ନୂଆଦିଲ୍ଲୀ: ଟ୍ୱିଟର ରାସ୍ତାରେ ଏବେ ମେଟା । ଟ୍ୱିଟର ପରି ଏବେ ମେଟା ମଧ୍ୟ ନିଜ ଗ୍ରାହକଙ୍କ ପାଇଁ ଭେରିଫାଏଡ୍ ସବସ୍କ୍ରିପସନ ସର୍ଭିସ ଘୋଷଣା କରିଛି । ଫେସବୁକର ମାଲିକ ମାର୍କ ଜୁକରବର୍ଗ ଏହି ଘୋଷଣା କରିଛନ୍ତି । ଖୁବଶୀଘ୍ର ଫେସବୁକ ଏବଂ ଇନଷ୍ଟାଗ୍ରାମରେ ବ୍ଲୁ ଟିକ୍ ପାଇଁ ୟୁଜର୍ସଙ୍କୁ ଟଙ୍କା ଦେବାକୁ ପଡିବ।

ରବିବାର ଫେବ୍ରୁଆରୀ ୧୯ରେ ମାର୍କ ଜୁକରବର୍ଗ ଫେସବୁକ ପୋଷ୍ଟ ଜରିଆରେ ସବସ୍କ୍ରିପସନ ସର୍ଭିସ ବାବାଦରେ ସୂଚନା ଦେଇଛନ୍ତି । ଜୁକରବର୍ଗ ନିଜ ପୋଷ୍ଟରେ ଲେଖିଛନ୍ତି, ଚଳିତ ସପ୍ତାହରେ ଆମେ ମେଟା ଭେରିଫାଇଡ୍ ଆରମ୍ଭ କରୁଛୁ ଯାହା ଏକ ସବସ୍କ୍ରିପସନ ସର୍ଭିସ ଅଟେ, ଯାହା ସରକାରୀ ପରିଚୟ ପତ୍ର ସହ ଆପଣଙ୍କ ଆକାଉଣ୍ଟକୁ ଯୋଡିବାକୁ ହେବ ।

ଜୁକରବର୍ଗଙ୍କ ଘୋଷଣା ଅନୁସାରେ, ଏବେ ଗ୍ରାହକ ଟଙ୍କା ଦେଇ ବ୍ଲୁକ ଟିକ୍ ପାଇପାରିବେ, ଯାହା ସମାନ ଆଇଡି ଥିବା ଫେକ୍ ଆକାଉଣ୍ଟଠାରୁ ସୁରକ୍ଷା ଏବଂ କଷ୍ଟର ସପୋର୍ଟ ହାସଲ କରିପାରିବେ । ଏହି ନୂଆ ଫିଚର ଫେସବୁକ ସେବାର ପ୍ରାମାଣିକତା ସୁରକ୍ଷାକୁ ବଢାଇବ ।

ମେଟା ଭେରିଫାଇଡ୍ ସର୍ଭିସର ଘୋଷଣା ସହ ଏଥିପାଇଁ ୟୁଜର୍ସଙ୍କୁ କେତେ ଟଙ୍କା ଦେବାକୁ ପଡିବ ତାହା ମଧ୍ୟ ସେ ଘୋଷଣା କରିଛନ୍ତି । ଜୁକରବର୍ଗଙ୍କ ଅନୁସାରେ, ଜଣେ ୟୁଜରଙ୍କୁ ୱେବ ଆଧାରିତ ଭେରିଫିକେସନ ପାଇଁ ପ୍ରତିମାସରେ ୧୧.୯୯ ଡଲାର (୯୯୨.୩୬ ଟଙ୍କା) ଏବଂ iOS ରେ ସେବା ପାଇଁ ପ୍ରତିମାସରେ ୧୪.୯୯ ଡଲାର (୧୨୪୦.୬୫ ଟଙ୍କା) ଦେବାକୁ ପଡିବ ।