କନ୍ଧମାଳ ୨୭।୭: ମାଓ ସହିଦ ସପ୍ତାହ ପୂର୍ବରୁ କନ୍ଧମାଳରେ ଲାଗିଲା ମାଓ ବ୍ୟାନର । ସହିଦ ସପ୍ତାହ ପୂର୍ବରୁ କନ୍ଧମାଳରେ ମାଓ ବ୍ୟାନର ଲାଗିଛି । ଆସନ୍ତା ୨୮ ତାରିଖରୁ ଅଗଷ୍ଟ ୩ ତାରିଖ ପର୍ଯ୍ୟନ୍ତ ଲାଲ୍ ବାହୀନି ସହିଦ ସପ୍ତାହ ପାଳନ କରୁଛି । ଏହି ସମୟ ମଧ୍ୟରେ ମାଓବାଦୀ ମାନେ କିଛି ଅଘଟଣ ଘଟାନ୍ତି । ଏହି ସପ୍ତାହ ପୋଲିସ ପାଇଁ ଏକ ଚାଲେଞ୍ଜ ସୃଷ୍ଟି କରିଛି । ମାଓବାଦୀଙ୍କ ସହିଦ ସପ୍ତାହକୁ ଦୃଷ୍ଟିରେ ରଖି ପୋଲିସ ପକ୍ଷରୁ ମାଓ ପ୍ରବଣ ଅଞ୍ଚଳରେ କୁମ୍ବିଂ କରିବା ସହ କଡ଼ା ସୁରକ୍ଷା ମଧ୍ୟ ଗ୍ରହଣ କରାଯାଇଛି ।

ଗୁରୁବାର ଫିରିଙ୍ଗିଆ ଥାନା ଅନ୍ତର୍ଗତ ପାଇ ରାଜୁ ଓ ଗୋଛାପଡା ନିକଟ ବ୍ରିଜ୍‌ରେ ମାଓ ବ୍ୟାନର ଓ ପୋଷ୍ଟର ଦେଖିବାକୁ ମିଳିଛି । ଏହି ସପ୍ତାହକୁ ମାଓ ସଂଗଠନ ସହିଦ ସପ୍ତାହ ପାଳନ କରିବାକୁ ଏହି ବ୍ୟାନରରେ ଉଲ୍ଲେଖ ରହିଛି । ବ୍ୟାନର ଲାଗିବା ଫଳରେ ଅଞ୍ଚଳରେ ଭୟର ବାତାବରଣ ଖେଳିଯାଇଛି ।

ସେପଟେ ରାୟଗଡ଼ା ଜିଲ୍ଲା ନିୟମଗିରି ପାହାଡ଼ରେ ଥିବା ବିଭିନ୍ନ ଗାଁ ମାନଙ୍କରେ ମାଓବାଦୀଙ୍କ ତରଫରୁ ବ୍ୟାନର ଓ ପୋଷ୍ଟର ଲଗାଯାଇଛି । ଶୁକ୍ରବାରଠାରୁ ସହିଦ ସପ୍ତାହ ଅଗଷ୍ଟ ୩ ତାରିଖ ପର୍ଯ୍ୟନ୍ତ ପାଳନ କରିବା ପାଇଁ ଆହ୍ବାନ ଜଣାଇଛନ୍ତି ମାଓବାଦୀ । କଲ୍ୟାଣସିଂହପୁର ଥାନା ଅନ୍ତର୍ଗତ ପାରସାଲି ପଞ୍ଚାୟତ ଅନ୍ତର୍ଗତ ବିଭିନ୍ନ ଗାଁ ମାନଙ୍କରେ ଏହି ପୋଷ୍ଟର ଓ ବ୍ୟାନର ଦେଖିବାକୁ ମିଳିଛି । ମୁଖ୍ୟତଃ ପାରସାଲି ପଞ୍ଚାୟତ କାର୍ଯ୍ୟାଳୟ ଓ ଡିକେଡିଏ କାର୍ଯ୍ୟାଳୟ ସମ୍ମୁଖରେ ବ୍ୟାନର ଓ ପୋଷ୍ଟର ଲଗାଇ ନିଜ ସ୍ଥିତି ଜାହିର କରିଛନ୍ତି ମାଓବାଦୀ । ଅଧିକ ସଂଖ୍ୟାରେ ଯୁବକ ଯୁବତୀ ପିଏଲଜିଏରେ ସାମିଲ ହେବାକୁ ମାଓବାଦୀମାନେ ନିବେଦନ ମଧ୍ୟ କରିଛନ୍ତି । ଏଣେ ଏହା ନଜରକୁ ଆସିବା ପରେ ପୋଲିସ ଓ ସିଆରପିଏଫ ଯବାନ ପହଞ୍ଚି ତାହା ଜବତ କରିଥିଲେ । ଏଥିସହ ନିୟମଗିରି ପାହାଡରେ କୁମ୍ବିଂ ଅପରେସନ ଜୋରଦାର କରାଯାଇଛି ।

You Can Read :