ପୁରୀ ୧୮।୦୨ : ଆଜି ପବିତ୍ର ମହାଶିବରାତ୍ରୀ । ଏହି ଅବସରରେ ପୁରୀର ଶ୍ରୀଲୋକନାଥଙ୍କ ପୀଠରେ ପାଳିତ ହେଉଛି ଜାଗର ଯାତ୍ରା। ମଧ୍ୟରାତ୍ରୀ ପରେ ଦ୍ୱାର ଫିଟା ସହ ଦୈନନ୍ଦିନ ନୀତି ଶେଷ ହୋଇ ଭୋର ୪ଟାରୁ ଶ୍ରୀଲୋକନାଥଙ୍କ ସର୍ବସାଧାରଣ ଦର୍ଶନ ଜାରି ରହିଛି।

ତେବେ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମକୁ ଦୃଷ୍ଟିରେ ରଖି ବାରିକେଡ଼ିଂ ମଧ୍ୟରେ ଲାଇନ୍ ବାନ୍ଧି ଦର୍ଶନ ସହ କଡ଼ା ସୁରକ୍ଷା ଓ ଟ୍ରାଫିକ କଟକଣା ଲାଗୁ କରାଯାଇଛି। ବିଶେଷ କରି ମଧ୍ୟ ରାତ୍ର ପରେ ହରିହର ଭେଟ ଓ ମହାଦୀପ ଦର୍ଶନ ପାଇଁ ଭକ୍ତଙ୍କ ମଧ୍ୟରେ ବିଶେଷ ଉତ୍ସାହ ପରିଲକ୍ଷିତ ହୋଇଛି। ରାତି ୧୨ଟାରେ ଦ୍ୱାରଫିଟା ପରେ ଶ୍ରୀଲୋକନାଥଙ୍କ ମଙ୍ଗଳ ଆଳତୀ, ମଇଲମ ଓ ଅବକାଶ ପୂଜା କରାଯାଇ ଭୋର ପ୍ରାୟ ୪ଟାରୁ ସର୍ବସାଧାରଣ ଦର୍ଶନ ଆରମ୍ଭ ହୋଇଥିଲା।

ଏହି ପବିତ୍ର ଦିନରେ ଲୋକନାଥଙ୍କୁ ଦର୍ଶନ କରି ଭକ୍ତ ମାନେ ଅଶେଷ କୃପା ଲାଭ କରୁଛନ୍ତି। ଶ୍ରୀଲୋକନାଥଙ୍କୁ ଶ୍ରୀମନ୍ଦିରରେ ଭଣ୍ତାର ରକ୍ଷକ ଭାବେ ବିବେଚନା କରାଯାଇଥାଏ। ସେଥିପାଇଁ ଏଠାରେ ହରିହର ଭେଟର ମଧ୍ୟ ପରମ୍ପରା ରହିଛି। ଏହାଛଡ଼ା ଏହି ଭେଟ ନୀତି ପରେ ମହାଦୀପ ଉଠିବାର ପରମ୍ପରା ମଧ୍ୟ ରହିଛି। ଭକ୍ତମାନେ ମନ୍ଦିର ଚତୁପାର୍ଶ୍ୱରେ ରାତି ତମାମ ଉଜାଗର ରହି ଦୀପ ଜାଳିବା ସହ ଏହି ନୀତି ଦର୍ଶନ କରିଥାନ୍ତି। ଲକ୍ଷାଧିକ ଭକ୍ତଙ୍କ ସମାଗମକୁ ଦୃଷ୍ଟିରେ ରଖି ସିସିଟିଭି, ବ୍ୟାରିକେଡ଼ିଂ ସହ ଅତିରିକ୍ତ ଏସପି, ସିଟି ଡ଼ିଏସପି, ସମସ୍ତ ଥାନାର ଆଇଆଇସିଙ୍କ ସହ ୧୫ ପ୍ଲାଟୁନ୍ ପୋଲିସ ଫୋର୍ସ ମୁତୟନ ଅଛନ୍ତି।