ନୂଆଦିଲ୍ଲୀ,୦୩/୦୧: କରୋନା ଭାଇରସ ମହାମାରୀ ବିରୋଧରେ ଯୁଦ୍ଧ ଜାରି ରହିଛି ।ଏହା ମଧ୍ୟରେ ଡିସିଜିଆଇ ସେରମ ଇନଷ୍ଟିଚ୍ୟୁଟ ଓ ଭାରତ ବାୟୋଟେକର ଦୁଇଟି ଟିକାକୁ ଜରୁରୀକାଳିନ ବ୍ୟବହାର ପାଇଁ ଅନୁମତି ପ୍ରଦାନ କରିଛନ୍ତି । ଏହି ନିଷ୍ପତ୍ତି ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହାକୁ ଲଢେଇ ନିର୍ଣ୍ଣାୟକ ମୋଡ ବୋଲି କହିଛନ୍ତି । ଏହାସହ ଭାରତୀୟଙ୍କ ପାଇଁ ଏହା ଗର୍ବର ଦିନ ବୋଲି କହିଛନ୍ତି ପ୍ରଧାନମନ୍ତ୍ରୀ ।
ପ୍ରଧାନମନ୍ତ୍ରୀ ବୈଜ୍ଞାନିକଙ୍କର ମଧ୍ୟ ପ୍ରଶଂସା କରିଛନ୍ତି । ବୈଜ୍ଞାନିକମାନେ ଆତ୍ମନିର୍ଭର ଭାରତର ଉଦ୍ଦେଶ୍ୟ ପ୍ରମାଣିତ କରିଛନ୍ତି । ଏହାସହ ଜରୁରୀକାଳିନ ବ୍ୟବହାରକୁ ମଞ୍ଜୁରି ମିଳିବା ଏହି ସାହସୀ ଲଢେଇରେ ଟର୍ଣ୍ଣିଂ ପଏଣ୍ଟ ଅଟେ ବୋଲି କହିଛନ୍ତି ମୋଦୀ ।
ସେହିପରି ପ୍ରଧାନମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ, ସେରମ ଇନଷ୍ଟିଚ୍ୟୁଟ୍ ଓ ଭାରତ ବାୟୋଟେକର ଭାକସିନ୍କୁ ମଞ୍ଜୁରି ମିଳିବା ପରେ କରୋନା ମୁକ୍ତ ଓ ସୁସ୍ଥ ଭାରତ ଗଠନର ରାସ୍ତା ପ୍ରଶସ୍ଥ ହୋଇଥିବା ସେ କହିଛନ୍ତି ।
