ନୀତି ଆୟୋଗ ବୈଠକରେ ତିଆରି ହେଲା ନ୍ୟୁ-ଇଣ୍ଡିଆର ରୋଡ୍‌ମ୍ୟାପ୍‌ । ୨୦୨୪ ଭିତରେ ଭାରତର ଅର୍ଥ ବ୍ୟବସ୍ଥାକୁ ୫ ଟ୍ରିଲିୟନ ଡଲାର ପର୍ଯ୍ୟନ୍ତ ପହଞ୍ଚାଇବାକୁ ଲକ୍ଷ୍ୟ ରଖାଯାଇଛି । ଆଜି ଦିଲ୍ଲୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବସିଥିବା ନୀତି ଆୟୋଗର ପଞ୍ଚମ ବୈଠକରେ ସମସ୍ତ ରାଜ୍ୟର ମୁଖ୍ୟମନ୍ତ୍ରୀମାନେ ଯୋଗଦେଇଥିଲେ । ସେହିଭଳି ଏହି ବୈଠକରେ ଯୋଗଦେଇଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡ଼ିଶାକୁ ଫୋକସ୍‌ ଷ୍ଟେଟ୍‌ର ମାନ୍ୟତା ଏବଂ ଫୋନି ଜନିତ କ୍ଷୟକ୍ଷତିର ସହାୟତା ପାଇଁ ଦାବି କରିଛନ୍ତି । ….

ନୀତି ଆୟୋଗ ବୈଠକରେ ନ୍ୟୁ-ଇଣ୍ଡିଆର ରୋଡ୍‌ମ୍ୟାପ୍‌ । ୨୦୨୪ ଭିତରେ ଭାରତର ଅର୍ଥବ୍ୟବସ୍ଥାକୁ ୫ ଟ୍ରିଲିୟନ ଡଲାର୍‌ ପର୍ଯ୍ୟନ୍ତ ପହଞ୍ଚାଇବାକୁ ଲକ୍ଷ୍ୟ । ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଦିଲ୍ଲୀରେ ବସିଥିବା ପଞ୍ଚମ ନୀତି ଆୟୋଗ ବୈଠକରେ ଭାରତର ଅର୍ଥବ୍ୟବସ୍ଥାକୁ ସୁଦୃଢ଼ କରିବା ସହ ନୂଆ ଭାରତର ରୋଡ୍‌ମ୍ୟାପ୍‌ ପ୍ରସ୍ତୁତ ହୋଇଛି । ଏଥିସହ ମରୁଡ଼ି ଓ ରିଲିଫ, ବର୍ଷାଜଳ ସଂରକ୍ଷଣ, କୃଷି କ୍ଷେତ୍ରରେ ଢ଼ାଞ୍ଚାଗତ ପରିବର୍ତନ ଓ କୃଷି ବଜାରର ସ୍ଥିତି, ମାଓ ଉପଦୃତ ଅଂଚଳର ସୁରକ୍ଷା ଭଳି ୫ଟି ଗୁରୁତ୍ବପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା ହୋଇଛି ।

ପ୍ରଧାନମନ୍ତ୍ରୀ ମୋଦି କହିଛନ୍ତି ଭାରତର ଅର୍ଥବ୍ୟବସ୍ଥାକୁ ଯେଉଁ ସ୍ତରରେ ପହଞ୍ଚାଇବାକୁ ଲକ୍ଷ୍ୟ ରଖାଯାଇଛି ତାହା ଅତ୍ୟନ୍ତ ଚୁନୌତିପୁର୍ଣ୍ଣ । ହେଲେ ସବ୍‌କା ସାଥ୍‌- ସବ୍‌କା ବିକାଶ -ସବ୍‌କା ବିଶ୍ବାସ ମନ୍ତ୍ରକୁ ପୂରା କରିବାକୁ ନୀତି ଆୟୋଗର ଗୁରୁତ୍ବପୂର୍ଣ୍ଣ ଭୂମିକା ରହିଛି । ଆୟ ଏବଂ ରୋଜଗାର ବଢ଼ାଇବାକୁ ଏକ୍ସପୋର୍ଟ କ୍ଷେତ୍ରକୁ ଗୁରୁତ୍ବ ଦେବାକୁ ପଡ଼ିବ । ରାଜ୍ୟଗୁଡ଼ିକୁ ଏଥି ପ୍ରତି ବିଶେଷ ଧ୍ୟାନ ଦେବାକୁ ହେବ । ରାଜ୍ୟଗୁଡ଼ିକୁ ନିଜର ଆର୍ଥିକ କ୍ଷମତା ବୁଝିବାକୁ ପଡ଼ିବ ଆଉ ଜିଡିପି ଟାର୍ଗେଟ୍‌ ବଢ଼ାଇବା ଉପରେ ଜୋର୍‌ ଦେବାକୁ ହେବ ।

ନୀତି ଆୟୋଗ ବୈଠକରେ ଯୋଗଦେଇଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପୁଣି ଥରେ ଓଡ଼ିଶାକୁ ଫୋକସ ଷ୍ଟେଟ୍‌ ଭାବେ ଗୁରୁତ୍ବ ଦେବାକୁ କହିଥିଲେ । ଏଥି ସହ ଫୋନି ଜନିତ କ୍ଷୟକ୍ଷତି ପାଇଁ ସହାୟତା ଦାବି କରିଥିଲେ ।

ପରଫର୍ମାନ୍‌ସ୍‌, ଟ୍ରାନ୍‌ପରେନ୍ସି ଏବଂ ଡେଲିଭରିକୁ ଗୁରୁତ୍ବ ଦେଉଥିବା କେନ୍ଦ୍ର ସରକାର ସମସ୍ତ ଲୋକାଭିମୁଖୀ ଯୋଜନା ଗୁଡ଼ିକ କେମିତି ତଳସ୍ତରରେ ସଫଳ ରୂପାୟନ ହୋଇପାରିବ ସେ ନେଇ ଭରପୁର ଚେଷ୍ଟା କରୁଥିବା କହିଥିଲେ ପ୍ରଧାନମନ୍ତ୍ରୀ । ଏଥି ସହ ଗଭର୍ଣ୍ଣିଂ କାଉନସିଲ୍‌ ସଦସ୍ୟମାନଙ୍କୁ ଅପିଲ୍‌ କରିଥିଲେ ସେମାନେ ଏମିତି ସରକାରୀ ବ୍ୟବସ୍ଥା ପ୍ରସ୍ତୁତ କରିବା ଦରକାର ଯାହା ଲୋକଙ୍କ ପାଇଁ ଠିକ୍‌ ଢ଼ଙ୍ଗରେ କାମ କରିବ ଆଉ ଲୋକଙ୍କ ବିଶ୍ବାସ ହାସଲ କରିପାରିବ ।