ନୂଆଦିଲ୍ଲୀ: ବିଶ୍ୱର ଏକ ନମ୍ୱର ଟେନିସ ଖେଳାଳିଙ୍କୁ କରୋନା ଟିକା ନ ହେବା ପୁଣି ଥରେ ମହଙ୍ଗା ପଡ଼ିଛି । ଟେନିସ ଷ୍ଟାର ନୋଭାକ ଜୋକୋଭିଚ୍ ଆମେରିକାର ଫ୍ଲୋରିଡାରେ ହେବାକୁ ଥିବା ଏଟିପି ଟୁର୍ଣ୍ଣାମେଣ୍ଟ ମିୟାମୀ ଓପନରେ ଭାଗ ନେଇପାରିବେ ନାହିଁ । ଶନିବାର ଟୁର୍ଣ୍ଣାମେଣ୍ଟର ଆୟୋଜକ ଏହି ସୂଚନା ଦେଇଛନ୍ତି । ଡୋକୋଭିଚ୍ କରୋନା ଟିକା ନେଇ ନାହାନ୍ତି, ଏହି କାରଣରୁ ତାଙ୍କୁ ଆମେରିକାରେ ପ୍ରବେଶ ଅନୁମତି ନାହିଁ । ଏହା ପୂର୍ବରୁ କାଲିଫୋର୍ଣ୍ଣିଆରେ ମାର୍ଚ୍ଚ ୬ରୁ ୧୯ ମଧ୍ୟରେ ହେବାକୁ ଥିବା ଇଣ୍ଡିୟନ ୱେଲ୍ସରୁ ମଧ୍ୟ ଜୋକୋଭିଚ୍ ନିଜ ନାଁ ଫେରାଇ ନେଇଥିଲେ ।

ଆମେରିକାର ନିୟମ ଅନୁସାରେ କରୋନା ଟିକା ନେଇ ନଥିବା ବ୍ୟକ୍ତିଙ୍କୁ ୟୁଏସରେ ପ୍ରଦେଶ ଦିଆଯିବ ନାହିଁ । ଜୋକୋଭିଚ୍ ଆମେରିକା ଅଧିକାରୀଙ୍କୁ ଦେଶରେ ପ୍ରବେଶ ପାଇଁ ସ୍ୱତନ୍ତ୍ର ଅନୁମତି ଦେବାକୁ ନିବେଦନ କରିଥିଲେ, କିନ୍ତୁ ତାଙ୍କ ଅନୁରୋଧକୁ ଅସ୍ୱୀକାର କରାଯାଇଛି । ଉଲ୍ଲେଖଯୋଗ୍ୟ ଯେ ମିୟାମୀ ଓପନ ମାର୍ଚ୍ଚ ୨୧ରୁ ଏପ୍ରିଲ ୨ ଯାଏ ଖେଳାଯିବ ।

ମିୟାମୀ ଓପନ ଟୁର୍ଣ୍ଣାମେଣ୍ଟର ନିର୍ଦ୍ଦେଶକ ଜେମ୍ସ ବ୍ଲେକ କହିଛନ୍ତି, ‘ମିୟାମୀ ଓପନ ଦୁନିଆର ପ୍ରମୁଖ ଟୁର୍ଣ୍ଣାମେଣ୍ଟ ମଧ୍ୟରୁ ଗୋଟିଏ, ଆମେ ଚାହୁଁ ଯେ ଏହି ଟୁର୍ଣ୍ଣାମେଣ୍ଟରେ ଦୁନିଆ ସର୍ବଶ୍ରେଷ୍ଠ ଖେଳାଳି ଭାଗ ନିଅନ୍ତୁ । ଆମ ହାତରେ ଯାହା ଥିଲା ଆମେ ସବୁ କରିଛୁ । ଆମେ ସରକାରଙ୍କ ସହ ଆଲୋଚନା କରିବାକୁ ପ୍ରୟାସ କରିଥିଲୁ, କିନ୍ତୁ ଜୋକୋଭିଚଙ୍କୁ ଅନୁମତି ମିଳିଲା ନାହିଁ’।

ସର୍ବିଆର ଟେନିସ ଷ୍ଟାର କରୋନା ଟିକା ନନେବା କାରଣରୁ ଗତ ବର୍ଷ ଅଷ୍ଟ୍ରେଲିଆ ଓପନ ଏବଂ ୟୁଏସ ଓପନ ଖେଳି ପାରି ନଥିଲେ । ଗତ ବର୍ଷ ଆରମ୍ଭରେ କରୋନା ସାର୍ଟିଫିକେଟ୍ ନଥିବା କାରଣରୁ ତାଙ୍କୁ ଅଷ୍ଟ୍ରେଲିଆ ଓପନ ମଝିରୁ ଦେଶରୁ ବାହାର କରି ଦିଆ ଯାଇଥିଲା । ଭ୍ୟାକ୍ସିନ ନେଇ ନଥିବା କାରଣରୁ ୟୁଏସ ଓପନ ମଧ୍ୟ ଖେଳି ପାରି ନଥିଲେ ।