ଭୁବନେଶ୍ବର ୩୦।୩: କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଟ୍ବିଟ୍ ପରେ ବିଜେଡି ସାଂସଦ ସସ୍ମିତ ପାତ୍ର ଜବାବ ରଖିଛନ୍ତି । ସସ୍ମିତ କହିଛନ୍ତି, “ଓଡିଶା ଏକ ଶାନ୍ତିପ୍ରିୟ ରାଜ୍ୟ । ଏଠି ଆଇନ ନାହିଁ କହିବା ରାଜନୈତିକ ଉଦ୍ଦେଶ୍ୟମୂଳକ । ରାଜନୈତିକ ଉଦ୍ଦେଶ୍ୟ ରଖି ଓଡିଶାକୁ ନିନ୍ଦିତ କରନ୍ତୁ ନାହିଁ । ଆପଣ ଓଡିଶାର ଆଇନଶୃଙ୍ଖଳା ଓ ଅପରାଧ ନେଇ ଅବଗତ ନାହାନ୍ତି । ଆଇନଶୃଙ୍ଖଳା ଓ ଅପରାଧ ଭିତରେ ଫରକ ଅଛି । ସ୍ପର୍ଶକାତରତା ଘଟଣାରେ ରାଜନୀତି କରନ୍ତୁ ନାହିଁ । ଓଡିଶା ଅପେକ୍ଷା ବିଜେପି ଶାସିତ ରାଜ୍ୟରେ ଅଧିକ ଅପରାଧ ଘଟୁଛି । ୨୦୨୧ ଏନସିଆରବି ଅନୁସାରେ ବିଜେପି ଶାସିତ ରାଜ୍ୟରେ ବେଶୀ ଅପରାଧ ହୋଇଛି । ଧର୍ଷଣ, ହତ୍ୟା ମାମଲାରେ ଓଡିଶାଠୁ ୟୁପି, ମଧ୍ୟପ୍ରଦେଶରେ ଅଧିକ । ଅପରାଧିକ ମାମଲାରେ ଓଡିଶାଠାରୁ ଆସାମ, ହରିୟାଣା ଆଗରେ ଅଛନ୍ତି ବୋଲି ସସ୍ମିତ କହିଛନ୍ତି ।
ଝାରସୁଗୁଡାର ୧୫ ବର୍ଷର ନାବାଳକ ଅପହରଣ ଓ ହତ୍ୟା ଘଟଣାରେ ଟ୍ୱିଟ୍ କରିଥିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଟ୍ବିଟ୍ରେ ରାଜ୍ୟ ସରକାରଙ୍କୁ ସମାଲୋଚନା କରିଥିଲେ ଧର୍ମେନ୍ଦ୍ର ପ୍ରଧାନ । ଧର୍ମେନ୍ଦ୍ର ପ୍ରଧାନ କହିଥିଲେ, ଆଇନ ବିହୀନ ଓଡ଼ିଶା ବାସ୍ତବତା ପାଲଟିଛି, ନବ ଦାସ ହତ୍ୟାକୁ ୨ ମାସ ନପୁରୁଣୁ ନାବାଳକ ସମର୍ଥର ହତ୍ୟା କରାଯାଇଛି, ସରକାର ଦାବି କରୁଥିବା ଆଇନର ଶାସନକୁ ପଦାରେ ପକାଇଛି ।
