ମୁମ୍ଵାଇ ୧୯।୦୫; ୭୭ତମ କାନ୍ ଚଳଚ୍ଚିତ୍ର ମହୋତ୍ସବରେ ପ୍ରଥମ ଥର ପାଦ ଥାପିଛନ୍ତି ଦିଲ୍ଲୀର ଫ୍ୟାଶନ୍ ଇନ୍ଫ୍ଲୁଏନ୍ସର ନାନ୍ସି ତ୍ୟାଗୀ । ସୁନ୍ଦର ଗୋଲାପି ରଙ୍ଗର ଗାଉନ୍ ପିନ୍ଧି ସେ ରେଡ୍ କାର୍ପେଟ୍କୁ ଓହ୍ଲାଇଥିଲେ । କାନ୍ରେ ପଦାର୍ପଣ କରି ସ୍ୱପ୍ନ ସତ ହୋଇଥିବା ନିଜ ଇନ୍ଷ୍ଟାଗ୍ରାମ୍ ପୋଷ୍ଟ୍ରେ ଉଲ୍ଲେଖ କରିଛନ୍ତି ନାନ୍ସି । କ୍ୟାପ୍ସନରେ ଖୁଲାସା କରିଛନ୍ତି, କାନ୍ରେ ସେ ପିନ୍ଧିଥିବା ଗାଉନ୍କୁ କୌଣସି ଡିଜାଇନର୍ ତିଆରି କରିନାହାନ୍ତି । ବରଂ ଏହାର ପ୍ରସ୍ତୁତକର୍ତ୍ତା ସେ ନିଜେ ।
ପ୍ରଥମ ଥର କାନ୍ରେ ପିନ୍ଧିବା ପାଇଁ ଏହି ଗାଉନ୍ ତିଆରିରେ ନିଜର ହୃଦୟ ଓ ଆତ୍ମାକୁ ସେ ସମ୍ପୂର୍ଣ୍ଣ ରୂପେ ସମର୍ପଣ କରିଥିଲେ ବୋଲି କହିଛନ୍ତି । ଗାଉନ୍ ତିଆରି ଲାଗି ତାଙ୍କୁ ୩୦ ଦିନ ଲାଗିଥିଲା । କାନ୍ର ସମ୍ମାନାସ୍ପଦ ରେଡ୍ କାର୍ପେଟ୍ରେ ଚାଲିବାର ଫଟୋ ସେ ସୋସିଆଲ ମିଡିଆରେ ସେୟାର କରିଛନ୍ତି ।
ଏହାକୁ ନିଜ ଜୀବନର ସବୁଠୁ ମୂଲ୍ୟବାନ ମୁହୂର୍ତ୍ତ ବୋଲି ସେ କହିଛନ୍ତି । ନାନ୍ସିଙ୍କ ଗାଉନ୍ରେ ୧୦୦୦ ମିଟର କପଡ଼ା ଲାଗିଛି । ଏହାର ଓଜନ ୨୦ କିଲୋ । ତାଙ୍କର ଏହି ସୃଜନକୁ ପସନ୍ଦ କରିଥିବାରୁ ସେ ସମସ୍ତଙ୍କୁ ଧନ୍ୟବାଦ ଦେଇଛନ୍ତି । ବଲିଉଡ୍ର ଅନେକ ସେଲିବ୍ରିଟି ନାନ୍ସିଙ୍କ ତିଆରି ପୋଷାକକୁ ପ୍ରଶଂସା କରି ପୋଷ୍ଟ୍ ଶେୟାର କରିଛନ୍ତି ।
