ନୂଆଦିଲ୍ଲୀ ୨୬।୦୫: ବିଶ୍ବରେ ଅନେକ ଗଛ ଦେଖିଥିବେ ଏବଂ ତା ବିଷୟରେ ଶୁଣିଥିବେ । ଏପରି ଅନେକ ଗଛ ରହିଛି ଯାହା ହଜାର ହଜାର ବର୍ଷ ଧରି ଜୀବତ ରହିଛି । କିନ୍ତୁ ଏପରି ଗଛ ବିଷୟର ଶୁଣିଛନ୍ତି କି ଯାହା ଜଳବାୟୁରେ ଲଗାତାର ପରିବର୍ତ୍ତନରେ ଏଥିରେ କୌଣସି ପରିବର୍ତ୍ତନ ହୋଇନାହିଁ । ଅନେକ ଏହାକୁ ଚମତ୍କାରି ଗଛ ଭାବେ ବିଚାର କରିଥାନ୍ତି ।  କିଛି ଲୋକ ଏହାକୁ ଡାଇନୋସର ସହ ସମ୍ପର୍କ ଥିବା କୁହନ୍ତି ।

ଦୁନିଆରେ ମିଳୁଥିବା ଏହି ହଳଦିଆ ରଙ୍ଗର ଗଛକୁ ଜିକଙ୍ଗୋ ବାଇଲୋବା ଟ୍ରି କିମ୍ବା ଜିଙ୍କୋ ଟ୍ରି କୁହାଯାଇଥାଏ । ଗୋଟିଏ ଜିଙ୍କୋ ଗଛର ବୟସ ୩୦୦୦ ବର୍ଷ ବୋଲି କୁହାଯାଇଥାଏ । ବିଶ୍ୱର ସର୍ବ ପୂରାତନ ଗଛ ଭାବେ ଏହା ପରିଚିତ । ଏହି ଗଛ ଚୀନରେ ଜନ୍ମ ହୋଇଥିବା ବିଶ୍ୱାସ କରାଯାଏ । ଏହାକୁ ଚୀନର ରାଷ୍ଟ୍ରିୟ ଗଛ ଭାବେ ପରିଚୟ  କରାଯାଇଛି । ଚୀନର ଏକ ବୌଦ୍ଧ ମନ୍ଦିରରେ ଏହି ଗଛ ଦେଖାଯାଇଥାଏ । ସ୍ଥାନୀୟ ଲୋକଙ୍କ କହିବା ଅନୁସାରେ ଏହି ଗଛରୁ ସେମାନଙ୍କୁ ଶକ୍ତି ମିଳିଥାଏ । ଏଠାରେ ଥିବା ଜିଙ୍କୋ ଗଛର ବୟସ ୧୪୦୦ ବର୍ଷରୁ ଅଧିକ ପୁରୁଣା ।

ବୈଜ୍ଞାନିକଙ୍କ ଅନୁଯାୟୀ, ଜିଙ୍କୋ ଗଛରେ ୨୯ କୋଟି ବର୍ଷ ଧରି କୌଣସି ପରିବର୍ତ୍ତନ ହୋଇନାହିଁ । ଜିଙ୍କୋ ଗଛର ଚେର ବହୁତ ମଜବୁତ । ଗଛର ଉପର ସ୍ତର ନଷ୍ଟ ହୋଇ ଯାଇଥିଲେ ମଧ୍ୟ କିଛି ସମୟ ପରେ ଏହି ଗଛ ପୁଣି ଜନ୍ମ ନେବା ଆରମ୍ଭ କରିଥାଏ । ଏହି ଗଛ ଦେଖିବାକୁ ଯେତିକି ସୁନ୍ଦର, ଏହି ଗଛର ପତ୍ରରେ ରହିଛି ଅନେକ ଔଷଧୀୟ ଗୁଣ । ଜିଙ୍କୋ ଗଛର ପତ୍ର ଆଖି ଏବଂ ମସ୍ତିଷ୍କ ସହ ଜଡ଼ିତ ରୋଗର ସମସ୍ୟାକୁ ଦୂର କରିଥାଏ । ଏହାର ବ୍ୟବହାର ଆୟୁର୍ବେଦରେ ଅଧିକ ହୋଇଥାଏ । କିନ୍ତୁ ଏହାର ଅତ୍ୟଧିକ ବ୍ୟବହାର ସ୍ୱାସ୍ଥ୍ୟ ପାଇଁ ଉଚିତ ନୁହେଁ ବୋଲି ବିଶେଷଜ୍ଞମାନେ ମତ ଦିଅନ୍ତି ।