ମୁମ୍ଵାଇ ୧୬।୦୪: ଜମ୍ମୁ-କାଶ୍ମୀରର ସୋପୋର ଜିଲ୍ଲା ସ୍ଥିତ ମାଲାପୋରା ଗାଁରେ ଦାନ କରାଯାଇଥିବା ଏକ ଅଣ୍ଡାରୁ ୨ ଲକ୍ଷରୁ ଅଧିକ ଟଙ୍କାର ଚାନ୍ଦା ସଂଗ୍ରହ କରାଯାଇଛି । ଗାଁରେ ମସ୍ଜିଦ ନିର୍ମାଣ ଲାଗି ଚାନ୍ଦା ସଂଗ୍ରହ କରାଯାଉଥିଲା । ଏହି ସମୟରେ ଗାଁର ଜଣେ ଯୁବକ ଏକ ଅଣ୍ଡା ଦାନ କଲେ । ଅଣ୍ଡା ସମେତ ଦାନରେ ମିଳିଥିବା କିଛି ମୂଲ୍ୟବାନ ବସ୍ତୁର ନିଲାମ ହେଲା । ଲୋକେ ବୋଲୀ ଲଗାଇ ଅଣ୍ଡାକୁ କିଣିଲେ ଏବଂ ପୁଣି ନିଲାମ କରିବା ଲାଗି ତାକୁ ମସ୍ଜିଦ ସମିତିକୁ ଫେରାଇଦେଲେ । ଏହିଭଳି ଭାବେ ୩ ଦିନ ପର୍ଯ୍ୟନ୍ତ ଅଣ୍ଡାର ନିଲାମୀ ଚାଲିଲା । ଏଥିରୁ ୨.୨୭ ଲକ୍ଷ ଟଙ୍କା ଜମା ହେଲା ।
ମସ୍ଜିଦ ସମିତି କହିଛି, ରମଜାନ ସମୟରେ ସମିତିର ଲୋକେ ଚାନ୍ଦା ସଂଗ୍ରହ କରୁଥିଲେ । ଗାଁ ଲୋକେ ଟଙ୍କା ସମେତ ଅନ୍ୟ ସାମଗ୍ରୀ ମଧ୍ୟ ଦାନ କରୁଥିଲେ । କିଛି ଲୋକ ଇଟା, ସିମେଣ୍ଟ୍, କାଠ ଆଦି ଦାନ କଲେ । ପାଣ୍ଠି ସଂଗ୍ରହ ଲାଗି ସମିତି ଜଣେ ଯୁବକଙ୍କ ଘରେ ପହଞ୍ଚିଲା । ବିଧବା ମା’ ସହ ରହୁଥିବା ଗରିବ ଯୁବକ ଜଣକ ଏକ ଅଣ୍ଡା ଦାନ କଲେ । ଏହା ବ୍ୟତୀତ ତାଙ୍କ ପାଖରେ କିଛି ନ ଥିଲା । ଇଦ୍ ଅବସରରେ ଦାନ ସାମଗ୍ରୀଗୁଡ଼ିକର ନିଲାମ ହେଲା । ଅଣ୍ଡା ଦେଇଥିବା ବ୍ୟକ୍ତିଙ୍କ ବିଷୟରେ ଜାଣିବା ପରେ ଅନେକ ଲୋକ ଅଣ୍ଡା ଲାଗି ବୋଲୀ ଲଗାଇଲେ ।
ଲଗାତାର ୨ ଦିନ ଧରି ଚାଲିଥିବା ନିଲାମରେ ଅଣ୍ଡାରୁ ପ୍ରାୟ ୧.୫୭ ଲକ୍ଷ ଟଙ୍କା ସଂଗ୍ରହ ହେଲା । ୩ୟ ଦିନ ମାଲପୋରାର ପଡ଼ୋଶୀ ଗାଁ ବାରପୋରା ବାସିନ୍ଦା ଦାନିଶ ଅହମଦ ଅଣ୍ଡାର ବୋଲୀ ଲଗାଇଲେ । ସେ ୭୦ ହଜାର ଟଙ୍କାରେ ଅଣ୍ଡା କିଣିଲେ । ଏହିଭଳି ଭାବେ ଅଣ୍ଡାରୁ ୨.୨୭ ଲକ୍ଷ ଟଙ୍କା ସଂଗ୍ରହ କରାଗଲା । ଦାନିଶ ଅଣ୍ଡା କିଣିଥିବା ୬୦ତମ ବ୍ୟକ୍ତି ଥିଲେ ।ଦାନିଶ କହିଛନ୍ତି, ଗାଁରେ ବହୁତ ବଡ଼ ମସ୍ଜିଦ ନିର୍ମାଣ ହେବ । ଏଥିପାଇଁ ଅଧିକ ଟଙ୍କା ଦରକାର । ମୁଁ ଧନୀ ନୁହେଁ, କିନ୍ତୁ ମସ୍ଜିଦ ନିର୍ମାଣ ଲାଗି କିଛି କରିବାକୁ ଚାହୁଁଥିଲି । ସେଥିପାଇଁ ୭୦ ହଜାର ଟଙ୍କାରେ ଅଣ୍ଡା କିଣିଲି ।
