ନୂଆଦିଲ୍ଲୀ ୦୯।୧୨ -ସାଇକେଲରେ ସଂସଦ ଗଲେ ସାଂସଦ ପ୍ରତାପ ଷଡଙ୍ଗୀ । ନିଜର ସରଳ ତଥା ନିରାଡମ୍ବର ଜୀବନ ଯାପନ ପାଇଁ ଚର୍ଚ୍ଚାରେ ଥିବା ସାଂସଦ ତଥା ମନ୍ତ୍ରୀ ପ୍ରତାପ ଷଡଙ୍ଗୀ ପାର୍ଲାମେଣ୍ଟକୁ ସାଇକେଲରେ ଯାତ୍ରା କରିଛନ୍ତି । ଯାହାକୁ ନେଇ ଚର୍ଚ୍ଚା ଲାଗି ରହିଛି । କେବଳ ପ୍ରତାପ ଷଡଙ୍ଗୀ ନୁହନ୍ତି ମନୋଜ ତିୱାରୀ, ମନସୁଖ ମାଣ୍ଡଭ୍ୟ, ଅର୍ଜୁନ୍ ମେଘୱାଲଙ୍କ ଭଳି ସାଂସଦ ଓ ମନ୍ତ୍ରୀ ପାର୍ଲାମେଣ୍ଟକୁ ସାଇକେଲ୍ରେ ଯାଇ ଚର୍ଚ୍ଚାରେ ରହିଛନ୍ତି । …

ସଂସଦକୁ ସାଇକେଲ୍ରେ ଗଲେ ନନା । ବାଲେଶ୍ବର ସାଂସଦ ତଥା କେନ୍ଦ୍ରମନ୍ତ୍ରୀ ପ୍ରତାପ ଷଡଙ୍ଗୀ ନିଜର ସରଳ ଓ ନିରାଡମ୍ବର ଜୀବନ ଯାପନ ପାଇଁ ଚର୍ଚ୍ଚାରେ ଅଛନ୍ତି । ପ୍ରତାପ ଷଡଙ୍ଗୀ ଆଜି ସାଇକେଲ୍‌ରେ ସଂସଦକୁ ଯାଇ ପୁଣି ଚର୍ଚ୍ଚା ପରିସରକୁ ଆସିଛନ୍ତି । ସୋମବାର ଦିନ ୧୦ ଟା ବେଳେ ନିଜ ସରକାରୀ ବାସଭବନ ୧୦ ପଣ୍ଡିତ୍ ପଥ ମାର୍ଗରୁ ବ୍ୟାଟେରୀ ଚାଳିତ ସାଇକେଲରେ ବାହାରିଥିଲେ ପ୍ରତାପ ଷଡଙ୍ଗୀ । ସଂସଦ ଫାଟକ ଦେଇ ଭିତରକୁ ପଶିଥିଲେ । ଏହି ସାଇକେଲ୍ ବ୍ୟାଟିରୀରେ ଚାଲିବ ସହ ଏହାକୁ ପେଡାଲିଂ ବି କରିହେବ । ଅନ୍ୟ ନେତା ଓ ମନ୍ତ୍ରୀମାନେ ସଂସଦକୁ ବଡ ବଡ ଗାଡିରେ ଆସୁଥିବା ବେଳେ ନନା କାହିଁକି ମନ ବଳାଇଳେ ସାଇକେଲ୍ରେ ଆସିବାକୁ ? ନନା କହିଛନ୍ତି ସୁସ୍ଥ ଶରୀର ଓ ସୁସ୍ଥ ପରିବେଶ ବାର୍ତ୍ତା ଦେବାକୁ ସେ ସାଇକେଲ୍ରେ ଆସିଛନ୍ତି ।….

କେବଳ ପ୍ରତାପ ଷଡଙ୍ଗୀ ନୁହନ୍ତି ତାଙ୍କ ଆଗରୁ ଅନେକ ସାଂସଦ ଓ ମନ୍ତ୍ରୀ ମଧ୍ୟ ପାର୍ଲାମେଣ୍ଟକୁ ସାଇକେଲ୍‌ରେ ଆସି ଚର୍ଚ୍ଚାରେ ଥିଲେ । ପ୍ରଦୂଷଣ ନିୟନ୍ତ୍ରଣ ପାଇଁ ଦିଲ୍ଲୀରେ ରାଜ୍ୟ ସରକାର ଅଡ୍ ଆଣ୍ଡ ଇଭିନ୍ ନମ୍ବର ଲାଗି କରିବା ପରେ କେନ୍ଦ୍ରମନ୍ତ୍ରୀ ଅର୍ଜୁନ୍ ରାମ ମେଘାୱାଲ୍ ସଂସଦକୁ ସାଇକେଲ୍‌ରେ ଆସି ଚର୍ଚ୍ଚାକୁ ଆସିଥିଲେ । ସେହିଭଳି ଦିଲ୍ଲୀ ବିଜେପି ମୁଖ୍ୟ ତଥା ସାଂସଦ ମନୋଜ ତିୱାରୀ ବି ପାର୍ଲାମେଣ୍ଟକୁ ସାଇକେଲ୍‌ରେ ଆସିଥିଲେ। ରାଜ୍ୟ ସଭା ଏମ୍ପି ଅନିଲ୍ ଡାଭେ, ମନ୍ତ୍ରୀ ମନସୁଖ୍ ମାଣ୍ଡଭ୍ୟ ପାର୍ଲାମେଣ୍ଟକୁ ସାଇକେଲ୍‌ରେ ଯାଇ ଚର୍ଚ୍ଚାର କେନ୍ଦ୍ରବିନ୍ଦୁ ସାଜିଥିଲେ । କିଏ ବଢୁଥିବା ପ୍ରଦୁଷୂଣକୁ ରୋକିବା ପାଇଁ ତ ଆଉ କିଏ ସ୍ବାସ୍ଥ୍ୟପ୍ରତି ଲୋକଙ୍କୁ ସଚେତନ କରିବା ଉଦ୍ଦେଶ୍ୟରେ ସଂସଦକୁ ସାଇକେଲ୍‌ରେ ଆସିଛନ୍ତି । ତେବେ  ପ୍ରତାପ ଷଡଙ୍ଗୀଙ୍କ ସାଇକେଲ୍‌ ପାର୍ଲାମେଣ୍ଟକୁ ଆସିବା ଥିଲା ନିଆରା ।…

ଦିଲ୍ଲୀରେ ବଢୁଥିବା ପ୍ରଦୂଷଣକୁ ଦୃଷ୍ଟିରେ ରଖି ମନ୍ତ୍ରୀ ଓ ସାଂସଦଙ୍କୁ ଦ୍ବାରା ଏଭଳି ସାଇକେଲ୍ ବ୍ୟବହାର କରାଯିବା ଅନ୍ୟମାନଙ୍କ ପାଇଁ ପ୍ରେରଣା ସାଜିବ  ।