କଟକ ୧୦।୦୯: କେବଳ ଭାରତ ନୁହେଁ ସମଗ୍ର ବିଶ୍ଵରେ ଅତ୍ୟାବଶ୍ୟକ ସାମଗ୍ରୀ ମହଙ୍ଗା ହୋଇଛି । ତେଣୁ ବଜାର ଦର ବୃଦ୍ଧିକୁ ନେଇ କେନ୍ଦ୍ର ସରକାରଙ୍କୁ ଦାୟୀ କରିବା ଠିକ୍ ନୁହେଁ ବୋଲି ସଫେଇ ଦେଇଛନ୍ତି କେନ୍ଦ୍ର ଗୃହ ରାଷ୍ଟ୍ର ମନ୍ତ୍ରୀ ନିତ୍ୟାନନ୍ଦ ରାୟ ।
ଦୁଇ ଦିନିଆ କଟକ ଗସ୍ତରେ ଆସିଥିବା ମନ୍ତ୍ରୀ ନିତ୍ୟାନନ୍ଦ ଆଜି ସାମ୍ବାଦିକ ସମ୍ମିଳନୀରେ, ମୋଦି ସରକାରଙ୍କ ଉପଲବ୍ଧି ବିଷୟରେ ସୂଚନା ଦେବା ସହ ଓଡ଼ିଶାକୁ ଆସିଥିବା କେନ୍ଦ୍ରୀୟ ଅନୁଦାନ ସମ୍ପର୍କରେ ତଥ୍ୟ ରଖିଛନ୍ତି । ଓଡ଼ିଶାର ବିକାଶ ପାଇଁ କେନ୍ଦ୍ର ସରକାର ସବୁବେଳେ ଚେଷ୍ଟିତ ଥିବା ବେଳେ ରାଜ୍ୟ ସରକାର ଏଦିଗରେ ନିଷ୍କ୍ରିୟ ରହିଛନ୍ତି ବୋଲି ଅଭିଯୋଗ ଆଣିଛନ୍ତି ମନ୍ତ୍ରୀ ନିତ୍ୟାନନ୍ଦ ରାୟ ।
ତେବେ ଏଲପିଜି ସିଲିଣ୍ଡର ମହଙ୍ଗା ହେବା ଏବଂ ଉଜ୍ଜଳା ହିତାଧିକାରୀ ମାନେ ସେଥିରୁ ମୁହଁ ଫେରାଇବା ପ୍ରସଙ୍ଗରେ କେନ୍ଦ୍ର ମନ୍ତ୍ରୀ କହିଛନ୍ତିଯେ, କୋଭିଡ୍ ଟିକା ଠାରୁ ଆରମ୍ଭ କରି ମାଳ କେନ୍ଦ୍ରୀୟ ଯୋଜନା ଦେଶବାସୀଙ୍କ ହିତ ପାଇଁ କରାଯାଇଛି । ସେ ବାବଦରେ ବିପୁଳ ଅର୍ଥରାଶି ଖର୍ଚ୍ଚ ହେଉଛି । ଯାହା ପ୍ରତି ଦେଶବାସୀ ଧ୍ୟାନ ଦେବା କଥା , ବଜାର ଦର ବୃଦ୍ଧି ଏବେ ସମଗ୍ର ବିଶ୍ୱର ସମସ୍ୟା , ତେଣୁ ଏଲପିଜି ଦର ବୃଦ୍ଧି ହେବା ବିଷୟକୁ ନେଇ ବିରୋଧୀ ମାନେ ଦେଶକୁ ଭ୍ରମିତ କରୁଛନ୍ତି ବୋଲି ପାଲଟା ଅଭିଯୋଗ ଆଣିଛନ୍ତି କେନ୍ଦ୍ର ଗୃହ ରାଷ୍ଟ୍ର ମନ୍ତ୍ରୀ ନିତ୍ୟାନନ୍ଦ ରାୟ।