ଭୁବନେଶ୍ୱର ୧୯ା୧୧ : ମଙ୍ଗଳବାର (୨୧ ତାରିଖ)ଠାରୁ ବିଧାନସଭାର ଶୀତ ଅଧିବେଶନ । ଯାହା ଡିସେମ୍ବର ୩୦ ତାରିଖ ପର୍ଯ୍ୟନ୍ତ ଚାଲିବ । ଶୀତ ଅଧିବେଶନ ବେଳେ ରାଜ୍ୟ ସରକାରଙ୍କୁ ଘେରିବା ପାଇଁ ଉଭୟ ବିରୋଧୀ ବିଜେପି ଓ କଂଗ୍ରେସ ଯୋଜନା କରୁଛନ୍ତି ।

ତେବେ ଅଧିବେଶନ ପୂର୍ବରୁ ସୋମବାର ଅପରାହ୍ନ ୪ଟା ବେଳେ ବିଜେପି ରାଜ୍ୟ କାର୍ଯ୍ୟାଳୟରେ ବିଧାୟକ ଦଳ ବୈଠକ ହେବ । ବିରୋଧୀ ବିଜେପି ଓ କଂଗ୍ରେସ ଆସନ୍ତା ଅଧିବେଶନରେ ଚାଷୀ ଆତ୍ମହତ୍ୟା, ଆଇନ ଶୃଙ୍ଖଳା ପରିସ୍ଥିତି, ସରକାରୀ ଅର୍ଥରେ ବ୍ୟାପକ ପ୍ରଚାର ପ୍ରସାର, ମୋ ଓଡ଼ିଶା-ନବୀନ ଓଡ଼ିଶାରେ ଦଳୀୟ ଚିହ୍ନର ବ୍ୟବହାର, ଶିକ୍ଷକ ଓ ଅଙ୍ଗନୱାଡ଼ି ଦିଦିଙ୍କ ଆନ୍ଦୋଳନ, ଚାଷ ଓ ଚାଷୀଙ୍କ ସମସ୍ୟାକୁ ମୁଖ୍ୟ ପ୍ରସଙ୍ଗ କରିବେ ବୋଲି ଜଣାପଡିଛି ।

ସେହିପରି ଅଧିବେଶନ ଆରମ୍ଭ ହେବା ପୂର୍ବରୁ ଶଙ୍ଖ ଭବନରେ ବିଜେଡି ବିଧାୟକ ଦଳ ବୈଠକ ବସିବ । ଏହି ବୈଠକରେ କେନ୍ଦ୍ର ବିରୋଧୀ ପ୍ରସଙ୍ଗ ଉଠାଇ ବିରୋଧୀଙ୍କୁ କିଭଳି ମୁକାବିଲା କରାଯିବ, ସେ ନେଇ ରଣନୀତି ପ୍ରସ୍ତୁତ କରାଯିବ । ବିଶେଷ କରି ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ମାନ୍ୟତା, ମହିଳା ବିଲ୍‌ ଲାଗୁ କରିବାରେ ବିଳମ୍ବ, ରେଳ କାର୍ଯ୍ୟରେ ବିଳମ୍ବ, ବିଭିନ୍ନ ବିଭାଗର ବକେୟା ଅର୍ଥ ପ୍ରଦାନରେ ବିଳମ୍ବ ଆଦି ପ୍ରସଙ୍ଗରେ ବିଜେଡି ଘେରିବ ବୋଲି ଜଣାପଡିଛି ।

ଅନ୍ୟପଟେ କଂଗ୍ରେସ ବିଧାୟକ ଦଳ ବୈଠକ ମଙ୍ଗଳବାର ଦିନ ୧୧ଟା ବେଳେ ଅନୁଷ୍ଠିତ ହେବ । ବୈଠକରେ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ଜନବିରୋଧୀ ନୀତିଗୁଡିକ ବାବଦରେ ଆଲୋଚନା କରାଯିବ । ଏ ନେଇ ବିଧାୟକ ଦଳ ବୈଠକରେ ଚୂଡାନ୍ତ ହେବ ବୋଲି ବିଧାୟକ ତାରାପ୍ରାସଦା ବାହିନୀପତି ସୂଚନା ଦେଇଛନ୍ତି ।