ଗାଧୋଇବାକୁ ଯାଇଥିଲେ ପୋଖରୀ, ପାଣିରେ ବୁଡି ଚାଲିଗଲା ଜୀବନ

Published By : Prameya-News7 Bureau | June 11, 2024 IST

ଆନନ୍ଦପୁର ୧୧।୦୬ : ପୋଖରୀରେ ବୁଡି ବୃଦ୍ଧ ମୃତ । କେନ୍ଦୁଝର ଜିଲ୍ଲା ରାମଚନ୍ଦ୍ରପୁର ଥାନା ନର୍ଦା ଗାଁରେ ଦେଖିବାକୁ ମିଳିଛି ଏଭଳି ଅଘଟଣ । ମୃତକ ନର୍ଦା ଗାଁର କୀର୍ତ୍ତନ ବେହେରା ବୋଲି ଜଣାପଡିଛି । 

ଖବର ଅନୁଯାୟୀ, ସୋମବାର ରାତିରେ ପ୍ରବଳ ଗରମ ଗୁଇଗୁଳିରୁ ନିସ୍ତାର ପାଇବାକୁ ଗାଁ ପୋଖରୀକୁ ଗାଧୋଇବାକୁ ଯାଇଥିଲେ କୀର୍ତ୍ତନ ବେହେରା । ପୋଖରୀରେ ଏକାକୀ ଗାଧୋଉଥିବା ସମୟରେ ହଠାତ୍‌ ତାଙ୍କର ଗୋଡ ଖସିଯାଇଥିଲା । ଆଉ ପାଣିରେ ପଡିଯାଇଥିଲେ । ତେବେ ଘରକୁ ନଆସିବାରୁ ପରିବାର ଲୋକେ ବହୁ ଖୋଜଖୋଜି କରିଥିଲେ । ହେଲେ ତାଙ୍କର କୌଣସି ପତ୍ତା ପାଇନଥିଲେ। ଶେଷରେ ପରିବାର ଲୋକେ ତାଙ୍କ ମୃତଦେହ ପାଣିରେ ଭାସୁଥିବାର ଦେଖିଥିଲେ । 

ସେପଟେ ଏହି ଘଟଣା ପରେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିଛି । ଆଉ ବ୍ୟବଚ୍ଛେଦ ନିମନ୍ତେ ନିକଟସ୍ଥ ମେଡିକାଲକୁ ପଠାଇଛି । ଏହାସହ ପୋଲିସ ପ୍ରାଥମିକ ତଦନ୍ତ ଜାରି ରଖିଛି ।

 

News7 Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.