ମୁମ୍ଵାଇ ୧୯।୦୫; ଗତ ୧୪ ତାରିଖରୁ ଚାଲିଥିବା କାନ୍ ଚଳଚ୍ଚିତ୍ର ମହୋତ୍ସବରେ ଶୁକ୍ରବାର ସନ୍ଧ୍ୟା ଥିଲା ଭାରତୀୟ ସିନେମାପ୍ରେମୀଙ୍କ ପାଇଁ ଗୌରବର ମୁହୂର୍ତ୍ତ । ଏ ଅବସରରେ ପ୍ରଦର୍ଶିତ ହୋଇଥିଲା ଫିଲ୍ମମେକର୍ ଶ୍ୟାମ ବେନେଗଲଙ୍କ ଚଳଚ୍ଚିତ୍ର ‘ମନ୍ଥନ୍’ । ଦେଶରେ ଭର୍ଗିଜ କୁରିନଙ୍କ ଶ୍ଵେତା ବିପ୍ଳବ ଦ୍ୱାରା ପ୍ରେରିତ ଏହି ଫିଲ୍ମ ୧୯୭୬ ମସିହାରେ ମୁକ୍ତିଲାଭ କରିଥିଲା । ଏଥିରେ ମୁଖ୍ୟ ଭୂମିକାରେ ଅଭିନୟ କରିଥିଲେ ସ୍ମିତା ପାଟିଲ ଓ ନସୀରୁଦ୍ଦିନ ଶାହ ।
କାନ୍ରେ ଫିଲ୍ମର ସ୍କ୍ରିନିଂ ଅବସରରେ ନସୀରୁଦ୍ଦିନ ଶାହ,ତାଙ୍କ ପତ୍ନୀ ତଥା ଅଭିନେତ୍ରୀ ରତ୍ନା ପାଠକ ଶାହ, ସ୍ମିତା ପାଟିଲଙ୍କ ପୁଅ ତଥା ଅଭିନେତା ପ୍ରତୀକ ବବ୍ୱର ଏବଂ ଶ୍ୱେତ ବିପ୍ଳବର ଜନକ ଡ. ଭର୍ଗିଜ କୁରିନଙ୍କ ଝିଅ ନିର୍ମଲା କୁରିନ ଓ ଫିଲ୍ମର ନିର୍ମାତାଙ୍କ ସମେତ ଗୁଜରାଟ କୋଅପରେଟିଭ୍ ମିଲ୍କ ମାର୍କେଟିଂ ଫେଡେରେସନ୍ ଲିଃ.ର ପ୍ରବନ୍ଧନ ନିର୍ଦ୍ଦେଶକ ପ୍ରମୁଖ ଯୋଗ ଦେଇଥିଲେ।କାନ୍ରେ ‘ମନ୍ଥନ୍’ର ପ୍ରିମିୟରକୁ ସବୁ କ୍ଷେତ୍ରରୁ ପ୍ରଶଂସା କରାଯାଉଛି ।
ସୃଜନାତ୍ମକ ବିଜ୍ଞାପନ ପାଇଁ ପରିଚିତ ଅମୂଲ ଇଣ୍ଡିଆ ମଧ୍ୟ ଏହାର ପ୍ରଶଂସକ ତାଲିକାରେ ସାମିଲ ହୋଇଛି । ଏହି ଗୌରବମୟ ମୁହୂର୍ତ୍ତକୁ ସମ୍ମାନ ଜଣାଇ ଅମୂଲ ପକ୍ଷରୁ ଏକ ଡୁଡଲ୍ ପ୍ରସ୍ତୁତ କରାଯାଇଛି । ଏଥିରେ ଅମୂଲ ଗର୍ଲ ଦିବଂଗତ ଅଭିନେତ୍ରୀ ସ୍ମିତା ପାଟିଲଙ୍କୁ ପ୍ରତିନିଧିତ୍ୱ କରିଛି । ସେ ଗୋଟିଏ ହାତରେ କ୍ଷୀର ଗ୍ଲାସ୍ ଓ ଅନ୍ୟ ହାତରେ ବ୍ରେଡ୍ ଓ ବଟର ଧରିଛି । ଏଥିରେ କ୍ୟାପ୍ସନ ଲେଖିଛି ‘ହମାରା ମଖନ୍, ହମାରା ମନ୍ଥନ୍... ଅମୂଲ ଟୋଷ୍ଟ୍ ଅଫ୍ କାନ୍’ ।
