ପୁରୀ ୧୬।୩: ପୁରୀ ସମ୍ରାଟ ମାର୍କେଟ୍ କମ୍ପ୍ଲେକ୍ସ ଅଗ୍ନିକାଣ୍ଡ ଘଟଣାକୁ ୮ ଦିନ ବିତିଯାଇଥିଲେ ହେଁ ଏପର୍ଯ୍ୟନ୍ତ ମାଲିକଙ୍କର ଦେଖାମିଳିନି । ସମ୍ରାଟ ମାର୍କେଟ୍ କମ୍ପ୍ଲେକ୍ସ ମାଲିକ ଶ୍ରୀମନ୍ଦିର ଜମି ହାତେଇ ଥିବାରୁ ଏନେଇ ତାଙ୍କ ବିରୋଧରେ ତହସିଲଦାର ଏନକ୍ରୋଚମେଣ୍ଟ ମାମଲା ରୁଜୁ କରିଛନ୍ତି । ଏଥିସହ କମ୍ପ୍ଲେକ୍ସ ମାଲିକଙ୍କୁ ବୁଧବାର ତହସିଲଦାର ନୋଟିସ କରିଛନ୍ତି । କେଉଁ ଆଧାରରେ କମ୍ପ୍ଲେକ୍ସ ମାଲିକ ମହାପ୍ରଭୁଙ୍କ ଜମି ଦଖଲ କରିଥିଲେ, ତାଙ୍କ ପାଖରେ କ'ଣ ପ୍ରମାଣ ପତ୍ର ରହିଛି ଏବଂ ଜମି ସମ୍ପର୍କିତ ରେକର୍ଡ ଆଦି ଆସନ୍ତା ୨୩ ତାରିଖ ସୁଦ୍ଧା ଦାଖଲ କରିବାକୁ ନୋଟିସରେ ଉଲ୍ଲେଖ ରହିଛି ।

ସମ୍ରାଟ ମାର୍କେଟ୍ କମ୍ପ୍ଲେକ୍ସ ମାଲିକ ସ୍ବର୍ଗତ ଅଚ୍ୟୁତାନନ୍ଦ ମହାନ୍ତିଙ୍କ ତିନି ପୁଅ ଚନ୍ଦ୍ରଶେଖର ମହାନ୍ତି, ସୁରେନ୍ଦ୍ର ମହାନ୍ତି ଓ ରାଜେନ୍ଦ୍ର ମହାନ୍ତି ରକ୍ଷଣାବେକ୍ଷଣ ଦାୟିତ୍ଵରେ ଥିବାରୁ ତହସିଲଦାର ସେମାନଙ୍କୁ ଗୁରୁବାର ନୋଟିସ କରିଛନ୍ତି । ତିନି ପୁଅଙ୍କ ମଧ୍ୟରେ ବଡ଼ପୁଅ ଚନ୍ଦ୍ରଶେଖର ମହାନ୍ତି ଦୋକାନୀଙ୍କଠାରୁ ସିକ୍ୟୁରିଟି ଟଙ୍କା ରଖିବା ସହ ମାସିକ ଭଡ଼ା ନେଉଥିଲେ । ତେବେ କମ୍ପ୍ଲେକ୍ସରେ ଅଗ୍ନିକାଣ୍ଡ ଘଟିବା ପରଠାରୁ ମାଲିକ କେଉଁ ଆଡେ ଫେରାର ହୋଇଯାଇଥିବା ଜଣାପଡିଛି । ମାର୍କେଟ କମ୍ପ୍ଲେକ୍ସ ଛିଡା ହୋଇଥିବା ଜମିଟି ୨୨ ଡିସିମିଲି ମହାପ୍ରଭୁଙ୍କ ନାମରେ ଥିବାବେଳେ ମାତ୍ର ୩ ଡିସିମିଲି ମାଲିକ ନାଁରେ ରହିଛି । ମହାପ୍ରଭୁଙ୍କ ଜମି କିଭଳି ଫେରି ଆସିବ ସେନେଇ ଶ୍ରୀମନ୍ଦିର ଉନ୍ନୟନ ପ୍ରଶାସକ ତହସିଲଦାରଙ୍କୁ ପୂର୍ବରୁ ଏକ ଚିଠି ଲେଖିଥିଲେ । ଏବେ ଘଟଣାର ତଦନ୍ତ ଚାଲିଥିବା ବେଳେ ଖୁବଶୀଘ୍ର ଆଇନ ଅନୁଯାୟୀ ସମସ୍ତ ପ୍ରକାର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲ୍ଲାପାଳ ସମର୍ଥ ବର୍ମା କହିଛନ୍ତି । 

{"align":"center","id":758701,"sizeSlug":"large","linkDestination":"none"}