ଭୁବନେଶ୍ୱର ୧୨।୭: ଶିଳ୍ପ ମାଧ୍ୟମରେ  ନିଯୁକ୍ତିକୁ ଜୋର ଦେଇ ଆସୁଛନ୍ତି ଓଡ଼ିଶା ସରକାର ।  ଏହି କ୍ରମରେ ଗତ ସୋମବାର ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନାଙ୍କ ଅଧ୍ୟକ୍ଷତାରେ ବସିଥିବା ୧୧୯ ତମ  ରାଜ୍ୟସ୍ତରୀୟ ସିଙ୍ଗିଲ୍‌ ୱିଣ୍ଡୋ ମଞ୍ଜୁରୀ କର୍ତ୍ତୃପକ୍ଷଙ୍କ  ବୈଠକରେ ୧୧ଟି ଶିଳ୍ପ ପ୍ରକଳ୍ପକୁ ମିଳିଛି ଅନୁମୋଦନ ।  ଏହା ମାଧ୍ୟମରେ ରାଜ୍ୟକୁ ପ୍ରାୟ ୩୨୬୬  କୋଟି ଟଙ୍କାର ନିବେଶ ଆସିବ ଏବଂ ୯,୧୪୬  ଲୋକଙ୍କ ପାଇଁ ନିଯୁକ୍ତି ସମ୍ଭାବନା ସୃଷ୍ଟି ହେବ ।

ମଞ୍ଜୁରି ପାଇଥିବା ପ୍ରକଳ୍ପଗୁଡ଼ିକ ଧାତବ  ଡାଉନ୍‌ଷ୍ଟ୍ରିମ୍‌ ଏବଂ ଆନୁଷଙ୍ଗିକ ଶିଳ୍ପ, ରସାୟନ,  ଖାଦ୍ୟ ପ୍ରକ୍ରିୟାକରଣ, କୃଷି ପ୍ରକ୍ରିୟାକରଣ, ପ୍ଲାଷ୍ଟିକ୍‌,  ବୟନ, ଆଇଟି ଏବଂ ଇଏସ୍‌ଡିଏମ୍‌ ଓ ଅକ୍ଷୟ  ଶକ୍ତି ଆଦି ଶିଳ୍ପ କ୍ଷେତ୍ର ସମ୍ବନ୍ଧୀୟ । ବାଲେଶ୍ୱର,  ବଲାଙ୍ଗୀର, କଳାହାଣ୍ଡି, ଖୋର୍ଦ୍ଧା ଏବଂ ଯାଜପୁର  ଜିଲ୍ଲାରେ ଏହି ପ୍ରକଳ୍ପଗୁଡ଼ିକ କାର୍ଯ୍ୟ କରିବ ।  ଅନୁମୋଦନ ପାଇଥିବା ପ୍ରକଳ୍ପଗୁଡ଼ିକ  ମଧ୍ୟରେ ନେସ୍‌ଲେ ଇଣ୍ଡିଆର ଏକ ପ୍ରକଳ୍ପ ରହିଛି ।  କମ୍ପାନି ଖୋର୍ଦ୍ଧାରେ ଏକ ଖାଦ୍ୟ ପ୍ରକ୍ରିୟାକରଣ  ୟୁନିଟ୍‌ ବସାଇବ । ଏଥିରେ ଏହା ୮୯୪ କୋଟି  ଟଙ୍କା ନିବେଶ କରିବ । ଏହା ମାଧ୍ୟମରେ  ୮୦୦ରୁ ଊର୍ଦ୍ଧ୍ବ ଲୋକଙ୍କୁ ରୋଜଗାର ମିଳିବ ।

ବୟନ ଶିଳ୍ପ କ୍ଷେତ୍ରରେ କଲର୍‌ଟୋନ୍‌  ଗାର୍ମେଣ୍ଟ୍‌ସର ଏକ ପ୍ରକଳ୍ପକୁ ଅନୁମୋଦନ ମିଳିଛି ।  ଏହା ଫାଷ୍ଟ ଷ୍ଟେପ୍‌ ବେବି ୱେର୍‌ର ସହଯୋଗୀ  ସଂସ୍ଥା । କମ୍ପାନି ଖୋର୍ଦ୍ଧାରେ ୨୦୦ କୋଟି ଟଙ୍କାରୁ  ଊଦ୍ଧ୍ୱର୍ ନିବେଶରେ ଏକ ସମନ୍ୱିତ ପୋଷାକ ଉତ୍ପାଦନ  ୟୁନିଟ୍‌ କରିବ । ଏହା ଜରିଆରେ ରାଜ୍ୟର ୪,୮୨୦ରୁ  ଅଧିକ ଲୋକଙ୍କ ପାଇଁ ନିଯୁକ୍ତି ସମ୍ଭାବନା ସୃଷ୍ଟି ହେବ ।  ରସାୟନ କ୍ଷେତ୍ରରେ ହିମାଦ୍ରି ସ୍ପେସିଆଲିଟି  କେମିକାଲ ଲିମିଟେଡ୍‌ର ଏକ ପ୍ରକଳ୍ପକୁ ମଞ୍ଜୁରି  ମିଳିଛି । କମ୍ପାନି ଯାଜପୁରରେ ୯୮୦ କୋଟି  ଟଙ୍କା ନିବେଶରେ ଓଡ଼ିଶାରେ ଏହାର ପ୍ରଥମ  କେମିକାଲ ମାନୁଫାକ୍‌ଚରିଂ ୟୁନିଟ୍‌ ସ୍ଥାପନ କରିବ ।  ସେହିଭଳି ଆଇଡିଭିବି ରିସାଇକ୍ଲିଂ  ଅପରେଶନ୍ସ, ପୁର୍ଭ ପ୍ୟାକେଜିଂ, ଆର୍‌ଡିବି ରସାୟନ୍ସ,  ଆଇଏଫ୍‌ଜିଏଲ୍‌ ରିଫ୍ରାକ୍ଟୋରିଜ୍‌, ବିକେ ଉତ୍କଳ ଷ୍ଟିଲ୍‌,  ନିସମ୍‌ କନ୍‌ସଲ୍‌ଟିଂ, ଆର୍ଡେଣ୍ଟ ଷ୍ଟିଲ୍‌, ଏନ୍‌ଆର୍‌ଟିଆର୍‌  ଗ୍ରୀନ୍‌ ଫୁଏଲ୍‌ ଆଣ୍ଡ୍‌ ଏନର୍ଜି ଆଦି କମ୍ପାନିଗୁଡ଼ିକର  ପ୍ରକଳ୍ପଗୁଡ଼ିକୁ ଅନୁମୋଦନ ମିଳିଥିବା ଜଣାପଡ଼ିଛି ।

You Can Read :