vridhi excotica
ori homes
vridhi excotica
previous arrow
next arrow

Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ପ୍ରମୁଖ ଖବର
  • ଭିଭୋ ଉପରେ ଚଢଉ ନେଇ ଚୀନର ରାଗ, କହିଲା- ‘ବିଦେଶୀ କମ୍ପାନୀଙ୍କ ଇଚ୍ଛା କମିଯିବ…’
  • ||
  • ରାଜ୍ୟରେ ବଢୁଛି କରୋନା ଗ୍ରାଫ୍, ୨୪ ଘଣ୍ଟାରେ ଚିହ୍ନଟ ହେଲେ ୪୨୮ କୋଭିଡ୍ ପଜିଟିଭ୍
  • ||
  • ଦେଶରେ ବଢୁଛି ସଂକ୍ରମଣ, ୨୪ ଘଣ୍ଟାରେ ବାହାରିଲେ ୧୮୯୩୦ କରୋନା ପଜିଟିଭ୍
  • ||
  • ଇଂଲଣ୍ଡରେ ଜନ୍ମଦିନ ପାଳିଲେ ଧୋନୀ, କାଟିଲେ କେକ୍ : ପତ୍ନୀ ସାକ୍ଷୀ ସେୟାର କଲେ ଭିଡିଓ
  • ||
  • କେବଳ ସ୍ପାଇସଜେଟ୍ ନୁହେଁ, ଅନ୍ୟ କମ୍ପାନୀର ବିମାନରେ ମଧ୍ୟ ବଢୁଛି ତ୍ରୁଟି : ଯାତ୍ରୀଙ୍କ ସୁରକ୍ଷାକୁ ନେଇ ଚିନ୍ତା
  • ||
  • ୪୧ ବର୍ଷରେ ପାଦ ଦେଲେ କ୍ୟାପ୍ଟେନ୍ କୁଲ୍ : ଟିମ୍ ଇଣ୍ଡିଆକୁ ଜିତାଇଥିଲେ ଦିନିକିଆ ଓ ଟି୨୦ ବିଶ୍ୱକପ୍
  • ||
  • ଜନ୍ମଦିନରେ ଓ୍ୱିମ୍ବଲଡନ୍ ଦେଖିବାକୁ ପହଁଚିଲେ ମାହି, ସାମ୍ନାକୁ ଆସିଲା ଫଟୋ
  • ||

ପାକିସ୍ତାନ ମୁହଁରେ ଶକ୍ତ ଚାପୁଡା: ସୁରକ୍ଷା କାରଣରୁ ଖେଳିବାକୁ ମନା କଲା ନ୍ୟୁଜିଲାଣ୍ଡ ଟିମ୍, ମ୍ୟାଚ୍ ଠିକ୍ ପୂର୍ବରୁ ଗସ୍ତ ବାତିଲ୍

17/09/2021 at 3:53 PM

ରାଓ୍ଵଲପିଣ୍ଡି ୧୭।୦୯: ଆଫଗାନିସ୍ତାନରେ ତାଲିବାନ ସରକାରକୁ ବିଶ୍ଵ ସମୁଦାୟରେ ମାନ୍ୟତା ଦେବା ପାଇଁ ବ୍ୟାକୁଳ ପାକିସ୍ତାନକୁ ଶୁକ୍ରବାର ବହୁତ ବଡ ଝଟକା ଲାଗିଛି। ବିଶ୍ଵ ଦରବାରରେ ପୁଣି ଥରେ ନିନ୍ଦିତ ହୋଇଛି ପାକିସ୍ତାନ। ନ୍ୟୁଜିଲାଣ୍ଡ ଦଳ ପାକିସ୍ତାନ ବିପକ୍ଷ ଦିନିକିଆ ସିରିଜ୍‌ର ପ୍ରଥମ ମ୍ୟାଚ୍‌ରେ ଟସ୍ ପଡିବା ପୂର୍ବରୁ ପଡିଆକୁ ଓହ୍ଲାଇବାକୁ ମନା କରି ଦେଇଛି। ପୁଣି କିଛି ସମୟ ପରେ ନ୍ୟୁଜିଲାଣ୍ଡ ପାକିସ୍ତାନ ଗସ୍ତ ବାତିଲ୍ କରିଛି। ଗସ୍ତ ବାତିଲ୍ ହେବା ପାକିସ୍ତାନ ଗାଲରେ ଶକ୍ତ ଚାପୁଡା ବାଜିବା ପରି ହୋଇଛି।

ସୂତ୍ର ମୁତାବକ ସୁରକ୍ଷା କାରଣରୁ ନ୍ୟୁଜିଲାଣ୍ଡ ଦଳ ନିଜର ଗସ୍ତ ବାତିଲ୍ କରିଛି। ଦଳ ଏହି ବାବଦରେ ପାକିସ୍ତାନ କ୍ରିକେଟ୍  ବୋର୍ଡକୁ ଅବଗତ କରାଇ ଦେଇଛି। ଦଳ ବୋର୍ଡକୁ ଅବଗତ କରାଇଛି ଯେ, ପାକିସ୍ତାନରେ ସେମାନଙ୍କ ପ୍ରତି ବିପଦ ରହିଛି। ଏହି ଘଟଣା ପରେ ଇମ୍ରାନ ଖାନ ଓ ପିସିବିର ଅଧିକାରୀ ନ୍ୟୁଜିଲାଣ୍ଡ କ୍ରିକେଟ୍ ବୋର୍ଡ ଏବଂ ଖେଳାଳିଙ୍କ ସହ ଆଲୋଚନା ଆରମ୍ଭ କରି ଦେଇଛି।

ସମସ୍ତ ପ୍ରକାରର ଆଶ୍ଵାସନା ପରେ ମଧ୍ୟ ନ୍ୟୁଜିଲାଣ୍ଡ ଦଳ ପଡିଆକୁ ଓହ୍ଲାଇବାକୁ ମନା କରି ଦେଇଛି। ଏହି ଘଟଣା ପାକିସ୍ତାନ ପାଇଁ ଲଜ୍ଜାଜନକ ପରିସ୍ଥିତି ସୃଷ୍ଟି କରିଛି। ଅନ୍ତର୍ଜାତୀୟ ସ୍ତରରେ ପାକିସ୍ତାନକୁ ଥୁ ଥୁ କରିବା ଆରମ୍ଭ ହୋଇ ଯାଇଛି। ସାମାଜିକ ଗଣମାଧ୍ୟମରେ ପାକିସ୍ତାନବାସୀ ମଧ୍ୟ ଏହାକୁ ଲଜ୍ଜାଜନକ ଘଟଣା ଦର୍ଶାଇଛନ୍ତି।

ପାକିସ୍ତାନ ଓ ନ୍ୟୁଜିଲାଣ୍ଡ ମଧ୍ୟରେ ତିନୋଟି ଦିନିକିଆ ଓ ପାଞ୍ଚ ମ୍ୟାଚ୍‌ର ଟି-୨୦ ସିରିଜ୍ ଖେଳାଯିବାର ଥିଲା। ନ୍ୟୁଜିଲାଣ୍ଡର ଏହି ଗସ୍ତରେ ରାଓ୍ଵଲପିଣ୍ଡିରେ ଦିନିକିଆ ସିରିଜ୍ ଏବଂ ଲାହୋରର ଗଦାଫି ଷ୍ଟାଡିୟମରେ ଟି-୨୦ ସିରିଜ୍ ଖେଳାଯିବାର ଥିଲା। ଦୁଇ ଦଳ ମଧ୍ୟରେ ଖେଳାଯିବାକୁ ଥିବା ପ୍ରଥମ ମୁକାବିଲାର ୨୦ ମିନିଟ୍ ପୂର୍ବରୁ ସେଠାରେ ଉପଦ୍ରବର ଖବର ସାମ୍ନାକୁ ଆସିଥିଲା। ଏହା ପରେ ଖେଳାଳିଙ୍କୁ ଷ୍ଟାଡିୟମ ପହଞ୍ଚିବା ପରିବର୍ତ୍ତେ ହୋଟେଲ୍‌ରେ ରହିବାକୁ ପରାମର୍ଶ ଦିଆଯାଇଥିଲା। ଏହା ବ୍ୟତୀତ କ୍ରିକେଟ୍ ପ୍ରଶଂସକଙ୍କୁ ମଧ୍ୟ ଷ୍ଟାଡିୟମରେ ପ୍ରବେଶ ଅନୁମତି ମିଳିନଥିଲା।

ଏହି ଗସ୍ତ ବାତିଲ୍ ହେବା ପରେ ଶୀଘ୍ର କିଓ୍ଵି  ଖେଳାଳିଙ୍କୁ ପାକିସ୍ତାନରୁ ଫେରାଇ ନେବାକୁ ବନ୍ଦୋବସ୍ତ କରାଯାଉଛି। ନ୍ୟୁଜିଲାଣ୍ଡ କ୍ରିକେଟ୍‌ର ମୁଖ୍ୟ କାର୍ଯ୍ୟକାରୀ ଡେଭିଡ୍ ହ୍ଵାଇଟ୍ କହିଛନ୍ତି, ଆମକୁ ନିଜ ସରକାରଙ୍କଠୁ ଯେଉଁ ପରାମର୍ଶ ମିଳିଛି, ସେହି ଅନୁସାରେ ଗସ୍ତ ଜାରି ରଖିବା ସମ୍ଭବ ନଥିଲା। ସେ କହିଛନ୍ତି ଆମର ଏହି ନିଷ୍ପତ୍ତିରେ ପାକିସ୍ତାନକୁ ବହୁବ ବଡ ଝଟକା ଲାଗିଥିବ। ମାତ୍ର ଖେଳାଳିଙ୍କ ସୁରକ୍ଷା ଆମ ପାଇଁ ସର୍ବୋପରି।

ପିସିବି ନିଜ ବିବୃତିରେ କହିଛି ଯେ, ପାକିସ୍ତାନ କ୍ରିକେଟ୍ ବୋର୍ଡ ଏବଂ ପାକିସ୍ତାନ ସରକାର ସମସ୍ତ ଭ୍ରମଣକାରୀ ଦଳ ପାଇଁ ସୁରକ୍ଷାର ବ୍ୟାପକ  ବ୍ୟବସ୍ଥା କରିଥାଏ। ଆମେ ନ୍ୟୁଜିଲାଣ୍ଡ କ୍ରିକେଟ୍ ଦଳକୁ ମଧ୍ୟ ସୁରକ୍ଷାର ଆଶ୍ଵାସନା ଦେଇଥିଲୁ। ପାକିସ୍ତାନ ପ୍ରଧାନମନ୍ତ୍ରୀ ବ୍ୟକ୍ତିଗତସ୍ତରରେ ନ୍ୟୁଜିଲାଣ୍ଡର ପ୍ରଧାନମନ୍ତ୍ରୀଙ୍କ ସହ କଥା ହୋଇଥିଲେ। ଇମ୍ରାନ ଏହା ମଧ୍ୟ ଆଶ୍ଵସନା ଦେଇଥିଲେ ଯେ, ଆମ ପାଖରେ ସର୍ବଶ୍ରେଷ୍ଠ ଗୁଇନ୍ଦା ବିଭାଗ ରହିଛି ଏବଂ ଭ୍ରମଣକାରୀ ଦଳ ପାଇଁ କୌଣସି  ପ୍ରକାରର ସୁରକ୍ଷାରେ ବିପଦ ନାହିଁ। ପିସିବି କହିଛି, ନ୍ୟୁଜିଲାଣ୍ଡ ଦଳ ସହ ଆସିଥିବା ସୁରକ୍ଷା ଅଧିକାରୀ ମଧ୍ୟ ଏଠାକାର ସୁରକ୍ଷା ବ୍ୟବସ୍ଥାରେ ସନ୍ତୋଷ ବ୍ୟକ୍ତ କରିଥିଲେ।

   Related Posts