ନୂଆଦିଲ୍ଲୀ: ଆମେରିକାର ହାଓ୍ବାଇ ଦ୍ବୀପରେ ଭୀଷଣ ଅଗ୍ନିକାଣ୍ଡରେ ମୃତ୍ୟୁ ସଂଖ୍ୟା ବଢ଼ିବାରେ ଲାଗିଛି । ଜଙ୍ଗଲ ନିଆଁରେ ପୋଡ଼ି ହୋଇ ଏପର୍ଯ୍ୟନ୍ତ ୬୭ଜଣଙ୍କ ମୃତ୍ୟୁ ହୋଇଛି । ଶହେରୁ ଲୋକ ଅଧିକ ଆହତ ହୋଇଛନ୍ତି । ସେହିପରି ଅଗ୍ନିକାଣ୍ଡରେ ସମ୍ପୂର୍ଣ୍ଣ ଲହାଇନା ସହର ଛରଖାର ହୋଇଛି ।  ଏନେଇ ମାଉ ସରକାରଙ୍କ ପକ୍ଷରୁ ସ୍ପଷ୍ଟ କରାଯାଇଛି ।

ରେସକ୍ୟୁ ଟିମ୍ ଆହତଙ୍କୁ ଉଦ୍ଧାର କରି ସ୍ଥାନୀୟ ହସ୍ପିଟାଲରେ ଭର୍ତ୍ତି କରିଛନ୍ତି । ଅଗ୍ନିକାଣ୍ଡର ଭୟାବହତା ଏତେ ଥିଲା ଯେ, ଧୀରେ ଧୀରେ ଆହତଙ୍କ ସଂଖ୍ୟା ବଢୁଛନ୍ତି । ଫଳରେ ହସ୍ପିଟାଲରେ ବେଡ୍ ଅଭାବ ଦେଖାଦେଲାଣି । ଏପର୍ଯ୍ୟନ୍ତ ସହରରୁ ୧୧ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି । ହଜାରେରୁ ଅଧିକ ବିଲ୍ଡିଂ ଜଳିପୋଡ଼ି ନଷ୍ଟ ହୋଇଛି ।

ମାନବୀୟ ତ୍ରୁଟି ଯୋଗୁ ଏହି ଜଙ୍ଗଲ ନିଆଁ ଲାଗିଛି । ତେବେ ପବନ ଏବଂ ଉଷ୍ଣ ଅଞ୍ଚଳ ଯୋଗୁ ଏହି ଜଙ୍ଗଲ ନିଆଁ ସହର ଆଡ଼କୁ ମାଡି ଆସିଥିଲା । ପର୍ଯ୍ୟଟନ ସହର ଭାବରେ ପରିଚିତ ଏହି ସହରକୁ ନିଆଁ ବ୍ୟାପି ଯାଇଛି । ଜଙ୍ଗଲ ନିଆଁରେ ଅନେକ ଐତିହାସିକ କୀର୍ତ୍ତିରାଜି ଓ କୋଠା ସମେତ ବଡ଼ ବଡ଼ ହୋଟେଲ ପୋଡି ଛାରଖାର ହୋଇ ଯାଇଛି । ଏପରିକି ବନ୍ଦର ଅଞ୍ଚଳରେ ଥିବା ବୋଟ୍ ମଧ୍ୟ ପୋଡି ଯାଇଛି । ପ୍ରାୟ ୨୭୦ରୁ ଅଧିକ ପର୍ଯ୍ୟଟନସ୍ଥଳି ଧ୍ବଂସ ସ୍ତୁପରେ ପରିଣତ ହୋଇଛି । ଦ୍ବୀପର ୮୦ ପ୍ରତିଶତ ସ୍ଥାନ ନିଆଁର ଆଁ ଭିତରକୁ ଆସିଛି । ଅଗ୍ନିଶମ କର୍ମଚାରୀମାନେ ଅପରେସନ ଜାରି ରଖିଛନ୍ତି । ହାଓ୍ବାଇ ଗଭର୍ଣ୍ଣର ଜୋଶ ଗ୍ରୀନ କହିଛନ୍ତି, ଜଙ୍ଗଲ ନିଆଁ ବ୍ୟାପକ କ୍ଷୟକ୍ଷତି ହୋଇଛି ।