ଜୟପୁର ୧୦।୯: ରାଜସ୍ଥାନରେ ଗହଲୋଟ ସରକାର ଗୋଟିକ ପରେ ଗୋଟିଏ ଜନକଲ୍ୟାଣ ଯୋଜନା ଘୋଷଣା କରିବାରେ ଲାଗିଛନ୍ତି। ଏହି କ୍ରମରେ ଗହଲୋଟ ସରକାର ଶୁକ୍ରବାର ଅଧିସ୍ୱୀକୃତ ସାମ୍ବାଦିକଙ୍କ ପିଲାଙ୍କ ଲାଗି ସ୍କୋଲାରସିପ୍ ଘୋଷଣା କରିଛନ୍ତି। ସାମ୍ବାଦିକଙ୍କ ସନ୍ତାନସନ୍ତତିଙ୍କୁ ଏବେ ପ୍ରି ମେଟ୍ରିକ୍ ଓ ପୋଷ୍ଟମେଟ୍ରିକ ସ୍କୋଲାରସିପ୍ ମିଳିବ। ମୁଖ୍ୟମନ୍ତ୍ରୀ ଅଶୋକ ଗହଲୋଟ ଏ ନେଇ ରାଜ୍ୟ ସୂଚନା ଓ ଲୋକ ସମ୍ପର୍କ ବିଭାଗ ଦ୍ୱାରା ପ୍ରସ୍ତୁତ ଅଧିସୂଚନାକୁ ମଞ୍ଜୁର କରିଛନ୍ତି।
ମୁଖ୍ୟମନ୍ତ୍ରୀଙ୍କ ଘୋଷଣାରେ ପୋଷ୍ଟମେଟ୍ରିକ ସ୍କୋଲାରସିପ୍ ଯୋଜନାରେ ଉଚ୍ଚଶିକ୍ଷା ସଂସ୍ଥାନରେ ପଢୁଥିବା ଅଧିସ୍ୱୀକୃତ ସାମ୍ବାଦିକଙ୍କ ପିଲାଙ୍କୁ ସ୍କୋଲାରସିପ୍ ମିଳିବ। ଏଥିରେ ହଷ୍ଟେଲରେ ରହି ପଢୁଥିବା ପିଲାଙ୍କୁ ୪ ହଜାରରୁ ୧୩୫୦୦ଟଙ୍କା ପର୍ଯ୍ୟନ୍ତ ସ୍କୋଲାରସିପ୍ ଦିଆଯିବ। ସେହିପରି ଡେ ସ୍କୋଲାରଙ୍କୁ ୨୫୦୦ରୁ ୭ ହଜାର ଟଙ୍କା ସ୍କୋଲାରସିପ୍ ପାଇବେ। ପୋଷ୍ଟମାଟ୍ରିକ୍ ସ୍କୋଲାରସିପ୍କୁ ୪ଟି ବର୍ଗରେ ବଣ୍ଟା ଯାଇଛି। ସ୍ନାତକ ଓ ସ୍ନାତକୋତ୍ତର ସ୍ତରର ପ୍ରଫେସନାଲ ଡିଗ୍ରି କୋର୍ସେସ୍ ହଷ୍ଟେଲରେ ରହୁଥିବା ଛାତ୍ରଛାତ୍ରୀଙ୍କୁ ୧୩ ହଜାର ୫୦୦ ଓ ଡେ ସ୍କୋଲାର ଛାତ୍ରଛାତ୍ରୀଙ୍କୁ ୭ହଜାର ଟଙ୍କା ମିଳିବ।
{"id":682610,"sizeSlug":"full","linkDestination":"none"}
ବିଭିନ୍ନ ପ୍ରଫେସନାଲ କୋର୍ସେସ ଯେଉଁଥିରେ ଛାତ୍ରଛାତ୍ରୀଙ୍କୁ ଡିଗ୍ରି ଓ ଡିପ୍ଲୋମା ସାର୍ଟିଫିକେଟ ପ୍ରଦାନ କରାଯାଏ, ଏଥିରେ ହଷ୍ଟେଲରେ ରହି ପଡୁଥିବା ଛାତ୍ରଛାତ୍ରୀଙ୍କୁ ୯ହଜାର ୫୦୦ ଓ ଡେ ସ୍କୋଲାର ଛାତ୍ରଛାତ୍ରୀଙ୍କୁ ୬ ହଜାର ୫୦୦ ଟଙ୍କା ସ୍କୋଲାରସିପ୍ ମିଳିବ। ସେହିପରି ୧୦ମ ଶ୍ରେଣୀପରେ ପଢା ଯାଉଥିବା ବିଭିନ୍ନ ନନ୍ ଡିଗ୍ରି କୋର୍ସେସ୍ରେ ପଢୁଥିବା ଛାତ୍ରଛାତ୍ରୀ ହଷ୍ଟେଲରେ ରହୁଥିଲେ ୪ହଜାର ୫୦୦ ଟଙ୍କା ଓ ଡେ ସ୍କୋଲାର ହୋଇଥିଲେ ୨୫୦୦ ଟଙ୍କାର ବାର୍ଷିକ ଛାତ୍ରବୃତ୍ତି ପାଇବେ। ସେହିପରି ଅନ୍ୟ ସ୍ନାତକ ଓ ସ୍ନାତକୋତ୍ତର କୋର୍ସ କରୁଥିବା ଛାତ୍ରଛାତ୍ରୀ ହଷ୍ଟେଲରେ ରହୁଥିଲେ ୬ ହଜାର ଓ ଡେ ସ୍କୋଲାରଙ୍କୁ ୩ ହଜାର ଟଙ୍କାର ସ୍କୋଲାରସିପ୍ ବ୍ୟବସ୍ଥା କରାଯାଇଛି।
ପ୍ରି-ମେଟ୍ରିକ ସ୍କୋଲାରସିପ୍ରେ ସାମ୍ବାଦିକଙ୍କ ଷଷ୍ଠରୁ ୧୦ମ ଶ୍ରେଣୀରେ ପଢୁଥିବା ଛାତ୍ରୀଛାତ୍ରୀଙ୍କୁ ମଧ୍ୟ ସ୍କୋଲାରସିପ୍ ମିଳିବ। ଏଥିରେ ଅଧିକତମ ୧୦ ମାସ ଲାଗି ୧ ହଜାର ଟଙ୍କା ସ୍କୋଲାରସିପ୍ ପ୍ରଦାନ କରାଯିବ। ଉଲ୍ଲେଖଯୋଗ୍ୟ ଯେ ମୁଖ୍ୟମନ୍ତ୍ରୀ ଗହଲୋଟ ୨୦୨୨-୨୩ ବଜେଟ୍ରେ ସମାଜକୁ ସଚେତନ କରିବାରେ ଗୁରୁତ୍ୱପୂର୍ଣ୍ଣ ଦାୟିତ୍ୱ ନିର୍ବାହ କରୁଥିବା ସାମ୍ବାଦିକଙ୍କ ଭୂମିକାକୁ ଧ୍ୟାନରେ ରଖି ସେମାନଙ୍କୁ ସାମାଜିକ ସୁରକ୍ଷା ଉପଲବ୍ଧ କରିବା ଦିଗରେ ସେମାନଙ୍କ ପିଲାମାନଙ୍କୁ ସ୍କୋଲାରସିପ୍ ଦେବାକୁ ଘୋଷଣା କରିଥିଲେ।
