ଭରତପୁର/ଗ୍ୱାଲିୟର ୨୮।୧: ରାଜସ୍ଥାନ ଭରତପୁରରେ ଶନିବାର ଏକ ବାୟୁସେନା ବିମାନ ଦୁର୍ଘଟଣାଗ୍ରସ୍ତ ହୋଇ ଖସିପଡିଛି। ଭରତପୁର ଜିଲ୍ଲାପାଳ ପୂର୍ବାହ୍ନରେ ଏକ ଚାର୍ଟର ବିମାନ ଦୁର୍ଘଟଣାଗ୍ରସ୍ତ ହୋଇଥିବା ସୂଚନା ଦେଇଥିଲେ। ବାୟୁସେନା ବିମାନ ଦୁର୍ଘଟଣାଗ୍ରସ୍ତ ହୋଇଥିବା ଡିଫେନ୍ସ ପିଆରଓ ଅମିତାଭ ଶର୍ମା ସୂଚନା ଦେଇଛନ୍ତି। ବାୟୁସେନା ଅଧିକାରୀ ଘଟଣାସ୍ଥଳରେ ପହଞ୍ଚିଛନ୍ତି। ବାୟୁସେନା ବିମାନ ଦୁର୍ଘଟଣାଗ୍ରସ୍ତ ନେଇ ପ୍ରତିରକ୍ଷା ମନ୍ତ୍ରଣାଳୟକୁ ସୂଚିତ କରାଯାଇଛି।
{"id":738557,"sizeSlug":"full","linkDestination":"none"}
ଶନିବାର ଦେଶରେ ମୋଟ ୨ଟି ବିମାନ ଦୁର୍ଘଟଣା ଘଟିଛି। ଏହି ବିମାନ ୨ଟି ମଧ୍ୟପ୍ରଦେଶର ଗ୍ୱାଲିୟର ବାୟୁସେନା ଘାଟିରୁ ପୂର୍ବାହ୍ନ ୯ଟା ୧୫ ମିନିଟ୍ରେ ପ୍ରଶିକ୍ଷଣ ମିସନରେ ଉଡାଣ ଭରିଥିଲା। ସୁଖୋଇ-୩୦ରେ ୨ ଜଣ ପାଇଲଟ ଥିବା ବେଳେ ମିରାଜ-୨୦୦୦ରେ ଜଣେ ପାଇଲଟ ବିମାନ ଉଡାଉଥିଲେ। ବିମାନ ଦୁଇଟି ପାଖାପାଖି ୫୦ କିଲୋମିଟର ଯିବା ପରେ ଏଟିସି ସହିତ ସେମାନଙ୍କ ସମ୍ପର୍କ ବିଛିନ୍ନ ହୋଇଥିବା ବେଳେ ବିମାନ ଆକାଶରେ ଜଳି ଉଠିଥିଲା। ଏଥିରେ ସୁଖୋଇ-୩୦ ମୁରୈନା ପାହାଡ଼ଗଡ ଜଙ୍ଗଲରେ ଖସିଥିବା ବେଳେ ମିରାଜ ଭରତପୁର ଉଚ୍ଚୈନର ପିଙ୍ଗୋରା ଗାଁ ନିକଟରେ ନିଆଁ ଗୁଳା ହୋଇ ଖସିଥିଲା। ଫଳରେ ମିରାଜ ଯୁଦ୍ଧବିମାନ ଉଡାଉଥିବା ପାଇଲଟଙ୍କ ମୃତ୍ୟୁ ହୋଇଛି।
{"id":738559,"width":842,"height":474,"sizeSlug":"full","linkDestination":"none"}
ସୁଖୋଇ-୩୦ ଓ ମିରାଜ ୨୦୦୦ ଯୁଦ୍ଧବିମାନ ମଧ୍ୟରେ ହୁଏତ ଆକାଶରେ ଧକ୍କା ଲାଗିଥାଇପାରେ ବୋଲି ପ୍ରତିରକ୍ଷା ସୂତ୍ର ଆକଳନ କରୁଛନ୍ତି। ଘଟଣାର ତଦନ୍ତ ପାଇଁ ବିଚାର ବିଭାଗୀୟ କମିଟି ଗଠନ କରାଯାଇଛି। ତେବେ ବିମାନ ବ୍ଲାକ୍ ବକ୍ସରୁ ହିଁ ଦୁର୍ଘଟଣାର ପ୍ରକୃତ କାରଣ ଜଣା ପଡିବ। ତେବେ ଦୁଇଟି ବିମାନ ଏକ ସଙ୍ଗରେ ଦୁର୍ଘଟଣାଗ୍ରସ୍ତ ହେବା ବାସ୍ତବିକ ଆଶ୍ଚର୍ଯ୍ୟଜନକ। ତେବେ ମାମଲା ଉପରେ କେନ୍ଦ୍ର ପ୍ରତିରକ୍ଷାମନ୍ତ୍ରୀ ରାଜନାଥ ସିଂହଙ୍କ ସମେତ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ ନଜର ରଖିଛନ୍ତି। ମୁଖ୍ୟମନ୍ତ୍ରୀ ଶିବରାଜ ମୁରୈନା ଜିଲ୍ଲାପାଳଙ୍କୁ ରିଲିଫ ଓ ଉଦ୍ଧାର କାର୍ଯ୍ୟ ପରିଚାଳନା ଲାଗି ଜରୁରି ନିର୍ଦ୍ଦେଶ ଦେଇଛନ୍ତି।
