ମୁମ୍ବାଇ: ନାଁ ବଡ଼, କାମ ଛୋଟ । ବଡ଼ ଖେଳାଳିଙ୍କ ଖରାପ ପ୍ରଦର୍ଶନ । ଆଇପିଏଲର ପଏଣ୍ଟ ଟେବୁଲରେ ଥିବା ଶୀର୍ଷ ୪ ଟିମର ଅଧିନାୟକଙ୍କ ବ୍ୟାଟିଂ ପ୍ରଦର୍ଶନ ଶୂନ । ଏମଏସ ଧୋନି, ହାର୍ଦ୍ଦିକ ପାଣ୍ଡ୍ୟା, କୃନାଲ ପାଣ୍ଡ୍ୟା ଓ ରୋହିତ ଶର୍ମା ଚଳିତ ଆଇପିଏଲରେ ଫେଲ୍ । ବ୍ୟାଟିଂରେ କୌଣସି ବ୍ୟକ୍ତିଗତ ବଡ଼ ଇନିଂସ ଦେଖିବାକୁ ମିଳିନାହିଁ । ବାରମ୍ବାର ଫେଲ୍ ହେଉଛନ୍ତି ଏହି ବଡ଼ ଖେଳାଳି ।
ଚେନ୍ନାଇ ସୁପର କିଙ୍ଗସର ଅଧିନାୟକ ମହେନ୍ଦ୍ର ସିଂ ଧୋନି ବିଶ୍ବ କ୍ରିକେଟରେ ବେଷ୍ଟ ଫିନିସର ଭବେ ଜଣାଶୁଣା ଥିଲେ ମଧ୍ୟ ଏପର୍ଯ୍ୟନ୍ତ କୌଣସି ବଡ଼ ଫିନିସିଂ ଇନିଂସ ଖେଳି ନାହାନ୍ତି । ୧୫ଟି ମ୍ୟାଚରୁ ମାତ୍ର ୧୦୩ ରନ ସଂଗ୍ରହ କରିବାରେ ସମର୍ଥ ହୋଇଛନ୍ତି । ସେହିପରି ୨୦୨୧ ଆଇପିଏଲ ମ୍ୟାଚକୁ ନଜର ପକାଇଲେ ଧୋନି ୧୬ଟି ମ୍ୟାଚ ଖେଳି ମାତ୍ର ୧୧୪ ରନ୍ ସଂଗ୍ରହ କରିଛନ୍ତି ।
ସେହିପରି ହାର୍ଦ୍ଦିକ୍ ପାଣ୍ଡ୍ୟାଙ୍କ ଗୁଜରାଟ ଟାଇଟନ୍ସ ଡିଫେଣ୍ଡିଂ ଚାମ୍ପଆନ ରହିଛି । ୨୦୨୨ରେ ଦଳକୁ ପ୍ରଥମ ଥର ପାଇଁ ଟାଇଟଲ ଜିତାଇଥିଲା । ହେଲେ ଚଳିତ ଆଇପିଏଲରେ ଅଧିନାୟକ ସେଭଳି କିଛି ଆଖି ଦୃଶ୍ୟା ପ୍ରଦର୍ଶନ ଦେଖାଇ ନାହାନ୍ତି। ହାର୍ଦ୍ଦିକ୍ ୧୫ଟି ମ୍ୟାଚ ଖେଳି ୨୯୭ ରନ୍ ସଂଗ୍ରହ କରିଛନ୍ତି । ମାତ୍ର ୨୭ ହାରରେ ରନ ସଂଗ୍ରହ କରିଛନ୍ତି । ଗତ ବର୍ଷ ତୁଳନାରେ ଏହା ସବୁଠାରୁ ଖରାପ ପ୍ରଦର୍ଶନ । ୨୦୨୨ରେ ୧୫ଟି ମ୍ୟାଚ ଖେଳି ୪୪.୨୭ ହାରରେ ୪୮୭ ରନ୍ ସଂଗ୍ରହ କରିଥିଲେ । ସେହିପରି ୩ଟି ଓ୍ବିକେଟ୍ ନେଇଥିଲେ ।
ରୋହିତ ଶର୍ମାଙ୍କ ମଧ୍ୟ ଚଳିତ ଆଇପିଏଲ ଏପର୍ଯ୍ୟନ୍ତ ଚମତ୍କାର ପ୍ରଦର୍ଶନ ଦେଖାଇ ନାହାନ୍ତି । ୧୪ଟି ମ୍ୟାଚରୁ ମାତ୍ର ୨୨.୩୫ ହାରରେ ୩୧୩ ରନ ସଂଗ୍ରହ କରିବାରେ ସକ୍ଷମ ହୋଇଛନ୍ତି । ଆଗକୁ ବିଶ୍ବ ଟେଷ୍ଟ ଚାମ୍ପିଅନ୍ ସିପ୍ ରହିବାରୁ ରୋହିତଙ୍କ ଫର୍ମଙ୍କୁ ନେଇ ଚର୍ଚ୍ଚା ଜୋର ଧରିଛି । ଗତ ମ୍ୟାଚରେ ଅର୍ଦ୍ଧ ଶତକୀୟ ପାଳି ଫର୍ମକୁ ଫେରିଛନ୍ତି । ଏହା ଟିମ୍ ଇଣ୍ଡିଆ ପାଇଁ ଶୁଭ ଖବର ।
ସେହିପରି ଲକ୍ଷ୍ନୌ ସୁପର ଜାଏଣ୍ଟସର ଅଧିନାୟକ କୃନାଲ ପାଣ୍ଡ୍ୟା । କେଏଲ ରାହୁଲଙ୍କ ଅନୁସ୍ଥିତିରେ ସେ ନେତୃତ୍ବ ନେଉଛନ୍ତି । ସେ ଟିମରେ ଅଲରାଉଣ୍ଡର ଭାବେ ଖେଳୁଥିଲେ ମଧ୍ୟ ଏଯାଏଁ ସେଭଳି କିଛି ଚମତ୍କାରିତା ତାଙ୍କ ବ୍ୟାଟରୁ କି ବୋଲିଂରୁ ଦେଖିବାକୁ ମିଳିନାହିଁ । ୯ଟି ମ୍ୟାଚ୍ ଖେଳି ମାତ୍ର ୨୭୨ ରନ୍ ସଂଗ୍ରହ କରିଛନ୍ତି । ସେହିପରି ଅଧିନାୟକ ଭାବେ ମାତ୍ର ୩ଟି ଓ୍ବିକେଟ୍ ସହିତ ମାତ୍ର ୫୮ ରନ ସଂଗ୍ରହ କରିଛନ୍ତି ।
