କେନ୍ଦ୍ରାପଡା ୨୫।୯: କେନ୍ଦ୍ରାପଡା ଜିଲ୍ଲା ନିକିରାଇ ଥାନା ଅନ୍ତର୍ଗତ ଧୂମାତ ଶାସନରେ ଜଣେ ଯୁବକଙ୍କୁ ଛୁରା ମାଡ । ଛୁରାମାଡରେ ତ୍ରିଲୋଚନ ମଳିକ ନାମକ ଜଣେ ଯୁବକଙ୍କର ମୃତ୍ୟୁ ହୋଇଥବା ଜଣାପଡିଛି l

ସୂଚନା ଅନୁଯାୟୀ, ସାଙ୍ଗମାନେ ବସି ନିଶା ଖାଉଥିବା ବେଳେ ପରସ୍ପର ମଧ୍ୟରେ ପାଟିତୁଣ୍ଡ ହେବାରୁ ଜଣେ ସାଙ୍ଗକୁ ଅନ୍ୟମାନେ ଛୁରୀ ମାଡ କରିଥିଲେ । ମୃତ ତ୍ରିଲୋଚନଙ୍କ ଘର ଚାରି ଗାଁରେ । ତାଙ୍କ ବୟସ ୩୦ ବର୍ଷ । ସୋମବାର ଦିନ ପ୍ରାୟ ସାଢେ ୧୨ଟା ବେଳେ ତ୍ରିଲୋଚନ ଏବଂ ତାଙ୍କର ଅନ୍ୟ ୫ ଜଣ ସାଙ୍ଗ ଧୂମାତ ଶାସନ ସ୍ଥିତ କେନାଲ ବନ୍ଧ ମହାପୁରୁଷଙ୍କ ନିକଟରେ ବସି ନିଶା ସେବନ କରୁଥିଲେ l ହଠାତ କୌଣସି ଘଟଣାକୁ ନେଇ ସାଙ୍ଗମାନଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା l ପରେ ଗଣ୍ଡଗୋଳ ବଢ଼ିବାରୁ ସେମାନଙ୍କ ମଧ୍ୟରୁ କେହି ଜଣେ ତ୍ରିଲୋଚନଙ୍କୁ ଏକ ଧାରୁଆ ଛୁରୀରେ ଆକ୍ରମଣ କରିଥିଲା l ଏଥିରେ ତ୍ରିଲୋଚନଙ୍କ କାନ୍ଧ, ଛାତିରେ ଗଭୀର କ୍ଷତ ସୃଷ୍ଟି ହେବା ସହ ପ୍ରବଳ ରକ୍ତସ୍ରାବ ହୋଇଥିଲା l ଛୁରୀ ମାଡ ପରେ ଅନ୍ୟ ୫ ଜଣ ଘଟଣାସ୍ଥଳରୁ ଫେରାର ହୋଇଯାଇଥିଲେ l ସ୍ଥାନୀୟ ଲୋକଙ୍କ ଉଦ୍ୟମରେ ତ୍ରିଲୋଚନଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା l ସେଠାରେ ପହଞ୍ଚିବା ବେଳକୁ ତାଙ୍କର ମୃତ୍ୟୁ ହୋଇଥିବା ଜଣାପଡ଼ିଥିଲା l ମୃତ ତ୍ରିଲୋଚନଙ୍କ ନାମରେ ବିଭିନ୍ନ ଥାନାରେ ମାମଲା ଥିବା ଜଣାପଡ଼ିଛି l ଚୋରି, ଡକାୟତି, ଅପହରଣ, ଲୁଟ୍, ଗୁଳିକାଣ୍ଡ, ବେଆଇନ ଅସ୍ତ୍ର ରଖିବା ପ୍ରଭୃତି ମାମଲାରେ ତ୍ରିଲୋଚନ ପୂର୍ବରୁ ବହୁବାର ଜେଲ୍ ମଧ୍ୟ ଯାଇଛନ୍ତି l ନିକିରାଇ ପୋଲିସ ଘଟଣାସ୍ଥଳରେ ପହଞ୍ଚି ଛାନଭିନ୍ ଚଳାଇଛି l

You Can Read :