ନୂଆଦିଲ୍ଲୀ: ନ୍ୟୁଜିଲାଣ୍ଡ ବିପକ୍ଷ ଟି-୨୦ ସିରିଜ ଆରମ୍ଭ ହେବା ପୂର୍ବରୁ ଟିମ୍ ଇଣ୍ଡିଆକୁ ଲାଗିଛି ବଡ଼ ଝଟକା । ଟିମର ଯୁବ ଓପନର ଋତୁରାଜ ଗାଏକ୍ୱାଡ ଆହତ ଯୋଗୁଁ ନ୍ୟୁଜିଲାଣ୍ଡ ବିପକ୍ଷରେ ଶୁକ୍ରବାରଠାରୁ ଆରମ୍ଭ ହେବାକୁ ଥିବା ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜରୁ ବାହାର ହୋଇଛନ୍ତି । ରଣଜୀ ଟ୍ରଫି ସମୟରେ ଗାଏକ୍ୱାଡଙ୍କ ହାତରେ ଆଘାତ ଲାଗିଥିଲା, ଏହାପରେ ସେ ଚିକିତ୍ସା ପାଇଁ ରାଷ୍ଟ୍ରୀୟ କ୍ରିକେଟ୍ ଅକାଦେମୀ ପହଞ୍ଚିଥିଲେ ।
ରିପୋର୍ଟ ଅନୁସାରେ ଏବେ ଏହି ଆହତ କାରଣରୁ ସେ ଟି-୨୦ ଶୃଙ୍ଖଳାରୁ ବାଦ ପଡିଛନ୍ତି । ଋତୁରାଜଙ୍କ ଲଗାତାର ଆହତ ହେବା କାରଣରୁ ବିସିସିଆଇ ମଧ୍ୟ ତାଙ୍କ ଉପରେ ଅସନ୍ତୋଷ ହୋଇଛି । ଏହି ଯୁବ ବ୍ୟାଟର ଆହତ ଯୋଗୁଁ ଗତ ଅନେକ ସିରିଜରୁ ବାହାର ହୋଇଛନ୍ତି । ଆହତ କାରଣରୁ ପୂର୍ବରୁ ସେ ଶ୍ରୀଲଙ୍କା ବିପକ୍ଷ ଟି-୨୦ ସିରିଜରୁ ବାହାର ହୋଇଥିଲେ । ଆର୍ୟଲାଣ୍ଡ ଗସ୍ତ ବେଳେ ପ୍ରଥମ ମ୍ୟାଚରେ ଆହତ ଯୋଗୁଁ ସେ ଖେଳିପାରି ନଥିଲେ ଏବଂ ଦ୍ୱୀତୟ ମ୍ୟାଚରେ ଟିମରୁ ବାହାର ହୋଇଥିଲେ ।
ଋତୁରାଜ ଭାରତୀୟ ଟିମରେ ସ୍ଥାନ ପାଇବା ପାଇଁ ସଂଘର୍ଷ କରୁଛନ୍ତି । ସେ ଟିମର ନିୟମିତ ସଦସ୍ୟ ନୁହନ୍ତି । ବରିଷ୍ଠଙ୍କ ଅନୁପସ୍ଥିତିରେ ତାଙ୍କୁ ସୁଯୋଗ ମିଳୁଛି । ଏବେ ଆହତ ଯୋଗୁଁ ଟିମରୁ ବାହାର ହେବା ପରେ ପୃଥ୍ୱୀ ସ'ଙ୍କୁ ସୁଯୋଗ ମିଳିପାରେ । ଦୀର୍ଘ ସମୟରୁ ଟିମରୁ ବାହାରେ ଥିବା ପୃଥ୍ୱୀ ସ' ନ୍ୟୁଜିଲାଣ୍ଡ ବିପକ୍ଷ ଭାରତୀୟ ଟିମରେ ସ୍ଥାନ ପାଇଛନ୍ତି । ୨୦୨୧ ଜୁଲାଇରେ ଭାରତ ପାଇଁ ଡେବ୍ୟୁ କରିଥିବା ଋତୁରାଜ ଗୋଟିଏ ଦିନିକିଆ ଏବଂ ୯ ଟି-୨୦ ମ୍ୟାଚ୍ ଖେଳିଛନ୍ତି ।
ଭାରତ ବନାମ ନ୍ୟୁଜିଲାଣ୍ଡ ଟି-୨୦, ସିରିଜର ପ୍ରଥମ ମ୍ୟାଚ ଶୁକ୍ରବାର ଜାନୁଆରୀ ୨୭ରେ ରାଞ୍ଚିରେ ଖେଳାଯିବ । ଦ୍ୱିତୀୟ ମ୍ୟାଚ୍ ଜାନୁଆରୀ ୨୯ରେ ଲକ୍ଷ୍ନୌରେ ଖେଳାଯିବ, ସେହିପରି ତୃତୀୟ ମ୍ୟାଚ ଫେବ୍ରୁଆରୀ ୧ରେ ଅହମଦାବାଦରେ ଖେଳାଯିବ ।
