ନୂଆଦିଲ୍ଲୀ: ସାରା ଦୁନିଆର ବିଶେଷଜ୍ଞଙ୍କୁ ଭୁଲ ପ୍ରମାଣିତ କରି ରୁଷ, ୟୁକ୍ରେନକୁ ଧ୍ୱଂସ କରିବାରେ ଲାଗିଛି । ମାସ ମାସ ପରେ ବି ଯୁଦ୍ଧ ଶେଷ ହେବାର ନାଁ ଧରୁ ନାହିଁ । ଏହାରି ଭିତରେ ୟୁକ୍ରେନର ବଡ ବ୍ୟବସାୟୀଙ୍କ ମଧ୍ୟରୁ ଜଣେ ଓଲେସ୍କି ବଡାତୁର୍ସ୍କିଙ୍କ ଘରେ ରୁଷ ବୋମା ମାଡ କରିଛି । ଓଲେସ୍କିଙ୍କ ଘର ଉପରେ ରୁଷ ଏକ ମିଶାଇଲ ମାଡ କରିଛି, ଏଥରେ ବଡାତୁର୍ସ୍କି ଏବଂ ତାଙ୍କ ପତ୍ନୀ ଉଭୟଙ୍କ ମୃତ୍ୟୁ ହୋଇଛି ।
ୟୁକ୍ରେନର ଦକ୍ଷିଣ ସହର ମାୟକୋଲାଇଭରେ ଏହି ଘଟଣା ଘଟିଛି । ସିଏନଏନ ନିଜର ଏକ ରିପୋର୍ଟ ଦାବି କରିଛି ଯେ, ୟୁକ୍ରେନର ବିଶିଷ୍ଟ ଶିଳ୍ପପତି ଏବଂ ତାଙ୍କ ପତ୍ନୀଙ୍କ ରୁଷ ମିଶାଇଲ ମାଡରେ ମୃତ୍ୟୁ ହୋଇଛି । ରୁଷ ତାଙ୍କ ଘର ଉପରେ ମିଶାଇଲ ମାଡ କରିଥିଲା, ଏହା ତାଙ୍କ ଶୋଇବା ଘରେ ମାଡ ହୋଇଥିଲା । ଏଥିରେ ଓଲେସ୍କି ଏବଂ ତାଙ୍କ ପତ୍ନୀ ରାୟସାଙ୍କ ମୃତ୍ୟୁ ହୋଇଛି । କେବଳ ଏତିକି ନୁହେଁ ଏହି ଆକ୍ରମଣରେ ବେଶି କ୍ଷତି ମଧ୍ୟ ହୋଇଛି । ୟୁକ୍ରେନର ସ୍ଥାନୀୟ ଅଧିକାରୀ ଏହି ଘଟଣା ଉପରେ ମୋହର ମାରିଛନ୍ତି।
ଓଲେସ୍କିଙ୍କୁ ମୃତ୍ୟୁ ବେଳକୁ ୭୪ ବର୍ଷ ହୋଇଥିଲା ଏବଂ ସେ ୟୁକ୍ରେନର ଦ୍ୱିତୀୟ ସବୁଠୁ ବଡ ଖାଦ୍ୟଶସ୍ୟ ରପ୍ତାନକାରୀ କମ୍ପାନି ନିବୁଲୋନଙ୍କ ପ୍ରତିଷ୍ଠାତା ଏବଂ ମାଲିକ ଥିଲେ । ତାଙ୍କର ପ୍ରାୟ ୩୪ ବିଲିୟନ ଟଙ୍କାର ସମ୍ପତ୍ତି ଥିଲା। ତାଙ୍କୁ ହିରୋ ଅଫ୍ ୟୁକ୍ରେନ ପୁରସ୍କାରରେ ସମ୍ମାନିତ କରାଯାଇଥିଲା।