ନୂଆଦିଲ୍ଲୀ, ୩୦/୦୮: ଆସନ୍ତା ୨୦୨୪ ଲୋକସଭା ଓ ବିଧାନସଭା ନିର୍ବାଚନ ଏକା ଲଢ଼ିବ ବହୁଜନ ସମାଜ ପାର୍ଟି । ଇଣ୍ଡିଆ ନୁହେଁ କି‘ ଏନଡିଏ ନୁହେଁ, କାହା ସହ ବି ମେଣ୍ଟ ହେବ ନାହିଁ ବୋଲି ସ୍ପଷ୍ଟ କରି ଦେଇଛନ୍ତି ମାୟାବତୀ । ବିରୋଧୀ ଦଳ ଇଣ୍ଡିଆର ମେଣ୍ଟରେ ମାୟାବତୀ ସାମିଲ ହେବା ନେଇ ଯେଉଁ ଅନୁମାନ କରାଯାଉଥିଲା ତାକୁ ସିଧା ସିଧା ଖଣ୍ଡନ କରିଦେଇଛନ୍ତି ମାୟାବତୀ ।

ଆସନ୍ତକାଲି ଇଣ୍ଡିଆ ମେଣ୍ଟର ଗୁରୁତ୍ବପୂର୍ଣ୍ଣ ବୈଠକ ଆଗରୁ ମାୟାବତୀ ବଡ଼ ଘୋଷଣା କରିଛନ୍ତି । ଇଣ୍ଡିଆ ମେଣ୍ଟରେ ମାୟାବତୀ ସାମିଲ ହେବା ନେଇ ପଥ ପରିଷ୍କାର କରୁଥିଲା କଂଗ୍ରେସ । ଉତ୍ତରପ୍ରଦେଶ କଂଗ୍ରେସ ମୁଖିଆ ପଦରୁ ଦଳିତ ସମାଜର ପ୍ରତିନିଧିତ୍ବ କରୁଥିବା ବୃଜଲାଲ ଖାବରୀଙ୍କୁ ହଟାଇ ଅଜୟ ରାୟଙ୍କୁ ଦାୟିତ୍ବ ଦିଆଯାଇଥିଲା ।

ଆହୁରି ପଢ଼ନ୍ତୁ: NDA କିିମ୍ବା I.N.D.I.A କାହାକୁ ସମର୍ଥନ କରିବ ବିଆରଏସ ? ସ୍ପଷ୍ଟ କଲେ ତେଲେଙ୍ଗାନା ମୁଖ୍ୟମନ୍ତ୍ରୀ କେସିଆର

ତେବେ ମାୟାବତୀଙ୍କ ଟୁଇଟ୍ ସବୁ ଆକଳନକୁ ଓଲଟ ପାଲଟ କରିଦେଇଛି । ଟୁଇଟ୍ କରି ମାୟାବତୀ ଲେଖିଛନ୍ତି, ଉଭୟ ଏନଡିଏ ଏବଂ ଇଣ୍ଡିଆ ମେଣ୍ଟ ଗରିବ ବିରୋଧୀ, ଜାତିବାଦୀ ଏବଂ ସାଂପ୍ରଦାୟିକ । ଏହି ନୀତି ବିରୋଧରେ ବହୁଜନ ସମାଜ ପାର୍ଟି ସଂଘର୍ଷ କରି ଆସୁଥିବାରୁ ଏହାସହ ସାଲିସ୍ କରି ମେଣ୍ଟ ଗଢିବା ବଦଳରେ ବିଏସ୍ପି ଏକେଲା ନିର୍ବାଚନ ଲଢିବାକୁ ପସନ୍ଦ କରିବ ବୋଲି ମାୟାବତୀ କହିଛନ୍ତି।