ନୂଆଦିଲ୍ଲୀ ୦୪/୦୬ : ଦେଶର ସୁରକ୍ଷା ପ୍ରତି ଯେପରି କୌଣସି ସାଲିସ୍ ନହେଉ ସେଥିପାଇଁ ସ୍ଥଳସେନା, ନୌସେନା ଓ ବାୟୁସେନାକୁ ଶକ୍ତିଶାଳୀ କରିବାକୁ ଭାରତ ସରକାର ପ୍ରତିବଦ୍ଧ । ଭାରତ ସରକାର ପ୍ରତିରକ୍ଷା ଉପକରଣଗୁଡିକର ସ୍ୱଦେଶୀକରଣ କରି ସୁରକ୍ଷା ବ୍ୟବସ୍ଥା ଆହୁରି ମଜଭୁତ କରିବାକୁ ପଦକ୍ଷେପ ନେଇଛନ୍ତି । ଏଥିପାଇଁ ପ୍ରତିରକ୍ଷା ମନ୍ତ୍ରାଳୟ ଏକ ବଡ ନିଷ୍ପତ୍ତି ନେଇଛି । ନୌସେନାର ଶକ୍ତି ବୃଦ୍ଧି କରିବାକୁ ଶୁକ୍ରବାର ଦିନ ପ୍ରୋଜେକ୍ଟ ୭୫-ଇଣ୍ଡିଆ ଅନୁଯାୟୀ ୬ଟି ସବମରିନ ନିର୍ମାଣ ପାଇଁ ମଞ୍ଜୁରୀ ଦେଇଛି ।
ଏହି ପ୍ରୋଜେକ୍ଟ ବହୁ ଦିନରୁ ଅଟକି ରହିଥିଲା । ଭାରତ ସରକାର ଶକ୍ତି ବଢାଇବାକୁ ନୌସେନା ପାଇଁ ୬ଟି ଆଡ଼ଭାନ୍ସ ସବମରିନ ନିର୍ମାଣ ପାଇଁ ଖୁବ ଶୀଘ୍ର ପ୍ରସ୍ତାବ ଅନୁରୋଧ ଜାରି କରିବ । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ଅଧ୍ୟକ୍ଷତାରେ ଭାରତୀୟ ନୌସେନା ଦ୍ୱାରା ଦିଆଯାଇଥିବା ପ୍ରସ୍ତାବକୁ ଡିଫେନ୍ସ ଆକ୍ବିଜିସନ କାଉନସିଲ ମଞ୍ଜୁରୀ ଦେଇଛି । ରାଜନାଥ ସିଂହଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ୫୦ ହଜାର କୋଟି ଟଙ୍କାର ଏହି ପ୍ରକଳ୍ପକୁ ମଞ୍ଜୁରୀ ଦିଆଯାଇଛି ।
ଏହି ପ୍ରକଳ୍ପକୁ ସ୍ବଦେଶୀ କମ୍ପାନୀ ମଝଗାଓଁ ଡକ୍ସ ଓ ଏଲ ଆଣ୍ଡ ଟିକୁ ଦିଆଯାଇଛି । ଏହି ଦୁଇ କମ୍ପାନୀ ଯେକୌଣସି ବିଦେଶୀ ସିପୟାର୍ଡ଼ ସହ ମିଶି ଏହି ପ୍ରୋଜେକ୍ଟର ପୁରା ତଥ୍ୟ ହସ୍ତାନ୍ତର କରିବେ ଓ ଟେଣ୍ଡର ପକାଇବେ ।ସୂଚନାଯୋଗ୍ୟ ଯେ ଭାରତୀୟ ନୌସେନାରେ ୪ ଦଶକ ଯାଏଁ ସେବା କରିବା ପରେ ଯୁଦ୍ଧପୋତ ସଂଧ୍ୟାକ ଶୁକ୍ରବାର ଦିନ ଅବସର ନେଉଛି । ସଂଧ୍ୟାକ ୪୦ ବର୍ଷ ଯାଏଁ ଦେଶର ସେବା କରିଛି । ଏହାର ପରିକଳ୍ପନା ପୂର୍ବତନ ରିୟର ଆଡମିରାଲ ଏଫ ଏଲ ଫ୍ରେଜର କରିଥିଲେ । ସଂଧ୍ୟାକ ନିର୍ମାଣ ୧୯୭୮ ରେ ଆରମ୍ଭ ହୋଇଥିଲା । ୧୯୮୨ ଫେବୃଆରୀ ୨୬ ତାରିଖରେ ଏହାକୁ ନୌସେନାରେ ସାମିଲ କରାଯାଇଥିଲା ।
ପ୍ରୋଜେକ୍ଟ ୭୫ ଇଣ୍ଡିଆ କଣ ?
ଭାରତୀୟ ନୌସେନା ଜଳଭାଗରେ ନିଜର ଶକ୍ତି ଆହୁରି ମଜବୁତ କରିବାକୁ ଏହି ପ୍ରୋଜେକ୍ଟ ଆରମ୍ଭ କରିଛି । ଏହି ପ୍ରୋଜେକ୍ଟ ଅନୁଯାୟୀ ୬ଟି ବଡ ସବମରିନ ନିର୍ମାଣ କରାଯିବ ଯାହା ଡିଜେଲ ଓ ଇଲେକ୍ଟ୍ରିରେ ଚାଲିବ । ମେକ୍ ଇନ୍ ଇଣ୍ଡିଆ ଅଭିଯାନରେ ଏହି ସବୁ ସବମରିନ ନିର୍ମାଣ କରାଯିବ । ଏଥିରେ ଆଣ୍ଟି ସିପ କ୍ରୁଜ ମିସାଇଲ ସହ ୧୨ଟି ଲ୍ୟାଣ୍ଡ ଆଟକ କ୍ରୁଜ ମିସାଇଲ ମଧ୍ୟ ଖଞ୍ଜାଯିବ ବୋଲି ଜଣାପଡ଼ିଛି।