ଭଦ୍ରକ, ୨୩/୦୮ : ଟଙ୍କା ଉଠାଇବା ପାଇଁ ବ୍ୟାଙ୍କ ଆସିଥିଲେ ମହିଳା । ବ୍ୟାଙ୍କରୁ ବାହାରିବା ମାତ୍ରେ ଜଣେ ଯୁବକ ଆସି ମୁଣ୍ଡିଆ ମାରିଲେ । ପୁଅର ସାଙ୍ଗ ବୋଲି କହିଲେ । ନୋଟ୍ ବଦଳାଇବେ ବୋଲି କହି ଲୁଟି ନେଇ ଚାଲିଗଲେ । ଏପରି ଘଟଣା ଘଟିଛି ଭଦ୍ରକ ଜିଲ୍ଲା ବରପଦା ଅଞ୍ଚଳରେ ।
ସୂଚନା ଅନୁସାରେ, ନଇପାରିଗଡିଆ ଅଞ୍ଚଳର କୁନ୍ତଳା ସ୍ଵାଇଁ ନାମକ ଜଣେ ମହିଳା ପିଏନବି ବ୍ୟାଙ୍କର ବରପଦା ଶାଖାକୁ ଟଙ୍କା ଉଠାଇବା ପାଇଁ ଆସିଥିଲେ । ଟଙ୍କା ଉଠାଇ ବ୍ୟାଙ୍କ ବାହାରକୁ ଆସିବା ବେଳେ ମହିଳାଙ୍କୁ ଜଣେ ଯୁବକ ଆସି ମୁଣ୍ଡିଆ ମାରିଥିଲେ । ପୁଅର ସାଙ୍ଗ ଓ ବହୁଥର ତାଙ୍କ ଘରକୁ ଯାଇଛନ୍ତି ବୋଲି କହିଥିଲେ । ତେବେ ୫୦୦ ଟଙ୍କିଆ ନୋଟ ନ ଆଣି ୧୦୦ ଟଙ୍କିଆ ନୋଟ କାହିଁକି ବ୍ୟାଙ୍କରୁ ଆଣିଲେ ବୋଲି ବୁଝାଇଥିଲେ । ପରେ ଟଙ୍କା ବ୍ୟାଗ ନେଇ ଧରି ନୋଟ୍ ବଦଳାଇବେ ବୋଲି କହି ବ୍ୟାଗ୍ ନେଇ କିଛି ସମୟ ପରେ ଫେରାଇ ସେଠାରୁ ପଳାଇ ଯାଇଥିଲେ ।
ମହିଳା ଜଣଙ୍କ ବ୍ୟାଗ୍ ଯାଞ୍ଚ୍ କରିବାରୁ ସେଥିରେ ଟଙ୍କା ନଥିଲା । ସେ ବ୍ୟାଙ୍କ ନିକଟକୁ ଆସି ବହୁ ଖୋଜାଖୋଜି କରିଥିଲେ ମଧ୍ୟ ଯୁବକଙ୍କ ଖୋଜ୍ ଖବର ମିଳି ନଥିଲା । ଶେଷରେ ଭଦ୍ରକ ଗ୍ରାମାଞ୍ଚଳ ଥାନାକୁ ଜଣାଇଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ଜଣାପଡିଛି ।
