ୍ମୁ-କାଶ୍ମୀର ଏନସି, ଉଦ୍ଧାବ ଠାକରେଙ୍କ ଶିବସେନା ସାଂସଦ ମାନେ ସାମିଲ ହୋଇଥିଲେ । ଏହି ମିଟିଂ ଅଧିକାଂଶ ନେତା କଳା ପୋଷାକ ପରିଧାନ କରି ସାମିଲ ହୋଇଥିଲେ । ସବୁଠାରୁ ବଡ଼ କଥା ହେଲା କଂଗ୍ରେସ ଠାରୁ ଦୂରେଇ ରହୁଥିବା ତୃଣମୂଳ କଂଗ୍ରେସ ବିପକ୍ଷଙ୍କ ଲଢ଼େଇରେ ଏଣ୍ଟ୍ରି ମାରିଛି । ଟିଏମସି ସାଂସଦ ମାନେ କଳା ପୋଷାକ ପିନ୍ଧି ବୈଠକରେ ଯୋଗ ଦେଇଥିଲେ ।