ନୂଆଦିଲ୍ଲୀ: ଦକ୍ଷିଣ ଆଫ୍ରିକା ଦେଶ ମରୋକ୍କୋରେ ହୋଇଥିବା ଭୂମିକମ୍ପରେ ମୃତ୍ୟୁ ସଂଖ୍ୟା ବୃଦ୍ଧି ପାଇଛି । ବର୍ତ୍ତମାନ ସୁଦ୍ଧା ୨ହଜାରରୁ ଅଧିକ ଲୋକ ପ୍ରାଣ ହରାଇଥିବା ସୂଚନା ମିଳିଛି । ଅନେକ ଲୋକ ଧ୍ବଂସାବଶେଷ ତଳେ ଚାପି ରହିଥିବାରୁ ମୃତ୍ୟୁ ସଂଖ୍ୟା ବଢିପାରେ ବୋଲି ଆଶଙ୍କା କରାଯାଉଛି । ସେହିପରି ଆହତଙ୍କ ସଂଖ୍ୟା ୧୨ଶହ ପାର୍ କରିଛି । ଆହତଙ୍କ ମଧ୍ୟରେ ଅନେକଙ୍କ ଅବସ୍ଥା ସଂକଟାପନ୍ନ ରହିଛି ।       

ମରକ୍କୋ ଜିଓଲୋଜିକାଲ ସେଣ୍ଟର ଭୂକମ୍ପର ତୀବ୍ରତା ରିକ୍ଟର ସ୍କେଲରେ ୭.୨ ଦର୍ଶାଇଛି । ଏହାର କେନ୍ଦ୍ରସ୍ଥଳ ଆଟଲାସ ପର୍ବତ ନିକଟବର୍ତ୍ତୀ ଇଘିଲ ନାମକ ଏକ ଗ୍ରାମ ଦର୍ଶାଯାଇଛି, ଯାହା କି ମାରାକେଶ ସହରଠାରୁ ୭୧ କିଲୋମିଟର ଦୂରରେ ଅବସ୍ଥିତ । ଭୂପୃଷ୍ଠରୁ ୧୮.୫ କିଲୋମିଟର ଗଭୀରତାରେ ଏହା ଅନୁଭୂତ ହୋଇଥିଲା । ଏହାର ପ୍ରଭାବ ପର୍ତ୍ତୁଗାଲ ଓ ଆଲଜେରିଆରେ ବି ଅନୁଭୂତ ହୋଇଛି । ଶୁକ୍ରବାର ବିଳମ୍ବିତ ରାତିରେ ଆସିଥିବା ଏହି ଭୟଙ୍କର ଭୂକମ୍ପ ଯୋଗୁ ଅନେକ କୋଠା ତାସ୍‌ଘର ଭଳି ଗଳିପଡ଼ିଥିଲା । ଚାହୁଁ ଚାହୁଁ ଚାରିଆଡ଼ ଧୂଳିମୟ ହୋଇଯାଇଥିଲା । ତେବେ ଏହି ଭୂକମ୍ପର ତୀବ୍ରତା ୬.୮ ଥିବା ନେଇ ଆମେରିକାର ଜିଓଲୋଜିକାଲ ସର୍ଭେ ପକ୍ଷରୁ କୁହାଯାଇଛି । ସେପଟେ ଭୂମିକମ୍ପରେ ପ୍ରାଣ ହରାଇଥିବା ଲୋକଙ୍କୁ ପ୍ୟାରିସ୍‌ର ଏଫିଲ୍ ଟାଓ୍ବାରର ଲାଇଟ୍ ବନ୍ଦ କରି ଟ୍ରିବ୍ୟୁଟ୍ ଦିଆଯାଇଛି ।

The Eiffel Tower has gone dark in tribute to the victims of 🇲🇦 Morocco's earthquake. https://t.co/BpKcDaI4CP

— The Spectator Index (@spectatorindex) September 9, 2023

ସ୍ଥାନୀୟ ସମୟ ଅନୁସାରେ ରାତି ପ୍ରାୟ ୧୧ଟା ୧୧ରେ ଭୂକମ୍ପ ଅନୁଭୂତ ହୋଇଥିଲା । କିଛି ସମୟ ପରେ ଏକାଧିକ କମ୍ପନ ବା ଆଫ୍ଟର୍‌ ସକ୍‌ ଅନୁଭୂତ ହୋଇଥିଲା । ଏଗୁଡ଼ିକର ତୀବ୍ରତା ରିକ୍ଟର ସ୍କେଲ୍‌ରେ ୪.୯ ପର୍ଯ୍ୟନ୍ତ ହେବ । ଉକ୍ତ ଅଞ୍ଚଳରେ ୧୨୦ ବର୍ଷ ମଧ୍ୟରେ ଏହା ସବୁଠୁ ଶକ୍ତିଶାଳୀ ଭୂମିକମ୍ପ ବୋଲି ଜଣାପଡ଼ିଛି । 

ମରକ୍କୋ ସରକାରୀ ନ୍ୟୁଜ୍‌ ଚ୍ୟାନେଲ୍‌ କହିଛି ଯେ ଭୂମିକମ୍ପ କାରଣରୁ ଅନେକ ଘର ଭାଙ୍ଗି ମାଟିରେ ମିଶିଯାଇଛି । ସୋସିଆଲ୍‌ ମିଡିଆରେ ଏଥିସହ ଜଡ଼ିତ ଅନେକ ଭିଡିଓ ଭାଇରାଲ ହୋଇଛି । ଲୋକମାନେ ଜୀବନ ବିକଳରେ ପଳାୟନ କରୁଥିବା ଏଥିରେ ଦେଖିବାକୁ ମିଳିଛି ।