ନୂଆଦିଲ୍ଲୀ ୧୪/୦୮: ସରିଛି ପ୍ୟାରିସ୍ ଅଲିମ୍ପିକ୍ସ ୨୦୨୪ । ଅନେକ ଦେଶର ଖେଳାଳି ହାତେଛନ୍ତି ପଦକ । ନିଜ ନିଜ ଦେଶ ପାଇଁ ଅର୍ଜିଛନ୍ତି ଗୌରବ । ସବୁ ଦେଶ ଭଳି ଉତ୍ତର କୋରିଆ ଆଥଲେଟ୍ମାନେ ଅଲିମ୍ପିକ୍ସରେ ଭାଗନେଇ ଝିତିଥିଲେ ପଦକ ।କିନ୍ତୁ, ଉତ୍ତର କୋରିଆର ଅନେକ ଆଥଲେଟ୍ ଅଛନ୍ତି, ଯେଉଁମାନେ ବିନା ପଦକରେ ଫେରିଛନ୍ତି ଦେଶ । ଯାହା ଏବେ ବଢାଇଛି ଚିନ୍ତା ।କାରଣ ଶୁଣିବାକୁ ମିଳେ କି, ଅଲିମ୍ପିକ୍ସରେ ପଦକ ଜିତିଲେ ଏକଛତ୍ରବାଦୀ ଶାସକ କିମ୍ ଜୋଙ୍ଗ ଉନ୍ କେମିତି ଦିଅନ୍ତି ଦଣ୍ଡ । ଯଦି ଏହା ସତ ତେବେ ଉତ୍ତର କୋରିଆରେ ଯେଉଁମାନେ ପଦକ ଜିତନାହାଁନ୍ତି କଣ ହେବ ସେମାନଙ୍କ ଅବସ୍ଥା । ଏଥର ଅଲିମ୍ପିକ୍ସରେ ଭାଗ ନେଇଥିଲେ ଉତ୍ତର କୋରିଆର ୧୬ ଆଥଲେଟ୍ । ତେବେ ୧୬ ପ୍ରତିଯୋଗୀ ହାତେଇଛନ୍ତି ମାତ୍ର ୬ ପଦକ । ଯେଉଁଥିରୁ ଦୁଇଟି ରୌପ୍ୟ ଥିବାବେଳେ ୪ଟି ବ୍ରୋଞ୍ଜ ପଦକ ରହିଛି । କହିବାକୁ ଗଲେ ଏଥର ଉତ୍ତର କୋରିଆ ଖାତାରେ ନାହିଁ ଗୋଟିଏ ବି ସ୍ୱର୍ଣ୍ଣ ପଦକ । ସେହିଭଳି ଆଉ ଗୋଟିଏ କଥା ହେଉଛି ଦକ୍ଷିଣ କୋରିଆର ଆଥ୍ଲେଟଙ୍କ ସହ ଫଟୋ ସେସନ । ଅର୍ଥାତ୍ ଦକ୍ଷିଣ କୋରିଆ ସହ ଉତ୍ତର କୋରିଆର ସଂପର୍କ କେମିତି ତାହା ସମସ୍ତଙ୍କୁ ଜଣା । ତଥାପି ଖେଳାଳିମାନେ ଏସବୁ ଜାଣି ବି ନିଜ ଶତ୍ରୁ କ୍ରୀଡାବିତ୍ଙ୍କ ସହ ମିଳାମିଶା ଟେନସନ୍ ବଢାଇଛି । ଏସବୁ ଦେଖିବା ପରେ କିମ୍ କେମିତି ଦେବେ ରିଆକ୍ସନ ତାକୁ ନେଇ ପଡିଲାଣି ଭାଲେଣି ।
୨୦୧୨ରେ ଲଣ୍ଡନରେ ୪ଟି ସ୍ୱର୍ଣ୍ଣ ପଦକ ଜିତିଥିଲା ଉତ୍ତର କୋରିଆ । ଆଥଲେଟ୍ମାନେ ଦେଶକୁ ଫେରିବା ପରେ ମିଳିଥିଲା ଭବ୍ୟ ସ୍ୱାଗତ ସମ୍ବର୍ଦ୍ଧନା । ଏହାପରେ ଆଗାମୀ ରିଓ ଅଲିମ୍ପିକ୍ସରେ ପାଇଁ ଦିଆଯାଇଥିଲା ଟାର୍ଗେଟ୍ । ୫ ସୁନା ଓ ଅନ୍ୟ ୧୨ ପଦକ ସହ ମୋଟ୍ ୧୭ ପଦକ ଆଣିବାକୁ ସ୍ପଷ୍ଟ କରିଥିଲେ ଶାସକ । କିନ୍ତୁ ରିଓରେ ସେତେଟା କରିସ୍ମା ଦେଖାଇପାରିନଥିଲେ ଉତ୍ତର କୋରିଆ ଆଥଲେଟ୍ମାନେ । ଯାହାର ଫଳ ସ୍ୱରୂପ ଶାସକଙ୍କ କଡ୍ଡା ଶାସନର ସମ୍ମୁଖୀନ ହୋଇଥିଲେ ଖେଳାଳି ।
ଉତ୍ତର କୋରିଆ ଶାସକ ଯେମିତି ତାଙ୍କ ଶାସନ ବି ସେମିତି । ଅଲିମ୍ପିକ୍ସରେ ପଦକ ନ ଜିତିଲେ ସେମାନଙ୍କୁ ଦିଆଯାଏନି ବିଶେଷ ସମ୍ମାନ । ସେମାନଙ୍କୁ କଠିନ ଶାରିରୀକ ପରିଶ୍ରମ କରିବାକୁ ଅନ୍ୟତ୍ର ପଠାଯାଏ । କିଛି ଦିନ ପରେ ଫେରିବାକୁ ମିଳେ ଅନୁମତି ।ଆଉ ପଦକ ଜିତିଗଲେ ଖାଲି ସମ୍ମାନ ତ ମିଳେନି ଉପହାର ବି ଭେଟି ହୁଏ । ଯେମିତିକି ୨୦୧୨ ଲଣ୍ଡନ ଗେମ୍ସରେ ସ୍ୱର୍ଣ୍ଣ ପଦକ ଜିତିଥିବା ଆଥଲେଟ୍ଙ୍କୁ ଭବ୍ୟ ସ୍ୱାଗତ ମିଳିଥିଲା । ଆଥଲେଟ୍ମାନଙ୍କୁ ନଦୀ କୂଳରେ ବିଳାସପୂର୍ଣ୍ଣ ଆପାର୍ଟମେଣ୍ଟ ଦେଇଥିଲେ କିମ ଜୋଙ୍ଗ-ଉନ୍ । ଏବେ ପ୍ୟାରିସ୍ ଫେରନ୍ତାଙ୍କ ସହ କଣ ହେବ ତା ଉପରେ ରହିଛି ସମସ୍ତଙ୍କ ନଜର ।
