ଭୁବନେଶ୍ବର ୨୧।୧୧: ଭୁବନେଶ୍ବର ବରମୁଣ୍ଡା କୃତିବନ୍ଧୁ ଆପାର୍ଟମେଣ୍ଟରେ ସ୍ତ୍ରୀକୁ ଛୁରୀଭୁସି ହତ୍ୟା ଉଦ୍ୟମ ଘଟଣାରେ ଅଭିଯୁକ୍ତ ସ୍ୱାମୀ ସପନ କରକୁ ଗିରଫ କଲା ପୋଲିସ । ପାରିବାରିକ କଳହ ପାଇ ସ୍ତ୍ରୀକୁ ହତ୍ୟା ଉଦ୍ୟମ କରିଥିବା ପୋଲିସ ସୂତ୍ରରୁ ସୂଚନା ମିଳିଛି । ତେବେ ଦୀର୍ଘ ଦୁଇ ବର୍ଷ ହେବ ଉଭୟଙ୍କ ମଧ୍ୟରେ ପାରିବାରିକ କଳହ ଲାଗି ରହିଥିଲା ।

ଅଭିଯୁକ୍ତ ସପନର ବଡ଼ ବାପାଙ୍କ ଦଶାହକ୍ରିୟାକୁ ସ୍ତ୍ରୀ ମଧୁସ୍ମିତା ଯାଇ ନଥିଲେ । ଯାହାକୁ ନେଇ ରାଗି ଯାଇଥିଲେ ସ୍ୱାମୀ ସପନ କର । ତେବେ ସେଥିପାଇଁ ସ୍ତ୍ରୀକୁ ଛୁରୀଭୁସିଥିଲେ ବୋଲି ଜଣାପଡିଛି । ଆକ୍ରମଣ ପରେ ମଧୁସ୍ମିତାଙ୍କ ସ୍ୱାସ୍ଥ୍ୟାବସ୍ଥା ସଙ୍କଟାପନ୍ନ ରହିଛି । ତାଙ୍କୁ ଏକ ଘରୋଇ ହସ୍ପିଟାଲରେ ଚିକିତ୍ସା କରାଯାଉଛି । ସୋମବାର ଏଭଳି ଘଟଣା ଘଟିବା ପରେ ଘଟଣାସ୍ଥଳରେ ଭରତପୁର ଥାନା ପୋଲିସ ଓ ସାଇଣ୍ଟିଫିକ୍ ଟିମ୍ ପହଞ୍ଚି ଖୋଳତାଡ କରିଥିଲେ ।

ସୂଚନାଯୋଗ୍ୟ ଯେ, ସବୁଦିନ ଭଳି ସୋମବାର ପୂର୍ବାହ୍ନ ୧୧ଟାରେ ମଧୁସ୍ମିତା ଉକ୍ତ ଅଫିସକୁ ଯାଇଥିଲେ । ସପନ ଅପରାହ୍ନ ସାଢ଼େ ୧ଟାରେ ଉକ୍ତ ଅଫିସ୍‌ରେ ପହଞ୍ଚିଥିଲେ । କାନ୍ଧରେ ଏକ ବ୍ୟାଗ୍‌ ପକାଇଥିଲେ । ପୂର୍ବ ଝଗଡାକୁ ସେଠାରେ ଯୁକ୍ତିତର୍କ ହୋଇଥିଲା । ସପନ ପ୍ରଥମେ ମଧୁସ୍ମିତାଙ୍କୁ ୨ଟି ଚାପୁଡା ମାରିଥିଲେ । ମଧୁସ୍ମିତା ଠେଲିଦେବାରୁ ସପନ ଉତ୍‌କ୍ଷିପ୍ତ ହୋଇ ବ୍ୟାଗ୍‌ରୁ ଏକ ଛୁରି କାଢ଼ି ତାଙ୍କୁ ଭୁସି ଚାଲିଲେ । ମଧୁସ୍ମିତାଙ୍କ ଚିତ୍କାରରେ ଅଫିସ୍‌ରେ ଅନ୍ୟ କର୍ମଚାରୀମାନେ ସେଠାରେ ପହଞ୍ଚି ସପନଙ୍କୁ ବହୁ କଷ୍ଟରେ କାବୁ କରିଥିଲେ । ଆକ୍ରମଣର ପୁରା ଦୃଶ୍ୟ ସିସିଟିଭିରେ ରେକର୍ଡ ହୋଇଛି । ପୋଲିସ ଏହି ଫୁଟେଜ୍‌କୁ ଜବତ କରିଛି । ରକ୍ତ ଜୁଡୁବୁଡୁ ଅବସ୍ଥାରେ ମଧୁସ୍ମିତାଙ୍କୁ ତୁରନ୍ତ କ୍ୟାପିଟାଲ ହସ୍ପିଟାଲ ନିଆଯାଇଥିଲା । ସେଠାରେ ତାଙ୍କ ଅବସ୍ଥା ଗୁରୁତର ହେବାରୁ ଏମ୍ସ ପଠାଇ ଦିଆଯାଇଛି । ସେଠାରେ ତାଙ୍କ ସ୍ୱାସ୍ଥ୍ୟାବସ୍ଥା ଉଦ୍‌ବେଗଜନକ ରହିଛି । ବୁଧବାର ସପନଙ୍କୁ କୋର୍ଟଚାଲାଣ କରାଯିବ ବୋଲି ପୋଲିସ କହିଥିଲା ।

ପୋଲିସ ସୂତ୍ରରୁ ପ୍ରକାଶ, ବାଲେଶ୍ୱର ସୋର ଥାନା ଅଧୀନ ଖରିଡ଼ା ଅଞ୍ଚଳର ସପନଙ୍କୁ ୨୦୧୮ ମସିହାରେ ମଧୁସ୍ମିତା ବାହା ହୋଇଥିଲେ । ଉଭୟଙ୍କ ୫ ବର୍ଷର ପୁତ୍ର ଅଛି । ୨୦୧୮ରୁ ୨୦୨୧ ଯାଏଁ ଉଭୟଙ୍କ ବୈବାହିକ ଜୀବନ ଠିକ୍‌ଠାକ୍‌ ଚାଲିଥିଲା । କୌଣସି କାରଣରୁ ଉଭୟଙ୍କ ସମ୍ପର୍କରେ ଫାଟ ସୃଷ୍ଟି ହେଲା । ମଧୁସ୍ମିତା ସୋର ଥାନାରେ ସପନଙ୍କ ନାଁରେ ଯୌତୁକ ନିର୍ଯାତନା ଅଭିଯୋଗ ଆଣିଥିଲେ । ସେବେଠୁ ସେ ପୁଅକୁ ଧରି ବାପା ଘରେ ରହୁଛନ୍ତି । ସପନ ମହାରାଷ୍ଟ୍ରର ପୁନେରେ ଥିବା ‘ସ ଅଲ୍‌ ଡେ ବାର୍‌’ରେ ରୋଷେୟା ଭାବେ ଚାକିରି କରୁଥିଲେ । ଗତ ୭ ତାରିଖରେ ତାଙ୍କ ବଡ଼ବାପାଙ୍କ ଦଶାହ କାର୍ଯ୍ୟ ପାଇଁ ସେ ବାଲେଶ୍ୱର ଯାଇଥିଲେ । ଦଶାହରେ ମଧୁସ୍ମିତା ଯୋଗ ନଦେବାରୁ ସେ ରାଗି ଯାଇଥିଲେ ବୋଲି ସପନ ଜେରା ବେଳେ କହିଛନ୍ତି ।

You Can Read :