ନରସିଂହପୁର,୧୫/୧୧: ବାହାଘର ପରେ କନିଆଁ ଫେରାର । ସାଙ୍ଗରେ ନେଇଗଲା ଗହଣା ଓ ସୁନା ଅଲଙ୍କାର । ଏପରି ଘଟଣା ନରସିଂହପୁର ବ୍ଲକରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ଏଠାରେ ଜଣେ ନବ ବିବାହିତା ଚତୁର୍ଥୀ ପରଦିନ ଫେରାର ହୋଇଯାଇଥିବା ଅଭିଯୋଗ ହୋଇଛି ।
ଅଭିଯୋଗ ଅନୁସାରେ, କାନପୁର ଥାନା ଅନ୍ତର୍ଗତ ଏକ ଗ୍ରାମର ଯୁବତୀଙ୍କ ସହ ନରସିଂହପୁର ଥାନା ଅନ୍ତର୍ଗତ ଏକ ଗ୍ରାମର ଜଣେ ଯୁବକଙ୍କ ବିବାହ ହୋଇଥିଲା । ବୈଦିକ ରୀତିରେ ଗତ ୯ ତାରିଖରେ ବିବାହ ଅନୁଷ୍ଠିତ ହୋଇଥିଲା ।
କିନ୍ତୁ ୧୩ ତାରିଖ ରାତିରେ ସଂପୃକ୍ତା ନବବଧୂ ପିନ୍ଧିଥିବା ସୁନା ଗହଣା ସହ କେଉଁଆଡେ ନିଖୋଜ ହୋଇଯାଇଥିବା ଜଣାପଡିଛି । ଏ ନେଇ ନରସିଂହପୁର ଥାନାରେ ବର ପକ୍ଷ ପକ୍ଷରୁ ଅଭିଯୋଗ କରାଯାଇଛି । ଏ ନେଇ ଥାନାଧିକାରୀ ବିମଳ କୁମାର ବାରିକଙ୍କୁ ପଚାରିବାରୁ ସେ ଅଭିଯୋଗ ଆସିଥିବା କହିଛନ୍ତି । ତେବେ ଘଟଣାର ତଦନ୍ତ ପରେ ସତ୍ୟାସତ୍ୟ ଜଣାପଡିବ ବୋଲି ଥାନାଧିକାରୀ କହିଛନ୍ତି ।
