ନୂଆଦିଲ୍ଲୀ: ଦେଶରେ ୩୮,୯୯୨ ଜଳାଶୟ ଜବର ଦଖଲରେ ରହିଛି । ଏଥିରୁ ବଡ଼ ସଂଖ୍ୟାରେ ଏପରି ଜଳାଶୟ ରହିଛି, ଯାହାକୁ ସମ୍ପୂର୍ଣ୍ଣ ରୂପେ ହଡ଼ପ କରାଯାଇଛି । ପ୍ରଥମ ଥର ପାଇଁ ଜଳାଶୟ ଜବର ଦଖଲର ସଠିକ୍ ସଂଖ୍ୟାର ଏହି ସୂଚନା ଏକ ସରକାରୀ ରିପୋର୍ଟରେ ସାମନାକୁ ଆସିଛି । ଜବର ଦଖଲରେ ଥିବା ଅଧିକାଂଶ ଜଳାଶୟ ଗ୍ରାମାଞ୍ଚଳରେ ରହିଛି ।

ଦେଶରେ ଜଳାଶୟଗୁଡିକର ପ୍ରଥମ ଗଣନା ଅନୁସାରେ, ଗାଁରେ ୩୭୦୦୭ ପୋଖରୀ ଜବର ଦଖଲରେ ରହିଛି । ସେହିପରି ସରାଞ୍ଚଳରେ ୧୭୮୪ ଜଳାଶୟ ଅବୈଧ କବଜାରେ ରହିଛନ୍ତି । ରିପୋର୍ଟ ଅନୁସାରେ, ଗାଁ ଏବଂ ସହରାଞ୍ଚଳରେ ଯେଉଁ ଜଳାଶୟ ବେଆଇନ ଭାବେ କବଜାରେ ରହିଛି, ତାହା ମୋଟ ୨୪,୨୪,୫୪୦ ଜଳାଶୟର ୧.୬ ପ୍ରତିଶତ ଅଟେ । ଯେଉଁ ଜଳାଶୟ ବେଆଇନ କବଜାରେ ଅଛି ସେଥିରୁ ୬୨ ପ୍ରତିଶତର ୨୫ ପ୍ରତିଶତ ଜବର ଦଖଲରେ ରହିଛି, ସେହିପରି ୧୧.୮ ପ୍ରତିଶତର ପ୍ରାୟ ୭୫ ପ୍ରତିଶତ ଜବର ଦଖଲରେ ରହିଛି । ଏହାର ଅର୍ଥ ଏହା ଯେ ୪୬୦୦ରୁ ଅଧିକ ଜଳାଶୟ ସମ୍ପୂର୍ଣ୍ଣ ରୂପେ ଜବର ଦଖଲରେ ରହିଛି ।

ପ୍ରଥମ ଜଳାଶୟ ଗଣନା ରିପୋର୍ଟ ଅନୁସାରେ ମୋଟ ଜଳାଶୟରେ ୯୭.୧ ପ୍ରତିଶତ ଅର୍ଥାତ୍ ୨୩,୫୫,୦୫୫ ଗ୍ରାମାଞ୍ଚଳ ଏବଂ କେବଳ ୨.୯ ପ୍ରତିଶତ ଅର୍ଥାତ୍ ୬୯,୪୮୫ ସହରାଞ୍ଚଳରେ ରହିଛି । ତାମିଲନାଡୁ, ଆନ୍ଧ୍ର ପ୍ରଦେଶ, ବିହାର, ପଞ୍ଜାବ, ଝାଡଖଣ୍ଡରେ ସବୁଠୁ ଅଧିକ ଜଳାଶୟ ବେଆଇନ କବଜାରେ ରହିଛି । ଗତ ବର୍ଷ ଏସମ୍ପର୍କରେ ଜଳଶକ୍ତି ରାଜ୍ୟ ମନ୍ତ୍ରୀ ବିଶେଶ୍ୱର ଟୁଡୁ ରାଜ୍ୟସଭାରେ କହିଥିଲେ ଯେ ଜଳାଶୟ ଉପରେ ଅବୈଧ କବଜା ରୋକିବା ରାଜ୍ୟଗୁଡିକର ଦାୟିତ୍ୱ ।

ଜଳାଶୟ ଗଣନା ରିପୋର୍ଟ ଅନୁସାରେ ଦେଶର ମୋଟ ଜଳାଶୟର ୮୩.୭ ପ୍ରତିଶତ (୨୦,୨୦,୦୪୦) ବ୍ୟବହାରରେ ରହିଛି, ଅନ୍ୟପଟେ ୧୬.୩ ପ୍ରତିଶତ (୩,୯୪,୫୦୦) ବିଭିନ୍ନ କାରଣରୁ ବ୍ୟବହାରଯୋଗ୍ୟ ନୁହନ୍ତି ।