ମୋହନା ୨୫/୦୭: ଜୀବନର ଶେଷ ସମୟରେ ସାଙ୍ଗ ହୋଇ ବଞ୍ଚିବାର ପ୍ରତିଜ୍ଞା କରିଛନ୍ତି ୭୬ ବର୍ଷୀୟ ରାମଚନ୍ଦ୍ର ଓ ୪୭ ବର୍ଷୀୟା ସୁରେଖା । ତଲାସିଂ ଗାଁରେ ଗତ ୫୦ ବର୍ଷ ହେବ ରହୁଛନ୍ତି ରାମଚନ୍ଦ୍ର । ୨୦ ବର୍ଷ ତଳେ ରାମଚନ୍ଦ୍ରଙ୍କୁ ଏକୁଟିଆ କରି ଛାଡି ଚାଲିଯାଇଥିଲେ ପତ୍ନୀ । ଦୁଇ ଝିଅ ବି ବାହା ହୋଇଛନ୍ତି । ଏକା ଏକା ଜୀବନ କାଟୁଥିଲେ ରାମଚନ୍ଦ୍ର ।

ଧୀରେ ଧୀରେ ରାମଚନ୍ଦ୍ରଙ୍କ ପକ୍ଷେ ଅସମ୍ଭବ ହୋଇପଡିଲା କାମ କରିବା । ଦ୍ଵିତୀୟ ବିବାହ କରିବାକୁ ମନସ୍ଥ କରିଥିଲେ ରାମଚନ୍ଦ୍ର । ସେଥିପାଇଁ ଗତ ୧୦ ବର୍ଷ ହେବ ଗଞ୍ଜାମ ଜିଲ୍ଲା କୁଲାଡ ଗାଁର ୪୭ ବର୍ଷୀୟ ସୁରେଖା ସାହୁଙ୍କ କରୁଥିଲେ ପ୍ରେମ । ହେଲେ ବିବାହକୁ ବିରୋଧ କରିଥିଲେ ରାମଚନ୍ଦ୍ରଙ୍କ ପରିବାର । ଗତ କିଛି ମାସ ତଳେ ହଠାତ୍ ଅସୁସ୍ଥ ହୋଇପଡିଲେ ରାମଚନ୍ଦ୍ର ।

ଦେଖା ଚାହାଁ କରିବାକୁ ପରିବାର ଲୋକ ବି ଆସିଲେନି । ସାହି ପଡିଶା କେହି କେବେ ଅନାଇଲେ । ଶେଷରେ ନିଜର ଭଲମନ୍ଦ ପାଇଁ ସୁରେଖାଙ୍କୁ ବିବାହ କରିବାକୁ ସ୍ଥିର କଲେ । ସବୁ ବିରୋଧକୁ ପଛରେ ପକାଇ ଜୁଲାଇ ୧୯ ତାରିଖରେ ଭଞ୍ଜନଗର କୋର୍ଟରେ ବିବାହ କରିଥିଲେ ରାମଚନ୍ଦ୍ର । ପରେ ଗାଁ ଗଣେଶ ମନ୍ଦିରରେ ରୀତିନୀତି ଅନୁସାରେ ପଡିଥିଲା ହାତଗଣ୍ଠି । ଏହି ବିବାହରେ କେବଳ ରାମଚଂଦ୍ର ଓ ସୁରେଖା ଖୁସି ନାହିଁନ୍ତି, ପାଖ ପଡିଶା ବି ଖୁସ୍ ।