ପାଟନା: ବିହାରରେ ନୀତୀଶ କୁମାରଙ୍କ ସହ ଆଉ ମେଣ୍ଟ ହେବନି। ତାଙ୍କ ଲୋକପ୍ରିୟତା ନଥିବାରୁ ବିଜେପି ପୁଣିଥରେ ମେଣ୍ଟ କରିବାର ପ୍ରଶ୍ନ ଉଠୁ ନାହିଁ ବୋଲି ରବିବାର ବିହାର ବିଜେପି ଅଧ୍ୟକ୍ଷ ସଞ୍ଜୟ ଜୈଶ୍ୱାଲ କହିଛନ୍ତି। ବିହାର ଦରଭଙ୍ଗା ଜିଲ୍ଲାରେ ପାର୍ଟିର ଦୁଇଦିନିଆ କାର୍ଯ୍ୟକାରିଣୀ ବୈଠକର ଉଦ୍‌ଯାପନୀ ଉତ୍ସବରେ ଯୋଗ ଦେଇ ଏପରି କହିଛନ୍ତି ରାଜ୍ୟ ବିଜେପି ମୁଖିଆ।   

ସେ କହିଛନ୍ତି “ମେଣ୍ଟ ନେଇ ଆମ ନେତାଙ୍କ ଭିତରେ ଯେଉଁ ଗୁଜବ ରହିଛି ସେଥିରେ ରୋକ ଲଗାଇବାକୁ କହୁଛୁ। ତେବେ ହଁ ପେଣ୍ଡୁଲମ ପରି ମୁଖ୍ୟମନ୍ତ୍ରୀଙ୍କର ଏପାଖସେପାଖ ହେବାର ଗୁଣ ରହିଛି। ହେଲେ ଆମ ପୁଣିଥରେ ତାଙ୍କ ଦ୍ୱାରା ଧୋକାର ଶିକାର ହେବୁନି।”

ଗତ ନିର୍ବାଚନରେ ବିଜେପି ସର୍ବାଧିକ ଆସନ ଜିତିଥିବା ବେଳେ ନୀତୀଶ କୁମାରଙ୍କ ଦଳ ବିଜେପି ସହ ମିଶି ସରକାର ଗଢ଼ିଥିଲେ। ହେଲେ ବିଜେପି ସହ ନ ପଟିବାରୁ ସେ ପୁଣି ଆର୍‌ଜେଡି ସହ ମିଶିଗଲେ। ଫଳରେ ରାଜ୍ୟରେ ବିଜେପି କ୍ଷମତାଚ୍ୟୁତ ହୋଇଯାଇଛି।

ଏନେଇ ଜୈଶ୍ୱାଲ କହିଛନ୍ତି “ ନୀତୀଶ କୁମାର ଆଉ ଲୋକପ୍ରିୟ ନୁହଁନ୍ତି। ଏଥିପାଇଁ ତାଙ୍କ ଦଳ ଜେଡିୟୁ ୨୦୨୦ ନିର୍ବାଚନରେ ଖରାପ ପ୍ରଦର୍ଶନ କଲା ଆମେ ଭଲ ପ୍ରଦର୍ଶନ କରିଥିଲୁ।”

ଜୈଶ୍ୱାଲା କହିଛନ୍ତି “ନିର୍ବାଚନ ପୂର୍ବରୁ ମେଣ୍ଟ ନେଇ ନିଷ୍ପତ୍ତି ହୋଇଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଉଦାରତା ଦେଖାଇ ପ୍ରତିଶ୍ରୁତିରେ ଦୃଢ଼ ରହିଥିଲେ। ହେଲେ ନୀତୀଶ ଏହାକୁ ଶେଷ କରି ବିରୋଧୀ ଦଳରେ ଯାଇ କ୍ଷମତା ଭୋଗ କରୁଛନ୍ତି। ସେ ଜଣେ ଅଭ୍ୟାସଗତ ଧୋକାବାଜ। ପ୍ରଧାନମନ୍ତ୍ରୀ ତାଙ୍କ ଉପରେ ଯେଉଁ ବିଶ୍ୱାସ ଓ ଭରସା କଲେ ନୀତୀଶ ତାର ଫାଇଦା ଉଠାଇଲେ।”

ଅନ୍ୟପଟେ ବିଜେପି ଉପରେ ଫାଟ ସୃଷ୍ଟି କରିବାର ଅଭିଯୋଗ ଲଗାଇଛନ୍ତି ଜେଡିୟୁ। ବିଜେପି ତା ପୁରୁଣା ସହଯୋଗୀ ଆର୍‌ସିପି ସିଂହଙ୍କ ସହ ମିଶି ଜେଡିୟୁରେ ଫାଟ ସୃଷ୍ଟି କରୁଥିଲା। ଚିରାଗ ପାଶ୍‌ୱାନଙ୍କ ଦଳ ଲୋକ ଜନଶକ୍ତି ପାର୍ଟି ସହ ମିଶି ବିଜେପି ହଙ୍ଗାମା କରୁଥିଲା ବୋଲି ଜେଡିୟୁ କହିଛି।  

ଏବେ ରାଜ୍ୟରେ ବିଜେପି ଆଉ ନୀତୀଶଙ୍କ ସହ ମେଣ୍ଟ କରିବନି। ପରବର୍ତି ନିର୍ବାଚନରେ ଦଳ ସଂଖ୍ୟା ଗରିଷ୍ଠତା ହାସଲ କରି ସରକାର ଗଠନ କରିବ। ଆସନ୍ତା ବର୍ଷ ଥିବା ଲୋକସଭା ନିର୍ବାଚନରେ ଦଳ ୪୦ ଆସନରୁ ୩୫ ଟି ଆସନ ହାତେଇବାକୁ ଯୋଜନା କରୁଛି ବୋଲି ଜୈଶ୍ୱାଲ କହିଛନ୍ତି।