ବଡବିଲ ୧୩।୧୧: ହାତୀ ଆକ୍ରମଣରେ ଜଣଙ୍କର ମୃତ୍ୟୁ ହୋଇଛି । କେନ୍ଦୁଝର ଜିଲ୍ଲା ଚମ୍ପୁଆ ରେଞ୍ଜ କାଳିକାପ୍ରସାଦ ପଞ୍ଚାୟତ ଅନ୍ତର୍ଗତ ବସିରା ଗାଁ ନିକଟରେ ଅଘଟଣ ଘଟିଛି । ମୃତକ ବସିରା ଗାଢ଼ା ସାହିର ନାରଦ ମୁଣ୍ଡା । ସୋମବାର ଅପରାହ୍ନରେ ସେ ପାଖ ଜଙ୍ଗଲକୁ ଶୌଚ ପାଇଁ ଯାଇଥିବା ବେଳେ ହାତୀ ହାବୁଡ଼ରେ ପଡ଼ିଯାଇଥିଲେ । ଗୋଟିଏ ହାତୀ ତାଙ୍କୁ ଟେକି କଚାଡ଼ି ଦେଇଥିଲା । ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା । ଏନେଇ ବନ ବିଭାଗ ପକ୍ଷରୁ ଚମ୍ପୁଆ ପୋଲିସକୁ ଖବର ଦିଆଯିବା ପରେ ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ଚମ୍ପୁଆ ମେଡିକାଲକୁ ପଠାଇଛି ।

ସୂଚନା ଅନୁଯାୟୀ, ଗତ ୧୨ ଦିନ ହେବ ଚମ୍ପୁଆ ବ୍ଲକ କାଳିକା ପ୍ରସାଦ ରିଜର୍ଭ ଜଙ୍ଗଲରେ ୪୨ ଟିକିଆ ହାତୀପଲ ଆଡ୍ଡା ଜମାଇଛନ୍ତି । ସନ୍ଧ୍ୟା ହେଲା ମାତ୍ରେ ଆଖପାଖ ଗ୍ରାମର ଧାନବିଲ ସବୁ ଦଳିଚକଟି ନଷ୍ଟ କରୁଛନ୍ତି । ଏମିତିରେ ଗ୍ରାମବାସୀ ଆତଙ୍କିତ ଅବସ୍ଥାରେ ରହୁଛନ୍ତି । ତେବେ ସୋମବାର ହାତୀ ଆକ୍ରମଣ ଯୋଗୁଁ ନାରଦ ମୁଣ୍ଡାଙ୍କ ଆକସ୍ମିକ ମୃତ୍ୟୁ ଘଟିବା ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି । ହାତୀପଲଙ୍କୁ ତୁରନ୍ତ ଏ ଅଞ୍ଚଳରୁ ଘଉଡାଇବା ପାଇଁ ଦାବି ହୋଇଛି ।

You Can Read :