ନୂଆଦିଲ୍ଲୀ, ୧୧|୧୨: ଆଇପିଏଲ-୨୦୨୦ରେ ଚେନ୍ନାଇ ସୁପର କିଙ୍ଗସର ପ୍ରଦର୍ଶନ ନୈରାଶ୍ୟଜନକ ଥିଲା । ଦଳ ଆଇପିଏଲ ଇତିହାସରେ ପ୍ରଥମ ଥର ପାଇଁ ଲିଗ୍ ପର୍ଯ୍ୟାୟରୁ ବିଦା ହୋଇଥିଲା । କହିବାକୁ ଗଲେ ଗତ ଆଇପିଏଲ ଚେନ୍ନାଇ ପାଇଁ କୌଣସି ଦୁଃସ୍ୱପ୍ନଠୁ କମ୍ ନୁହେଁ । କିନ୍ତୁ ଦଳର ଅଧିନାୟକ ମହେନ୍ଦ୍ର ସିଂ ଧୋନୀ ଆଇପିଏଲରେ ସବୁଠାରୁ ଦାମୀ ଖେଳାଳି ଅଟନ୍ତି । ଆଜିଯାଏଁ ଏହି ଟୁର୍ଣ୍ଣାମେଣ୍ଟ ଖେଳି ସେ ସବୁଠାରୁ ଅଧିକ ଟଙ୍କା ଆୟ କରିଛନ୍ତି ।
ଇନସାଇଡ୍ ସ୍ପୋର୍ଟସର ରିପୋର୍ଟ ଅନୁସାରେ, ଧୋନୀ ଆଇପିଏଲ ଖେଳିବା ବେଳେ ପ୍ରାୟ ୧୩୭ କୋଟି ଟଙ୍କା ଆୟ କରିଛନ୍ତି । ଏହି ଅର୍ଥରେ ପୁରସ୍କାର ରାଶିକୁ ସାମିଲ କରାଯାଇ ନାହିଁ । ସେ ଆଇପିଏଲ ୨୦୦୮ରେ ଚେନ୍ନାଇ ଦଳରେ ସାମିଲ ହୋଇଥିଲେ । ସେହି ସମୟରେ ତାଙ୍କୁ ୧୫ ଲକ୍ଷ ଟଙ୍କାରେ ଦଳ କିଣିଥିଲା । ପରେ ସେ ଅଧିନାୟକ ହୋଇଥିଲେ ।
ତାଙ୍କ ନେତୃତ୍ୱରେ ଚେନ୍ନାଇ ୩ ଥର ଚାମ୍ପିଅନ ହୋଇଛି । ଏହାସହ ସେ ସବୁଠାରୁ ଅଧିକ ଲୋକପ୍ରିୟ ଖେଳାଳି ଅଟନ୍ତି । ଆହୁରି ମଧ୍ୟ ତାଙ୍କ ଆୟ ମଧ୍ୟ ଅଧିକ । ୨୦୧୧ରୁ ୨୦୧୩ ମଧ୍ୟରେ ସେ ବାର୍ଷିକ ପ୍ରାୟ ୮.୨ କୋଟି ଟଙ୍କା ଆୟ କରୁଥିଲେ । ୨୦୧୪ ଓ ୨୦୧୫ରେ ୧୨.୫ କୋଟି ଟଙ୍କା ଆୟ କରିଥିଲେ । ସେହିପରି ୨୦୧୮ରୁ ୨୦୨୦ରେ ସେ ୪୫ କୋଟି ଟଙ୍କା ଆୟ କରିଥିଲେ ।
ଏହି ତାଲିକାରେ ଦ୍ୱିତୀୟ ସ୍ଥାନରେ ଅଛନ୍ତି ରୋହିତ ଶର୍ମା । ସେ ୧୩୧ ଟଙ୍କା ଆୟ କରିଥିବା ବେଲେ ବିରାଟ କୋହଲି ୧୨୬ କୋଟି ଟଙ୍କା ଆୟ କରିଛନ୍ତି ।
