୨୦/୩-ମଧ୍ୟପ୍ରଦେଶ ଭିନ୍ଦ ବିରେନ୍ଦ୍ରନଗର ଅଂଚଳରେ ବହୁଚର୍ଚ୍ଚିତ ହତ୍ୟାକାଣ୍ଡ ଘଟଣାରେ କୋର୍ଟ ଶୁଣାଇଛି ରାୟ । ମାମଲାର ବିଚାର କରି ଅଭିଯୁକ୍ତକୁ ଦେଇଛି ଆଜୀବନ ଜେଲଦଣ୍ଡ ।
୨୦୧୬ ମେ ମାସରେ ରୀନା ନାମକ ଜଣେ ମହିଳା ଓ ତାର ୪ଟି ଶିଶୁକୁ କେହି ତଣ୍ଟିକାଟି ହତ୍ୟା କରିଥିବା କଥା ଭିନ୍ଦ ଅଂଚଳରେ ଚର୍ଚ୍ଚା ପାଲଟିଯାଇଥିଲା । ଏହି ଅମାନୁଷିକ ହତ୍ୟାକାଣ୍ଡ ପଛରେ କାହାର ହାତ ଅଛି ବୋଲି ପୋଲିସ ତଦନ୍ତ କରୁଥିଲା ।
ଏହି ହତ୍ୟାକାଣ୍ଡର ଅଭିଯୁକ୍ତ ଅଂକୁର ଧରାପଡ଼ିବା ପରେ ଜଣାପଡ଼ିଥିଲା ସବୁ ଘଟଣା । ରୀନା ସହିତ ଅଂକୁରର ଅବୈଧ ସଂପର୍କ ଅନେକଦିନରୁ ଥିଲା । ଅନେକ ସମୟରେ ରୀନା ପାଖକୁ ଅଂକୁର ରାତିରେ ଆସୁଥିଲା । ରୀନା ସୁବିଧା ଦେଖି ଫୋନ କଲେ ପହଂଚିଯାଉଥିଲା ଅଂକୁର ।
ସେଦିନ ରୀନା ରାତି ୧୧ଟା ପରେ ଅଙ୍କୁରକୁ କରିଥିଲା ଫୋନ ।ଅଂକୁର ରାତିରେ ଆସି ରୀନା ସହିତ ରଖିଥିଲା ଶାରୀରିକ ସଂପର୍କ । ଏହି ସମୟରେ ସେ ପିଲାଙ୍କୁ ନିଦ ଟ୍ୟାବଲେଟ ଦେଇ ଶୋଇପକାଉଥିଲା । କିନ୍ତୁ ଏହି ସମୟରେ ରୀନାର ପାଖରେ ଶୋଇଥିବା ପିଲାଙ୍କ ମଧ୍ୟରୁ ଜଣେ ଉଠିପଡ଼ିଥିଲା ।ରୀନା ସହ ଅବୈଧ ସଂପର୍କ ରଖୁଥିବାର ଦେଖିନେଇଥିବାରୁ ଅଂକୁର ତଣ୍ଟି ଚିପି ମାରିଦେଇଥିଲା । ଏହାପରେ କାଳେ ଆଉ କିଏ ଚାହିଁଥିବ ଭାବି ଜଣେ ପରେ ଜଣେ ୪ଜଣଙ୍କର ଗଳାକାଟି ହତ୍ୟା କରିଥିଲା ଅଂକୁର । ଏହି ଘଟଣାକୁ ବିରୋଧ କରିବାରୁ ରୀନାର ଗଳାକାଟି ହତ୍ୟା କରିଥିଲା ଅଂକୁର । ତା ପରେ ସେ ଫେରାର ହୋଇଯାଇଥିଲା । ଏହି ଘଟଣାର ଛାନଭିନ କରି ପୋଲିସ ଅଂକୁରକୁ ଧରିବାକୁ ସକ୍ଷମ ହୋଇଥିଲା ।
ଏହି ମାମଲାରେ ଜେଲରେ ଥିବା ଅଂକୁରକୁ କୋର୍ଟ ଶୁଣାଇଛି ସଜ୍ଜା । ଏହି ହତ୍ୟା ମାମଲାରେ ଅଂକୁରକୁ ମିଳିଛି ଆଜୀବନ ଜେଲଦଣ୍ଡ ।
