ବାଲିପାଟଣା ୨୧/୦୪: ବାଲିପାଟଣା ଅଭୟ ମୁଖି ଗ୍ରାମ ରହିତସାହିରେ ବଧୁ ହତ୍ୟା । ବିବାହର ୨ ମାସ ନ ପୁରୁଣୁ ନବବଧୁକୁ ମାରି ଦେଲେ ସ୍ୱାମୀ ସହ ଶାଶୁଘର ଲୋକେ । ସୁନା ଚେନ୍ ପାଇଁ ନବବଧୁକୁ ବାରମ୍ବାର ଶାରିରୀକ ଏବଂ ମାନସିକ ନିର୍ଯାତନା ଦେଉଥିଲେ ଶାଶୁଘର ଲୋକେ । ସକାଳୁ ନବ ବଧୁକୁ ହତ୍ୟା କରାଯାଇଥିବା ଖବର ଜଣାପଡ଼ିବା ପରେ ପୋଲିସ ମୃତଦେହ ଜବତ କରି ବ୍ୟବଛେଦ ପାଇଁ ପଠାଇଛି । ଥାନାରେ ଅଭିଯୁକ୍ତ ସ୍ଵାମୀକୁ ଅଟକ ରଖିଛି ପୋଲିସ ।

ସୂଚନା ଥାଉକି, ବେଦୀରେ ଅଗ୍ନିକୁ ସାଖି ରଖି ବିବାହ କରିଥିଲେ । ସଂସାର କରିବା ପାଇଁ କେତେ ସ୍ଵପ୍ନ ଦେଖିଥିଲେ । ମାତ୍ର ବିବାହ କୁ ୨ ମାସ ନ ପୁରୁଣୁ ସ୍ତ୍ରୀକୁ ହତ୍ୟା କରିଛି ସ୍ଵାମୀ । ବାଲିପାଟଣା ଥାନା ଅଭୟମୁଖି ଗ୍ରାମ ରହିତସାହିରେ ଘଟିଛି ଏଭଳି ଏକ ଘଟଣା । ଗ୍ରାମର ଚିତନ ସେଠୀ ନିଆଳି ବଡାରୋ ଗ୍ରାମର ପବିତ୍ର ସେଠୀଙ୍କ କନ୍ୟା ମାମାଲି ସେଠୀଙ୍କୁ ବୈଦିକ ରିତି ନୀତି ଅନୁସାରେ ବିବାହ କରିଥିଲେ ।

ଦାବି ମୁତାବକ ୭୦ ହଜାର ଟଙ୍କା ସହ ଅନ୍ୟାନ୍ୟ ଜିନିଷପତ୍ର ଦେଇଥିଲେ । ଅର୍ଥାଭାବରୁ ସୁନା ଚେନ୍ ଦେଇ ପାରିନଥିଲେ ପବିତ୍ର । ଏ ନେଇ ଝିଅ ମାମାଲିଙ୍କୁ ବାରମ୍ବାର ଶାରିରୀକ ଏବଂ ମାନସିକ ନିର୍ଯାତନା ଦେଇଥିଲେ ପରିବାର ଲୋକ । ଚିତନ ଆଜି ସକାଳୁ ମାମାଲିର ମୃତ୍ୟୁ ହୋଇଥିବା ପବିତ୍ରଙ୍କୁ ଖବର ଦେଇଥିଲେ ।

ଖବର ପାଇ ଝିଅର ବାପା-ମାଆ ରହିତ ସାହିରେ ପହଁଞ୍ଚି ଥିଲେ । ସେତେ ବେଳକୁ ମାମାଲି ନିସ୍ତେଜ ଅବସ୍ଥାରେ ଖଟରେ ପଡି ରହିଥିଲା । ମାମାଲି ବେକରେ ଦଉଡି ଲଗାଇ ଆତ୍ମହତ୍ୟା କରିଥିବା ଶାଶୁଘର ଲୋକେ କହିଥିଲେ । ମାତ୍ର ଝିଅକୁ ସୁନା ଚେନ୍ ପାଇଁ ମାଡ଼ମାରି ମାରି ଦେଇଥିବା ମୃତକ ବାପା, ମାଆ ଅଭିଯୋଗ କରିଛନ୍ତି ।