ଟାଙ୍ଗୀ ୧।୧୦: ଚିଲିକାକୁ ବିଦେଶୀ ପକ୍ଷୀଙ୍କ ଆଗମନ । ପକ୍ଷୀଙ୍କ ସୁରକ୍ଷା ବ୍ୟବସ୍ଥା ନେଇ ବିଭିନ୍ନ ପ୍ରକାରର ପଦକ୍ଷେପ ନିଆଯାଇଛି ବୋଲି ଚିଲିକା ବନ୍ୟପ୍ରାଣୀ ଡିଭିଜନ ବାଲୁଗାଁ DFO ଅମ୍ଲାନ କୁମାର ନାୟକ ସୂଚନା ଦେଇଛନ୍ତି । ବିଦେଶୀ ପକ୍ଷୀଙ୍କ ସୁରକ୍ଷା ପାଇଁ ଚିଲିକା ବନ୍ୟପ୍ରାଣୀ ଡିଭିଜନ ଅଧିନରେ ଥିବା ୫ଟି ରେଞ୍ଜ ବାଲୁଗାଁ, ଟାଙ୍ଗୀ, ସାତପଡ଼ା, ନୂଆପଡ଼ା ଓ ରମ୍ଭା ଅଞ୍ଚଳରେ ବନ୍ୟପ୍ରାଣୀ ବିଭାଗ ପକ୍ଷରୁ ୨୧ଟି ପକ୍ଷୀ ସୁରକ୍ଷା କ୍ୟାମ୍ପ କରାଯାଇଛି ।
ବିଦେଶୀ ପକ୍ଷୀଙ୍କ ସୁରକ୍ଷା ଦୃଷ୍ଟିରୁ ପକ୍ଷୀ ଶିକାରୀଙ୍କ ଉପରେ ନଜର ରଖିବା ଓ ପକ୍ଷୀ ଶିକାର ଉପରେ ରୋକ୍ ଲଗାଇବା ପାଇଁ ଜଳପଥ ଓ ସ୍ଥଳପଥରେ ପାଟ୍ରୋଲିଂ ବ୍ୟବସ୍ଥା ସାଙ୍ଗକୁ ଡ୍ରୋନ୍ ବ୍ୟବସ୍ଥା କରିଛି ବନ୍ୟପ୍ରାଣୀ ବିଭାଗ ।
DFO ଆହୁରି କହିଛନ୍ତି, ପକ୍ଷୀ ଶିକାର ବନ୍ଦ କରିବା ଏବଂ ଅତିଥି ସାଜିଥିବା ବିଦେଶୀ ପକ୍ଷୀଙ୍କ ସୁରକ୍ଷା ପାଇଁ ଚିଲିକା କୂଳିଆ ଗାଁ ମାନଙ୍କରେ ଜନ-ସଚେତନତା ସୃଷ୍ଟି କରିବା ପାଇଁ ବନ୍ୟପ୍ରାଣୀ ବିଭାଗ ପକ୍ଷରୁ ଯୋଜନା ପ୍ରସ୍ତୁତ କରାଯାଇଛି । ବିଦେଶୀ ପକ୍ଷୀଙ୍କ ସୁରକ୍ଷା ପାଇଁ ସ୍ଥାନୀୟ ପୋଲିସର ସହଯୋଗ ନିଆଯିବ । ପ୍ରତିବର୍ଷ ଶୀତ ଋତୁ ଆରମ୍ଭରେ ଅର୍ଥାତ ଅକ୍ଟୋବର ମାସ ଦ୍ୱିତୀୟ ସପ୍ତାହରେ ମରାଳମାଳିନୀ ନୀଳାମ୍ବୁ ଚିଲିକାକୁ ବିଦେଶୀ ପକ୍ଷୀଙ୍କ ଆଗମନ ହୋଇଥାଏ, ମାତ୍ର ଏଥର ଆଗୁଆ ଅର୍ଥାତ ଦୁଇ ସପ୍ତାହ ପୂର୍ବରୁ ବିଦେଶୀ ପକ୍ଷୀଙ୍କ ଆଗମନ ହୋଇଛି । ପକ୍ଷୀଙ୍କ ଚଳ-ପ୍ରଚଳ ସ୍ଥାନ ଓ ପକ୍ଷୀଙ୍କ ସୁରକ୍ଷା ଜୋନ୍ ମଧ୍ୟକୁ ପର୍ଯ୍ୟଟକ/ମତ୍ସ୍ୟଜୀବୀ ମାନଙ୍କୁ ନୋ-ଏଣ୍ଟ୍ରି କଟକଣା ଲାଗୁ କରାଯାଇଛି । ଅଳ୍ପ ସଂଖ୍ୟକ ବିଦେଶୀ ପକ୍ଷୀଙ୍କ ଆଗମନ ହୋଇଥିବା DFO କହିଛନ୍ତି ।
You Can Read:
