ନୂଆଦିଲ୍ଲୀ: ନେପାଳରେ ପ୍ରଧାନମନ୍ତ୍ରୀ ପୁଷ୍କ କମଲ ଦହଲ ପ୍ରଚଣ୍ଡଙ୍କ ନେତୃତ୍ୱାଧିନ ମେଣ୍ଟ ସରକାରରେ ବିବାଦ ବଢିବାରେ ଲାଗିଛି । ରାଷ୍ଟ୍ରୀୟ ସ୍ୱତନ୍ତ୍ର ପାର୍ଟି (ଆରଏସପି) ରବିବାର ମେଣ୍ଟ ସରକାରରୁ ଅଲଗା ହେବା ନେଇ ଘୋଷଣା କରିଛି । ଆରଏସପି ଅଧ୍ୟକ୍ଷ ରବି ଲାମିଛାନେଙ୍କୁ ଗୃହମନ୍ତ୍ରୀ ରୂପେ ସ୍ୱୀକାର କରିବାକୁ ପ୍ରଧାନମନ୍ତ୍ରୀ ପ୍ରଚଣ୍ଡ ମନା କରିଥିଲେ । ଏହାପରେ ମେଣ୍ଟ ସରକାରରୁ ଅଲଗା ହେବା ପାଇଁ ପାର୍ଟି ନିଷ୍ପତ୍ତି ନେଇଛି ।
ଆରଏସପିର କେନ୍ଦ୍ରୀୟ କମିଟିର ସଦସ୍ୟ ଏବଂ ସାଂସଦଙ୍କ ମଧ୍ୟରେ ହୋଇଥିବା ବୈଠକ ପରେ ଏହି ନିଷ୍ପତ୍ତି ନିଆଯାଇଛି । ୪୮ ବର୍ଷୀୟ ଲାମିଛାନେ ଗତ ବର୍ଷ ନଭେମ୍ୱରରେ ହୋଇଥିବା ନିର୍ବାଚନ ସମୟରେ ନିର୍ବାଚିତ ହୋଇଥିଲେ । ରିପୋର୍ଟ ଅନୁସାରେ, ନେପାଳ ସୁପ୍ରିମକୋର୍ଟ ଜାନୁଆରୀ ୨୭ରେ ଏକ ରାୟ ଦେଇଥିଲେ, ଯାହା ପରେ ଲାମିଛାନେଙ୍କ ସଦସ୍ୟତା ରଦ୍ଦ ହୋଇଥିଲା । ସଂସଦୀୟ ନିର୍ବାଚନ ଲଢିବା ପାଇଁ ଲାମିଛାନେ ଯେଉଁ ନାଗରିକତା ପ୍ରମାଣପତ୍ର ଦାଖଲ କରିଥିଲେ, ତାହା ଅମାନ୍ୟ ହୋଇଥିଲା ।
ସୁପ୍ରିମକୋର୍ଟଙ୍କ ନିଷ୍ପତ୍ତି ପରେ ପ୍ରଧାନମନ୍ତ୍ରୀ ପ୍ରଚଣ୍ଡ ରବି ଲାମିଛାନେଙ୍କୁ ନିଜ ମନ୍ତ୍ରିମଣ୍ଡଳରୁ ହଟାଇ ଦେଇଥିଲେ । ଏହାସହ ତାଙ୍କୁ ଆରଏସପି ଅଧ୍ୟକ୍ଷ ପଦ ମଧ୍ୟ ହରାଇବାକୁ ପଡିଥିଲା, କାରଣ ଏହି ପଦରେ ରହିବା ପାଇଁ ନେପାଳ ନାଗରିକ ହେବା ବାଧ୍ୟତାମୂଳକ ଅଟେ । ରିପୋର୍ଟ ଅନୁସାରେ ଜାନୁଆରୀ ୨୯ରେ ଲାମିଛାନେ ପୁଣି ଥରେ ନାଗରିକତା ହାସଲ କରିବା ପରେ ପିଏମ ପ୍ରଚଣ୍ଡଙ୍କୁ ଭେଟିଥିଲେ ଏବଂ ପୁଣି ମନ୍ତ୍ରୀ ପଦରେ ନିଯୁକ୍ତି ଦେବା ପାଇଁ ଦାବି କରିଥିଲେ । କିନ୍ତୁ ପ୍ରଚଣ୍ଡ ତାଙ୍କୁ କ୍ୟାବିନେଟରେ ସ୍ଥାନ ଦେବାକୁ ମନା କରି ଦେଇଥିଲେ ।
ଲାମିଛାନେ ଗତ ଡିସେମ୍ୱର ୨୬ରେ ଦେଶର ଉପ-ପ୍ରଧାନମନ୍ତ୍ରୀ ଏବଂ ଗୃହମନ୍ତ୍ରୀ ନିଯୁକ୍ତ ହୋଇଥିଲେ । ଲାମିଛାନେଙ୍କ ଆରଏସପି ଗତ ବର୍ଷ ନେପାଳରେ ହୋଇଥିବା ସଂସଦୀୟ ନିର୍ବାଚନରେ ୨୦ ଆସନ ଜିତି ସଂସଦରେ ଚତୁର୍ଥ ସବୁଠୁ ବଡ଼ ଦଳ ହୋଇଥିଲା । ଆରଏସପି ମେଣ୍ଟରୁ ଅଲଗା ହେବା ପରେ ମଧ୍ୟ ପ୍ରଧାନମନ୍ତ୍ରୀ ପ୍ରଚଣ୍ଡଙ୍କ ସରକାର ଉପରେ କୌଣସି ପ୍ରଭାବ ପଡିବ ନାହିଁ । ରିପୋର୍ଟରେ କୁହାଯାଇଛି ଯେ ଆରଏସପି ନିଜ ମନ୍ତ୍ରୀଙ୍କୁ ସରକାରରୁ ହଟାଇ ନେଇଛି, କିନ୍ତୁ ସରକାରଙ୍କ ସମର୍ଥନ କରିବା ଜାରି ରଖିବ ।
