ମୁମ୍ବାଇ ୨୫।୦୨: ବିଶ୍ବର ମହାନ କ୍ରିକେଟର ସଚିନ୍ ତେନ୍ଦୁଲକର । ତାଙ୍କ ନାଁରେ ରହିଛି ଅନେକ ରେକର୍ଡ । କିନ୍ତୁ ସେଥିରୁ ଅନ୍ୟତମ ହେଉଛି ପୁରୁଷ ଦିନିକିଆ ଇତିହାସରେ ହାସଲ କରିଥିବ ଦ୍ବିଶତକ । ପ୍ରାୟ ସମସ୍ତଙ୍କୁ ଏହା ଜଣା । କିନ୍ତୁ ଏହା ସମ୍ପର୍ଣ୍ଣ ସତ ନୁହେଁ । ତାଙ୍କ ପୂର୍ବରୁ ଏମିତି  ଜଣେ ଖେଳାଳୀ ଅଛନ୍ତି, ଯିଏକି ଏହି ଫର୍ମାଟରେ ହାତେଇଥିଲେ ଦ୍ବିଶତକ । ସେ ହେଉଛନ୍ତି ଅଷ୍ଟ୍ରେଲିଆର ପୂର୍ବତନ ମହିଳା କ୍ରିକେଟର Belinda Clark । ଅଷ୍ଟ୍ରେଲିଆର ସବୁଠାରୁ ଖତରନାକ ବ୍ୟାଟ୍ସମ୍ୟାନ ଭାବେ ପରିଚିତ ବେଲିଣ୍ଡା ।

ସଚିନଙ୍କ ଦ୍ବିଶତକ ହାସଲ କରିବାର ୧୩ ବର୍ଷ ପୂର୍ବରୁ ଏହି ରେକର୍ଡ ହାତେଇଥିଲେ ବେଲିଣ୍ଡା । ୧୯୯୭ରେ ଡେନମାର୍କ ବିପକ୍ଷରେ ୨୧୯ ରନର ଇନିଂସ ଖେଳି ବେଲିଣ୍ଡା ଏହି ସଫଳତା ହାସଲ କରିଥିଲେ । ତାଙ୍କ ପରେ ୨୦୧୦ରେ ସଚିନ ଦକ୍ଷିଣ ଆଫ୍ରିକା ବିପକ୍ଷରେ ହାସଲ କରିଥିଲେ ଦ୍ୱିଶତକ । ପୁରୁଷ କ୍ରିକେଟରେ ଏହି ବଡ଼ ସଫଳତା ହାସଲ କରିଥିଲେ ସଚିନ । ପୁରୁଷ ଦିନିକିଆ କ୍ରିକେଟ୍ ଦ୍ୱିଶତକ ହାସଲ କରିଥିବା ପ୍ରଥମ ଖେଳାଳି ହେଲେ ସଚିନ ।

ତେବେ ଅଷ୍ଟ୍ରେଲିଆର ଏହି ମହାନ ଖେଳାଳିଙ୍କ କଥା କହିବାକୁ ଗଲେ ସେ ଟିମ ପାଇଁ ୧୫ଟି ଟେଷ୍ଟ, ୧୧୮ଟି ଦିନିକିଆ ଏବଂ ଗୋଟିଏ ଟି -20 ଇଣ୍ଟରନ୍ୟାସନାଲ ମ୍ୟାଚ୍ ଖେଳିଛନ୍ତି । ସେ ସମସ୍ତ ଫର୍ମାଟରେ ମୋଟ ୫୭୬୭ରନ୍ କରିଥିଲେ। ୨୦୦୫ରେ କ୍ରିକେଟ୍ରୁ ବିଦାୟ ନେଇଥିଲେ ବେଲିଣ୍ଡା ।

ତେବେ ଟିମ ଇଣ୍ଡିଆରେ ଏପରି ପାଞ୍ଚଜଣ ବ୍ୟାଟ୍ସମ୍ୟାନ୍ ଅଛନ୍ତି ଯେଉଁମାନେ ଦିନିକିଆରେ ଦ୍ୱିଶତକ ହାସଲ କରିଛନ୍ତି। ଏମାନଙ୍କ ମଧ୍ୟରେ ଏମିତି ଜଣେ ଖେଳାଳି ଅଛନ୍ତି ଯିଏ କି ତିନିଥର ହାସଲ କରିଛନ୍ତି ଦ୍ବିଶତକ ।

ଆସନ୍ତୁ ଜାଣିବା ସେହି ଖେଳାଳୀଙ୍କୁ-

ସଚିନ ତେନ୍ଦୁଲକର (୨୦୧୦) – ଦକ୍ଷିଣ ଆଫ୍ରିକା ବିପକ୍ଷରେ ୨୦୦ ରନ୍

ବିରେନ୍ଦର ସେହୱାଗ (୨୦୧୧) – ୱେଷ୍ଟଇଣ୍ଡିଜ୍  ବିପକ୍ଷରେ ୨୧୯ ରନ୍

ରୋହିତ ଶର୍ମା (୨୦୧୩) – ଅଷ୍ଟ୍ରେଲିଆ ବିପକ୍ଷରେ ୨୦୯ ରନ୍

ରୋହିତ ଶର୍ମା (୨୦୧୪) – ଶ୍ରୀଲଙ୍କା  ବିପକ୍ଷରେ ୨୬୪ ରନ୍

ରୋହିତ ଶର୍ମା (୨୦୧୭) – ଶ୍ରୀଲଙ୍କା ବିପକ୍ଷରେ ୨୦୮ ରନ୍

ଇଶାନ୍ କିଶାନ୍ (୨୦୨୨) – ବାଂଲାଦେଶ ବିପକ୍ଷରେ ୨୧୦ ରନ୍

ଶୁବମାନ ଗିଲ (୨୦୨୩) – ନ୍ୟୁଜିଲ୍ୟାଣ୍ଡ  ବିପକ୍ଷରେ ୨୦୮ ରନ୍