ନୂଆଦିଲ୍ଲୀ, ୧୯/୦୩: ଗତ କିଛି ଦିନରୁ ଗ୍ୟାଙ୍ଗଷ୍ଟର ଲରେନ୍ସର ବିଶ୍ନୋଇର ଏକ ସାକ୍ଷାତକାର ଖୁବ୍‌ ଚର୍ଚ୍ଚାରେ ରହିଛି। ଏଥିରେ ଲରେନ୍ସ ସଲମାନଙ୍କୁ ମାରିବାକୁ ଧମକ ମଧ୍ୟ ଦେଇଥିଲା। ଏବେ ଖବର ଆସିଛି ଯେ ସଲମାନଙ୍କ ଧମକପୂର୍ଣ୍ଣ ଇମେଲ ଆସିଛି। ଯାହାକୁ ନେଇ ସଲମାନଙ୍କ ମ୍ୟାନେଜର ମୁମ୍ବାଇ ବାନ୍ଦ୍ରା ପୋଲିସ୍‌ ଥାନାରେ ଅଭିଯୋଗ କରିଛନ୍ତି। ପୋଲିସ ଲରେନ୍ସ ବିଷ୍ଣୋଇ, ଗୋଲ୍ଡି ବରାଡ଼ଙ୍କ ବିରୋଧରେ ମାମଲା ରୁଜୁ କରିଛି।

ସୂଚନା ଅନୁଯାୟୀ, ବାନ୍ଦ୍ରା ପୋଲିସ୍‌ ଆଇପିସି ଧାରା ୫୦୬(୨), ୧୨୦(ବି) ଏବଂ ୩୪ ଅନୁଯାୟୀ ମାମଲା ରୁଜୁ କରିଛି ଏବଂ ଘର ବାହାରେ ସୁରକ୍ଷା ବଢ଼ାଇଛି। ଶନିବାର ସଲମାନ ଖାନ୍‌ଙ୍କ ଅଫିସ୍‌କୁ ଇ-ମେଲ୍‌ ଆସିଥିଲା। ଯାହାପରେ ସଲମାନଙ୍କ ମ୍ୟାନେଜର ପୋଲିସ୍‌ରେ ଅଭିଯୋଗ କରିଥିଲେ ଏବଂ ପୋଲିସ୍‌ ଗ୍ୟାଙ୍ଗଷ୍ଟର ଲରେନ୍ସ ବିଶ୍ନୋଇ, ଗୋଲ୍ଡି ବରାଡ଼ ଏବଂ ରୋହିତ ଗର୍ଗଙ୍କ ବିରୋଧରେ ମାମଲା ରୁଜୁ କରିଥିଲା।

ସୂଚନାଥାଉ, ଜେଲରେ ଥିବା ଲରେନ୍ସ ନିକଟରେ ଏକ ଟିଭି ସାକ୍ଷାତକାର ଦେଇଥିଲା। କଳା ହରିଣ ମାମଲାକୁ ନେଇ ଲରେନ୍ସ ବିଶ୍ନୋଇ କହିଥିଲା ସଲମାନ କ୍ଷମା ମାଗନ୍ତୁ। ଲରେନ୍ସ ଏହା ମଧ୍ୟ କହିଥିଲା ଯେ ଯଦି ସେ କ୍ଷମା ମାଗୁନାହାନ୍ତି ତେବେ ତାଙ୍କର ଅହଙ୍କାର ଭାଙ୍ଗିଦିଆଯିବ। ଆଉ ଏବେ ଅଭିନେତାଙ୍କୁ ଧମକପୂର୍ଣ୍ଣ ଇ-ମେଲ୍‌ ଆସିବା ଖବର ପୁଣି ଥରେ ଚର୍ଚ୍ଚା​ର କାରଣ ପାଲଟିଛି।