ସମ୍ୱଲପୁର ୦୨/୦୯: ସମ୍ବଲପୁର ସହରରେ ଡ୍ରିଙ୍କ ଫ୍ରମ୍ ଟ୍ୟାପ ମିଶନ ବାଟବଣା । ସହର ସାରା ଆସୁଛି ଗୋଳିଆ ପାଣି । ପିଇବା ଦୂରର କଥା, ଗାଧୋଇବା ଯୋଗ୍ୟ ନୁହେଁ ବୋଲି ଲୋକେ ଅଭିଯୋଗ କରିବା ସହ ଜନସ୍ୱାସ୍ଥ୍ୟ ବିଭାଗକୁ ଦୋଷ ଲଦିଛନ୍ତି । ପାଣିର ରଙ୍ଗ ସମ୍ପୂର୍ଣ୍ଣ ଧୂସର ଦେଖା ଯାଉଥିବା ଅଭିଯୋଗ ହୋଇଛି । ସହରରେ ପାଇପ ଯୋଗେ ଧୂସର ତଥା ଗୋଳିଆ ପାଣି ଘରକୁ ଆସୁଛି ।

ସମ୍ବଲପୁର ସହର ଧନୁପାଲି, ଗୋବିନ୍ଦତୋଲା, ସାକ୍ଷୀପଡା, ବିନାଖଣ୍ଡିରେ ଆଜି ଏପରି ଗୋଳିଆ ପାଣି ଆସୁଥିବା ଦେଖି ଲୋକେ ଭୟଭୀତ ଅଛନ୍ତି । ପିଏଚ୍‌ଡି ବିଭାଗ ପକ୍ଷରୁ ଯୋଗାଇ ଦିଆଯାଉଥିବା ପାଣିର ଅବସ୍ଥା ଅତି ସାଂଘାତିକ । ମଣିଷ ଛାଡନ୍ତୁ ଗାଇଗୋରୁ ମଧ୍ୟ ପିଇବା ଯୋଗ୍ୟ ନୁହେ ବୋଲି ସ୍ଥାନୀୟ ଲୋକେ ଅଭିଯୋଗ କରିବା ସହ ଘରେ ଘରେ ଫିଲଟର ଲଗାଇବା ପାଇଁ ବାଧ୍ୟ କରୁଥିବା ଅଭିଯୋଗ ହୋଇଛି ।

ତେବେ କେବଳ ଗୋଳିଆ ପାଣି ଆସୁଛି ତାହା ନୁହେଁ । ବିଭିନ୍ନ ସ୍ଥାନରେ ପାଇପ ଫାଟି ପାଣି ରାସ୍ତାରେ ବହୁଛି । ରାସ୍ତାର ଧୂଳି ମଳି ସେହି ପାଣିରେ ମିଶି ପୁଣି ଘରକୁ ଘର ସପ୍ଲାଇ ହେଉଛି । ଯଦି ନୂଆ ପାଇପ୍ ବିଛା ଯାଇଥାନ୍ତା ତେବେ ଏଭଳି ଗୋଳିଆ ପାଣି ଆସନ୍ତା ନାହିଁ ବୋଲି କୁହାଯାଇଛି । ଏହାର ଏକ ଉଚ୍ଚସ୍ତରୀୟ ତଦନ୍ତ ଦାବି ହୋଇଛି । ତେବେ ଘଟଣା ନେଇ ଜନସ୍ବାସ୍ଥ୍ୟ ବିଭାଗର ନିର୍ବାହୀ ଯନ୍ତ୍ରୀଙ୍କ ପ୍ରତିକ୍ରିୟା ମିଳି ପାରିନାହିଁ ।