ଲକ୍ଷ୍ନୌ ୭/୧୧: କରୋନା ଭାଇରସ୍ ଯୋଗୁଁ ଏବେ ମନୁଷ୍ୟ କେତେକ ସମସ୍ୟା ଦେଇ ଅତିକ୍ରମ କରୁଛି। ଯଦି ଏହି ଋତୁରେ କାହାକୁ ଥଣ୍ଡା କାଶ ହୋଇଯାଉଛି ତେବେ ଲୋକେ ଡରି ଯାଉଛନ୍ତି କାଳେ କରୋନା ହୋଇଛି କି? ଏହାର ପ୍ରସାରକୁ ରୋକିବା ପାଇଁ କେନ୍ଦ୍ର ସରକାର ଦ୍ବାରା ଲଗାଯାଇଥିବା ଲକଡାଉନ୍ ଏବେ ଲୋକଙ୍କ ପାଇଁ ରୋଜଗାର ସମ୍ବନ୍ଧୀୟ ସମସ୍ୟା ନେଇ ଆସିଛି।

 ଲକ୍ଷ୍ନୌରେ ଏପରି ଏକ ଘଟଣା ଦେଖିବାକୁ ମିଳିଛି । ଜଣେ ସଫ୍ଟଓ୍ବେୟାର ଇଞ୍ଜିନିୟର ଲକଡାଉନ୍ କାରଣରୁ କାନାଡ଼ା ଯାଇପାରିନଥିଲେ ଏବଂ ଫ୍ରଷ୍ଟ୍ରେସନରେ କାନମୂଳିରେ ଗୁଳି ମାରି ଆତ୍ମହତ୍ୟା କରିଛନ୍ତି। ପୋଲିସ୍ ସୂଚନା ପାଇବା ମାତ୍ରେ ଘଟଣାସ୍ଥଳରେ ପହଞ୍ଚିଥିଲା ଏବଂ ଶବକୁ ପୋଷ୍ଟମର୍ଟମ ପାଇଁ ପଠାଇ ଦେଇଛି।

ଏହା ସହିତ ମୃତ ବ୍ୟକ୍ତିଙ୍କ  ପରିବାର ଲୋକଙ୍କୁ ଏହାର ସୂଚନା ଦିଆଯାଇଛି। ବର୍ତ୍ତମାନ ମାମଲାର ତଦନ୍ତ କରାଯାଉଛି।

ସୂଚନା ଅନୁଯାୟୀ ମୃତ ରାହୁଲ ସଫ୍ଟଓ୍ବେୟାର ଇଞ୍ଜିନିୟର ଥିଲେ ଏବଂ ଲକ୍ଷ୍ନୌର ଜୟ ନାରାୟଣ ରୋଡ ସ୍ଥିତ ନୀଳମଡି ଲଜର ୧ମହଲାରେ ରହୁଥିଲେ। ରାହୁଲ ବଲିୟାର ମୂଳ ବାସିନ୍ଦା ଥିଲେ ଏବଂ ଲକ୍ଷ୍ନୌର ଏକ ପ୍ରାଇଭେଟ କମ୍ପାନୀରେ କାମ କରୁଥିଲେ। ଶୁକ୍ରବାର ବିଳମ୍ବିତ ସନ୍ଧ୍ୟାରେ ସେ ବନ୍ଧୁକରେ ନିଜ କାନମୂଳିରେ ଗୁଳି କରି ଆତ୍ମହତ୍ୟା କରିଥିଲେ। ପଡ଼ୋଶୀ ଏବିଷୟରେ ପୋଲିସକୁ ସୂଚନା ଦେଇଥିଲେ।

 ମୃତ ରାହୁଲ୍ ଏବର୍ଷ କାନାଡ଼ା ଯିବାକୁ ଚାହୁଁଥିଲେ କିନ୍ତୁ କରୋନା ଏବଂ ଲକଡାଉନ୍ ଯୋଗୁଁ ତାଙ୍କର ଭିସା କ୍ୟାନସେଲ୍ ହୋଇଯାଇଥିଲା। ସେଥିପାଇଁ ସେ ମାନସିକ ଅବସାଦଗ୍ରସ୍ତ ହୋଇଯାଇଥିଲେ। ପୋଲିସକୁ ତାଙ୍କ ରୁମରୁ ଏନର୍ଜି ଡ୍ରିଙ୍କ୍ ଏବଂ କିଛି ଔଷଧ ମିଳିଛି।