ଅନୁଗୁଳ ୨୦|୭: ବର୍ଷେ କି ଦୁଇ ବର୍ଷ ନୁହେଁ,୧୦ବର୍ଷ ହେଲାଣି  ଶିକୁଳିର ବନ୍ଧନ । ଅନୁଗୁଳ ଜିଲ୍ଲା ଅର୍କିଳି ଗାଁର ଅରୁଣ ସାହୁଙ୍କୁ ହାତ ଗୋଡରେ ଶିଖୁଳି ବାନ୍ଧିଛନ୍ତି ତାଙ୍କ ପରିବାର । କାରଣ, ଅରୁଣଙ୍କର ମାନସିକ ବିକୃତି ରହିଛି । ସବୁଠୁ ବେଶି ଦୁଃଖ ହେଲା ଦାରିଦ୍ର୍ୟ ଯୋଗୁଁ, ଅରୁଣଙ୍କ ଚିକିତ୍ସା କରିବାରେ ଅସମର୍ଥ ତାଙ୍କ ପରିବାର । ତେଣୁ ଅଘଟଣ ଏଡାଇବାକୁ ଅରୁଣଙ୍କ ହାତ ଗୋଡ ବାନ୍ଧିବାକୁ ବାଧ୍ୟ ହୋଇଛନ୍ତି ତାଙ୍କ ଘର ଲୋକେ । ତେବେ ବିକାଶର ଡିଣ୍ଡିମ ପିଟାଯାଉଥିବା ବେଳେ ଏପରି ଏକ ଅସହାୟ ପରିବାରର ଦୁଃଖ ଯନ୍ତ୍ରଣା ବେଦନାଦାୟକ ନୁହେଁ କି ?

ଶିକୁଳିରେ ବନ୍ଧା ଜୀବନ ।  ବର୍ଷେ ,ଦୁଇ ବର୍ଷ ନୁହେଁ ଦଶନ୍ଧି ହେଲା ବନ୍ଧା ହୋଇଛି ତାଙ୍କ ହାତଗୋଡ । ଅନୁଗୁଳ ଅର୍କିଳି ଗାଁର ଅରୁଣ ସାହୁଙ୍କୁ ଏପରି ବାନ୍ଧି ରଖିଛନ୍ତି ତାଙ୍କ ପରିବାର । ଦଣ୍ଡ ନୁହେଁ, ଅସହାୟତା ଓ ବାଧ୍ୟବାଧ୍ୟକତାରୁ ଏପରି କରିଛନ୍ତି ସେମାନେ । କାରଣ ଅରୁଣଙ୍କର ରହିଛି ମାନସିକ ବିକୃତି । ତାଠୁ ବେଶି ଦୁଃଖ ପରିବାରର ଦାରିଦ୍ର୍ୟ । ବୁଢୀ ମାଆ, ଦୃଷ୍ଟିହୀନ ଭଉଣୀ, ସ୍ତ୍ରୀ ଓ ନାବାଳିକା ଝିଅଙ୍କୁ ନେଇ ଅରୁଣଙ୍କ ପରିବାର । ମୂଲ ଲାଗି ଚଳୁଥିବା ପରିବାର , ଯେତିକି ପାରିଲେ ଅରୁଣଙ୍କ ଚିକିତ୍ସା କରାଇଲେ । କିନ୍ତୁ ଅଧିକ ଚିକିତ୍ସା ଖର୍ଚ୍ଚର ବୋଝ ପରିବାରକୁ ଅସମ୍ଭାଳ । ଅଘଟଣ ଆଶଙ୍କାରେ ଅରୁଣଙ୍କୁ ବାନ୍ଦି ରଖିବାକୁ ବାଧ୍ୟ ହୋଇଛନ୍ତି ସେମାନେ ।

ଅରୁଣ ଙ୍କ ଲାଗି ପୁରା ପରିବାର ଚିନ୍ତାରେ । ଆସହାୟ ମାଆ । ସ୍ତ୍ରୀଙ୍କ ଆଖିରୁ ଲୁହ ଶୁଖୁନି । ସ୍ୱାମୀଙ୍କ ଅସୁସ୍ଥତା ଚିନ୍ତା ଆଉ  ଅଷ୍ଟମ ଶ୍ରେଣୀରେ ପଢୁଥିବା ଝିଅର ଭବିଷ୍ୟତ ନେଇ ଆଶଙ୍କା । ଅନିଶ୍ଚିତତାରେ  ଆଶଙ୍କିତ ଅରୁଣଙ୍କ ପରିବାର ।

ଅରୁଣଙ୍କ ଶିକୁଳି ବନ୍ଧା ଜୀବନ ଓ ତାଙ୍କ ପରିବାରର ଅବସ୍ଥା ଖବର ପାଇ, ସେସବୁର  ଅନଧ୍ୟାନ ଲାଗି ଅର୍କିଳି ଗାଁକୁ କଣିହା ବିଡିଓଙ୍କୁ ଫଠାଇଥିବା କହିଛନ୍ତି ତାଳଚେର ଉପଜିଲ୍ଲାପାଳ । ତେବେ ଅରୁଣଙ୍କ ପରିବାରକୁ ଭରଣ ପୋଷଣ ପାଇଁ ଆବଶ୍ୟକୀୟ ସାହାଯ୍ୟ ସହ ଚିକିତ୍ସା ପାଇଁ ଅର୍ଥ ଯୋଗାଇ ଦିଆଯିବ ବୋଲି  ସେ ପ୍ରତିଶ୍ରୁତି ଦେଇଛନ୍ତି । 

ସାମାଜିକ ସମାନତା ସହ ଅସହାୟ ଓ ଅବହେଳିତଙ୍କ ଲାଗି ସରକାରଙ୍କ ଯୋଜନା ଓ ଦାୟୀତ୍ୱ ରହିଛି । ତେଣୁ  ସେହି ଭିତ୍ତିରେ ସରକାରୀ ବାବୁ ତାଙ୍କ ଉତ୍ତରଦାୟିତ୍ୱ କିପରି ତୁଲାଉଛନ୍ତି ଓ କେବେ ଅରୁଣଙ୍କ ପରିବାରକୁ ସରକାରୀ ସହାୟତା ମିଳୁଛି ତାହାକୁ ଅପେକ୍ଷା  ।