ନବରଙ୍ଗପୁର ୧୫।୦୩ : ନବରଙ୍ଗପୁର ଜିଲ୍ଲାରେ ଖାତିଗୁଡ଼ା ଥାନା ଅଞ୍ଚଳରେ ଚାଞ୍ଚଲ୍ୟ । ସୈତାନ ସାଜିଲେ ଆଶା କର୍ମୀ । ଚିକିତ୍ସା କରିବାକୁ ନେବା ବାହାନାରେ ଗର୍ଭବତୀ ମହିଳାଙ୍କୁ ନିଜ ସ୍ୱାମୀଙ୍କ ଦ୍ୱାରା ଦୁଷ୍କର୍ମ ଅଭିଯୋଗ ଆସିଛି । ସେହି ସମୟରେ ଭିଡିଓ ମଧ୍ୟ ଉତ୍ତୋଳନ କରି ଭାଇରାଲ କରିଛନ୍ତି ଆଶା କର୍ମୀ । ଘଟଣାକୁ ନେଇ ଗର୍ଭବତୀଙ୍କ ପରିବାର ପକ୍ଷରୁ ଥାନାରେ ଅଭିଯୋଗ ପରେ ପୋଲିସ ତନାଘନା ଆରମ୍ଭ କରିଛି । ଆଶା କର୍ମୀ ଏବଂ ତାଙ୍କ ସ୍ୱାମୀଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ ।

ଖାତିଗୁଡ଼ା ଥାନାରେ ହୋଇଥିବା ଅଭିଯୋଗ ଆନୁସାରେ, ଜଣେ ପାଞ୍ଚ ମାସର ଗର୍ଭବତୀ ମହିଳାଙ୍କୁ ଚିକିତ୍ସା କରିଇବା ବାହାନାରେ ନବରଙ୍ଗପୁର ଜିଲ୍ଲା ଚିକିତ୍ସାଳୟକୁ ନିଜ ପୁଅ ସହିତ ନେଉଥିଲେ ଆଶାକର୍ମୀ । ପୂର୍ବରୁ ଏକ ଛକରେ ଆଶା କର୍ମୀଙ୍କ ସ୍ୱାମୀ ଅପେକ୍ଷା କରିଥିଲେ । ପରେ ତାଙ୍କ ସ୍ୱାମୀଙ୍କ ସହ ଆଶା କର୍ମୀ ଗର୍ଭବତୀ ମହିଳାଙ୍କୁ ନେଇ ନବରଙ୍ଗପୁର ମେଡିକାଲ ଅଭିମୁଖେ ବାହାରିଥିଲେ । କିନ୍ତୁ ମେଡିକାଲ ନନେଇ ସହରରେ ଥିବା ଏକ ଘରକୁ ନେଇଥିଲେ । ସେଠାରେ ଆଶା କର୍ମୀଙ୍କ ସ୍ୱାମୀ ଉକ୍ତ ଗର୍ଭବତୀଙ୍କୁ ଦୁଷ୍କର୍ମ କରିଥିଲେ । ସେଠାରେ ଆଶା କର୍ମୀ ନିଜ ସ୍ୱାମୀଙ୍କ କଳାକାରନାମାକୁ ନିଜ ମୋବାଇଲ୍‌ରେ ଭିଡିଓ କରିଥିଲେ । ପରେ ଯଦି ଏହି ଘଟଣାକୁ ପରିବାର ଲୋକଙ୍କ ସମ୍ମୁଖରେ ପ୍ରଘଟ କରନ୍ତି । ତେବେ ଭିଡିଓ ଭାଇରାଲ କରିବାର ଧମକ ମଧ୍ୟ ଦେଇଥିଲେ ସ୍ୱାମୀ-ସ୍ତ୍ରୀ ।   

ତେବେ କିଛି ଦିନ ପରେ ଗର୍ଭବତୀ ଜଣଙ୍କ ଆତ୍ମହତ୍ୟା ପାଇଁ ଉଦ୍ୟମ କରିବାରୁ ପରିବାର ଲୋକଙ୍କ ଆଗରେ ସମସ୍ତ ଘଟଣା ବାବଦରେ ଜଣାଇଥିଲେ । ଏନେଇ ପରିବାର ଲୋକ ଖାତିଗୁଡ଼ା ଥାନାରେ ଏତଲା ଦେଇଥିଲେ । ଅଭିଯୋଗକୁ ଆଧାର କରି ପ୍ରଥମେ ପୀଡିତାଙ୍କୁ ମୁଖ୍ୟ ଚିକିତ୍ସାଳୟକୁ ଆଣି ଡାକ୍ତରୀ ମାଇନା କରାଯିବା ସହ ଅଭିଯୁକ୍ତ ସ୍ୱାମୀ-ସ୍ତ୍ରୀଙ୍କୁ ଗିରଫ କରି କୋର୍ଟ ଚାଲାଣ କରିଛି ଖାତିଗୁଡ଼ା ପୋଲିସ ।