ନୂଆଦିଲ୍ଲୀ: ମେ’ ୨୮ ତାରିଖରେ ନୂଆ ସଂସଦ ଭବନ ଉଦଘାଟନ ହେବ । ହେଲେ ଏହା ପୂର୍ବରୁ ରାଜନୈତିକ ବୟାନବାଜି ଆରମ୍ଭ ହୋଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦଘାଟନ କରିବାକୁ ବିରୋଧ କରିଛନ୍ତି ବିରୋଧି ଦଳ ନେତା । ସଂସଦର ମୁଖ୍ୟ ରାଷ୍ଟ୍ରପତି, ତେଣୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏହାକୁ ଉଦଘାଟନ କରିବାର ଅସଲ ହକ୍ଦାର ବୋଲି ବିଭିନ୍ନ ବିପକ୍ଷ ନେତା କହିଛନ୍ତି । ଏନେଇ ଏହି ସମାରୋହକୁ ୪ ରାଜନୈତିକ ଦଳ ବୟକଟ୍ କରିଛନ୍ତି । ମାମତା ବାନାର୍ଜୀଙ୍କ ତୃଣମୂଳ କଂଗ୍ରେସ, ଦିଲ୍ଲୀର ଆପ୍ ଆଦମୀ ପାର୍ଟି, ସିପିଆଇ ଏବଂ ସିପିଏମ ଉଦଘାଟନ ସମାରୋହରେ ସାମିଲ ନହେବାକୁ ନିଷ୍ପତ୍ତି ନେଇଛନ୍ତି । କିଛି ବିରୋଧୀ ଦଳ ଏହି କାର୍ଯ୍ୟକ୍ରମ ଠାରୁ ଦୂରେଇ ରହିପାରନ୍ତି ବୋଲି କୁହାଯାଉଛି । ଏହାକୁ ନେଇ କଂଗ୍ରେସ ପକ୍ଷରୁ କୌଣସି ପ୍ରତିକ୍ରିୟା ଆସିନାହିଁ ।
ମିଡିଆ ରିପୋର୍ଟ ମୁତାବକ, କିଛି ବିରୋଧୀ ଦଳ ସଂସଦ ଭବନ ଉଦଘାଟନ ସମାରୋହରେ ସାମିଲ ନହେବାକୁ ବୟାନ ଜାରି କରିପାରନ୍ତି ବୋଲି କୁହାଯାଉଛି । ସବୁଠୁ ବଡ଼ ବିପକ୍ଷ ଦଳ କଂଗ୍ରେସ ଏହି କାର୍ଯ୍ୟକ୍ରମ ଠାରୁ ଦୂରେଇ ରହିପାରେ । ୨୦୨୦ ଡିସେମ୍ବର ମାସରେ ନୂଆ ସଂସଦ ଭବନ ଶିଳାନ୍ୟାସ ସମାରୋହ ସମୟରେ କଂଗ୍ରେସ ସମେତ ବହୁ ବିରୋଧୀ ଦଳ ସାମିଲ ହୋଇନଥିଲେ । ଆଗକୁ ୨୦୨୪ ସାଧାରଣ ନିର୍ବାଚନ ଆସୁଥିବାରୁ ଭାରତୀୟ ଜନତା ପାର୍ଟି ବିରୋଧରେ ବିପକ୍ଷ ଦଳ ସବୁ ଏକଜୁଟ୍ ହେଉଛନ୍ତି ।
ମଙ୍ଗଳବାର ଟିଏମସି ନେତାଙ୍କ ସହିତ ଆପ୍ ନେତାଙ୍କ ଆଲୋଚନା ହୋଇଛି । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରଓ୍ବାଲ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହିତ ଭେଟ କରିଛନ୍ତି । କେନ୍ଦ୍ର ସରକାରଙ୍କ ପକ୍ଷରୁ ଅଣାଯାଇଥିବା ଅଧ୍ୟାଦେଶକୁ ଅଣ ବିଜେପି ଶାସିତ ରାଜ୍ୟ ସମର୍ଥନ ନକରିବାକୁ କେଜ୍ରିଓ୍ବାଲ କହିଥିଲେ । ସେପଟେ ଟିଏମସି ସାଂସଦ ଡେରେକ ଓ ବ୍ରାୟନ କହିଛନ୍ତି, ସଂସଦ କେବଳ ଏକ ନୂଆ ଭବନ ନୁହେଁ । ଏହା ପୁରୁଣା ପରମ୍ପରା, ମୂଲ୍ୟ, ଉଦାହରଣ, ନୀତି ଓ ନିୟମର ମହଲ । ଏହା ଭାରତୀୟ ଲୋକତନ୍ତ୍ରର ଆଧାର ବୋଲି କହିଛନ୍ତି । ପିଏମ ନରେନ୍ଦ୍ର ମୋଦି ବୁଝିବା ଦରକାର ସଂସଦ ଭବନ ପ୍ରଧାନମନ୍ତ୍ରୀ ଉଦଘାଟନ କରିବା ମାନେ ରାଷ୍ଟ୍ରପତିଙ୍କୁ ଅପମାନ ସଦୃଶ ହେବ ।
ସେପଟେ ବିଜେପି ମଧ୍ୟ ପଲଟା ଜବାବ ଦେଇଛି । କେନ୍ଦ୍ରମନ୍ତ୍ରୀ ହରଦୀପ ପୁରୀ କଂଗ୍ରେସ ପ୍ରଶ୍ନ କରି କହିଛନ୍ତି, ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧି ୨୪ ଅକ୍ଟୋବର ୧୯୭୫ରେ ସଂସଦ ଭବନ କିଛି ଅଂଶକୁ କିପରି ଉଦଘାଟନ କରିଥିଲେ । ସେହିପରି ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧି ମଧ୍ୟ ସଂସଦ ପାଠାଗାରର ଶିଳାନ୍ୟାସ କିପରି କରିଥିଲେ ।
