ନୂଆଦିଲ୍ଲୀ ୧୮।୧୧: ସାଧାରଣତଃ ଆମେ ପେଣ୍ଟିଂ ଦେଖିଥାଉ । କିନ୍ତୁ କିଛି ଏପରି ପେଣ୍ଟିଂ ରହିଛି ଯାହାର ଦାମ୍‌ କୋଟିକୋଟି ଟଙ୍କା । ଏବେ ଏଭଳି ଏକ ପେଣ୍ଟିଂ ସାମ୍ନାକୁ ଆସିଛି । ଖାସ୍‌ କଥା ହେଉଛି ଏହି ପେଣ୍ଟିଂଟି ଏକ ଅଳିଆ ଘରେ ବନ୍ଦ ହୋଇ ପଡିଥିଲା । ଯେଉଁ ପେଣ୍ଟିଂକୁ ଅଳିଆ ବୋଲି ଭାବୁଥିଲେ ଏବେ ସେହି ପେଣ୍ଟିଂ କରିଛି ମାଲେମାଲେ ।

ଖାସ୍‌ କଥା ହେଉଛି ଏହି ପେଣ୍ଟିଂଟି ଜଣେ ୯୦ ବର୍ଷିୟ ବୃଦ୍ଧାଙ୍କୁ ମିଳିଛି । ଏହି ଘଟଣାଟି ଫ୍ରାନ୍ସରୁ ଆସିଛି । ଜଣେ ବୃଦ୍ଧ ମହିଳା ଘର ସଫା କରିବା ସମୟରେ ରୋଷେଇ ଘରୁ ତାଙ୍କୁ ମିଳିଥିଲା ଏହି ପେଣ୍ଟିଂଟି । ସେ ଏହାକୁ ଏକ ଅଳିଆ ବୋଲି ଭାବୁଥିଲେ । କିନ୍ତୁ ପରେ ଜାଣିବାକୁ ମିଳିଥିଲା ଯେ ଏହା କୌଣସି ସାମାନ୍ୟ ପେଣ୍ଟିଂ ନୁହେଁ ।ଏହା ଏକ ଐତିହ୍ୟ ପେଣ୍ଟିଂ । ଏହାର ଦାମ୍‌ ୨୫ ନିୟୁତ ଡଲାରରୁ ଅଧିକ । ଯାହା ଭାରତୀୟ ମୂଲ୍ୟରେ ପ୍ରାୟ ୨୦୮ କୋଟି ଟଙ୍କା ।

 ଏହି ପେଣ୍ଟିଂର ନାଁ ହେଉଛି ଖ୍ରୀଷ୍ଟମକ୍ । ଏହା ଇଟାଲୀୟ ଚିତ୍ରକାର ସିମାବୁଙ୍କ ଦ୍ୱାରା ନିର୍ମିତ । ଏହା ଏକ ତ୍ରୟୋଦଶ ଶତାବ୍ଦୀର ପେଣ୍ଟିଂ । ଫ୍ରାନ୍ସ ସରକାର ଏହାକୁ ଏକ ଜାତୀୟ ଐତିହ୍ୟ ଘୋଷଣା କରିଛନ୍ତି । ବର୍ତ୍ତମାନ ପେଣ୍ଟିଂଟି ଫ୍ରାନ୍ସର ପ୍ରସିଦ୍ଧ ଲୋଉଭ୍ରେ ମ୍ୟୁଜିୟମରେ ରଖାଯିବ । ରିପୋର୍ଟ ଅନୁଯାୟୀ, ୨୦୧୯ରେ ଘର ସଫା କରିବା ସମୟରେ ମହିଳାଙ୍କୁ ଏହି ପେଣ୍ଟିଂଟି ମିଳିଥିଲା ।

 ସଫେଇ କାମ କରୁଥିବା ମହିଳାଙ୍କ ବୟସ ୯୦ ବର୍ଷରୁ ଅଧିକ। ସେ ପ୍ରତିଦିନ ତାଙ୍କ ଘରେ ଝୁଲୁଥିବା ଏହି ପେଣ୍ଟିଂର ପ୍ରକୃତ ଦାମ୍ ବିଷୟରେ ଜାଣି ନଥିଲେ । ବୃଦ୍ଧ ମହିଳା ଭାବିଥିଲେ ଯେ ଏହା ରୁଷ ସହ ଜଡିତ କୌଣସି ଅଦରକାରୀ ଜିନିଷ । ସେ ଏହାକୁ ଅଳିଆଗଦାରେ ପକାଇବାକୁ ଯୋଜନା କରୁଥିଲେ । ସେହି ସମୟରେ ପେଣ୍ଟିକୁ ଚିଲିର ବିଲିୟନେୟାର ଆଲଭାରୋ ସାଇହ ବେଣ୍ଡେକ ଏବଂ ତାଙ୍କ ଅର୍ଥନୀତିଜ୍ଞ ପତ୍ନୀ ଆନା ଗୁଜମାନ ଆନ୍ଫେଲ୍ଡ ସେମାନଙ୍କ ବ୍ୟକ୍ତିଗତ ସଂଗ୍ରହ ପାଇଁ କିଣିଥିଲେ ।

ଯେତେବେଳେ ଫ୍ରାନ୍ସ ସରକାର ପେଣ୍ଟିଂକୁ ରପ୍ତାନି ଲାଇସେନ୍ସ ଦେବାକୁ ମନା କରିଦେଇଥିଲେ ସେତେବେଳେ ଉପୁଜିଥିଲା ସମସ୍ୟା । ଏହାପରେ ପେଣ୍ଟିଂକୁ ମ୍ୟୁଜିୟମ୍‌ରେ ରଖିବାକୁ ଯୋଜନା କରାଯାଇଥିଲା । କିନ୍ତୁ ଏଥିପାଇଁ ଆବଶ୍ୟକ ପାଣ୍ଠି ଏକାଠି କରିବା ପାଇଁ ସଂଗ୍ରହାଳୟ ଲାଗିଯାଇଥିଲା ୩୦ ମାସ ସମୟ ।

ତେବେ ପେଣ୍ଟିଂ ପାଇଁ ସଂଗ୍ରହାଳୟ କେତେ ଟଙ୍କା ଦେଇଛି ସେ କଥା ପ୍ରକାଶ କରାଯାଇ ନାହିଁ। ଚିତ୍ରକାର ସିମାବୁଙ୍କ ଅନ୍ୟ ଏକ ପେଣ୍ଟିଂର ନାଁ ହେଉଛି ମାଏଷ୍ଟା । ଏହା ପୂର୍ବରୁ ମାଏଷ୍ଟାକୁ ମ୍ୟୁଜିୟମ୍‌ରେ ରଖାଯାଇଛି । ବର୍ତ୍ତମାନ ମାଏଷ୍ଟାର ଚାଲିଛି ମରାମତି କାମ । ତେବେ ମାଏଷ୍ଟା ଏବଂ  ୨୦୮କୋଟି ଟଙ୍କାରେ ନିଲାମ ହେବାକୁ ଥିବା ଖ୍ରୀଷ୍ଟମକ୍ ପେଣ୍ଟିଂ  ୨୦୨୫ ବସନ୍ତ ଋତୁରେ ହେବାକୁ ଥିବା ଏକ୍ଜିବିସନ୍‌ରେ ପ୍ରଦର୍ଶନ କରାଯିବ ।

You Can Read: